اليوم بدا مسلسل محاكمة المشاغبين والعملاء متاع الحوض المنجمي...
مانيش باش نحكي برشة المرة هاذي...
فقط
كلمة وحدة..
الله معاك يا بيت صامد في الجنوب..
يلي تحت سقفك ع الوفا ربيتنا..
( باش تصبو الغناية ما عليكم كان تنسخو الرابط وتحطوه في المكان المخصص الفوق )
خريتو فيه..
أي نعم يا سيدي ، راكم خريتو فيه ،... زلعتونا قدام الأمم ، عملتو العار ، فضحتونا...
توة واحد على الأقل يكون صريح ، علاش يكذب على خلق ربي ؟ الشيوعي كيف يشد الحكم يصرحلك يقلك راهو احنا باش نمارسو دكتاتورية البروليتاريا وتشدوني منو.. الإسلامي كيف يشد الحكم يقلك راهو باش نطبقو الخلافة ، الخ...
علاش تحتضنو في والديها قمة المعلومات هذي ؟؟؟
تحبو تردمو الفجوة الرقمية مع الغرب قبل ما تردمو هاك الفجوة الفكرية أو بالأحرى الفوسي الفكري الي معشش في عقولكم ؟؟
كيفاش جات هذي ؟؟؟؟؟؟
تنجموشي يا جماعة " مزيد من البذل والعطاء لكسب تحديات الحاضر و رهانات المستقبل والرقي بتونس الى...." تفسرولنا الظاهرة المقصية الي هابطة تحش في المواقع والمدونات حتى غير السياسية منها ؟؟
حتى رابيد شير يا رسول الله ؟؟ و اليوتوب ؟؟
تو مش شي يحشم هذا ويعمل التقلص في المعدة ؟؟؟
تونس في المرتبة الثانية بعد السعودية من حيث التضييق على الإعلام في العالم العربي ؟؟
علااااااااااااش ؟
علاش ما نوريوش للعالم وجه آخر لهذا الشعب المتمدن والمسالم ؟؟
علاش نخليو الجزيرة تشمت بينا وتقيد هذا على العلمانية ؟؟
من شنوة تخافو ؟؟ خلي العباد تحكي...تكتب.. تعيط... تنقد.. تربرب...
باش تموتو ؟؟ نقصت منكم حاجة.. ؟؟ بالعكس العالم كل يولي يشكر فيكم..
ما تعرفوش إلي الكبت يعمل مشاكل أخرى اكبر ؟؟
ماتعرفوش إلي الإنسان المكبوت و الممنوع من التعبير.. يلقى طيارة للسودان يمشي يقاتل الجنجويد غادي ؟؟
راهو عيب... عيب... وما يليقش... وما عادش حلو في العصر هذا..
باش يجي نهار وتتحل المواقع هاذي الكل.. على خاطر المدونين ماهمش موظفين باش يفدو وإلا يقلقو ، ويحبو تونس أكثر بياسر من سي عمار هذا... والنضال متاعهم باش يتواصل حتى نيل الحرية الكاملة ، و في تلك اللحظة ، تولي الفترة هاذي نقطة سوداء في مسيرة حرية الإعلام..
...
تو تو كيف جيت من القهوة ، مكهرب الإحساس منتصب القامة ،... نعم لقد فعلها الرجال ثانية !!
بنخوتهم التي عودونا بها ، بحرارة الشرقي الثائر ، بقلوبهم الفذة... صنعوا النصر و أدهشوا العالم..
إلي ما شافش الماتش هذا فاتو نص عمرو ، في آخر لحظات الشوط الاضافي الثاني ، تسجل كرواتيا هدفا ،
"يربرب" المشاهدون في المقهى ، ويهم بعضهم بالخروج...
يوشك الحكم على " التعفيط " اعلانا لنهاية المباراة ، هجوم أخير ، ينطلق المقاتلون جميعا نحو الخصم... إصرار لا نظير له ، "رجع الصفارة يا حكم" ، لسنا نحن من ننسحب بهذه الطريقة... هكذا قال الأتراك...
هدف جميل انتفضت على إثره لا ادري كيف ، عانقت صديقي ، تكسرت ثلاثة كؤوس في الطاولة التي تحاذينا ، ثورة أعادتني إلى نسورنا... نعم ، وكأن تونس هي التي تلعب...!
عاد من كان يهم بالخروج ، ليفرح معنا الفرحة الكبرى.. حين انتهت ركلات الجزاء..
اليوم أدركت أني أحبكم بحق...
وان نقدي لدينكم ، ما كان ليكون لولا هذا الحب..
فالي الجحيم أيها الغرب !!!
في البلعة القادمة ارفع نخبك يا تركيا ، يا قاهرة العالم ، يا من تبولت عليهم حين اقتربت سفنهم منك في تلك الأيام الغابرة..
سأرفع كأسك ، فانتظري ، ولتشمتوا معي الآن في السافل الذي رسم هذه الصورة...
...
البارح ، عقدت شلة السوء متاعنا اجتماعها العادي في المقهى ، و خرجت بعدة قرارات كان أهمها :
- تنظيم بلعة أخرى في نفس المكان إلي بلعنا فيه نهار السبت.
تنفيذ القرار ما جاش متأخر ، فبعد نصف ساعة تحديدا ، انطلق كل عنصر لدارو باش يلقط هاك الدنانس ويحضر صاكو وكمْيتو.. قصدنا ربي لكارفور للتزود بما يلزم ، ثم شدينا الثنية على بركة الله إلى ذلك الشاطئ الساحر... شاطئ قمرت..
إلي يعجب في البلاصة هاذي هو التواجد القليل إن لم يكن المنعدم لعناصر الحنوشة الوطني ، بحيث تنجم تتمتع بحريتك وحقك في الحياة إلي نص عليه البند الثالث متاع حقوق الإنسان من غير ما تبدى تستنى في شلبوق يهبطلك من حيث لا تدري..
عدينا نهار تحفون ياسر ، تكوير و عومان و برشة تفدليك ، وكيف بدات الشمس تقرب لهاك العين السخونة ، الجماعة حبوا يروحوا ، أنا كنت معترض بالطبيعة ..على خاطر وقتها كيف بدات تحلى القعدة ... و المناظر الطبيعية تزيدلي في الدوزة ثلاثة مرات ، الصنعة هاذي ورثتها من عند بابا كيف يبدى حاططلي هاك "أوشويا" و يصك في البيرا...
اليوم ، قلنا برة نهبطوا "للغولدن" نلعبو طرف تنيس ، ربيع ساعة و تلمّينا الكل قدام المحطة متاع "الفان" ، تتعدى الكار الأولى.. تاقف على بعد كيلومتر القدام.. طحنا نتجاراو كيف الطحانة تعمل هكة وتفصع علينا.. رجعنا مع باقي المواطنين ننتظر ما أفضل.. جات الثانية بعد ربع ساعة ، الناس تتدلدل من الباب غير آبـهة بمخاطر لبسان علامة " قف" وإلا تكسير كرايمها " بشيت ليبر" كيف مايقول استاذ الفيزيك متاعنا ( ولو انو طيحة الكار لا تُعتبر "شيت ليبر" بل هي اخطر بحكم تدخل "الفاكتور" متاع "الفيتاس" في السقوط ) ...
قلنا برة نستناو الثالثة ممكن تبدا فارغة... ولم يكن هناك ثالثة أصلا...!
طحت نربرب على رب هالحالة التعيسة.. همزني صاحبي و قالي : "يا عم جعبون.. وراك مركز الاستشعار عن بعد.. وقدامك سفارة امريكا...".. لم يكن لي سوى الضحك بالطبيعة.. ففوبيا حلاّن الجلغة عند مواطنينا بلغت حد السذاجة... (:
بعد ما استنفذنا ورقة الكار ، قلنا برى ندوروها "ستوب".. نطيحوشي بواحد ولد حلال يشيعنا في ثنيتو ، كانت مجرد مضيعة للوقت بالطبيعة ، التجأنا على إثرها للتاكسي ورصاتلنا نبشطرو في الدخان كيف وصلنا.. المؤكد أنو كان مشينا على سقينا مالأول راهو وصلنا قبل..
* * *
و الطفل هذا اسمو كريم..يفلّم برشة ..
وهذايا خوكم مروان.. (:
بالطبيعة.. أخفيت الوجوه لأسباب أمنية بحتة هههه
بعد ما كملنا لعبنا ، دفعنا هاك الخمسة دنانس متاع السويعة ، وتوجهنا لشارع ميامي (سابقا) نشمو في النسمة..
البحيرة وبوقرنين.. والعاصمة من غادي ، يعملولي حالة نشوة مزمنة تفكّرني في البيرة ، والمرة هاذي ، التفكير متاعي باش يطوّل شوية ، علاش في بقعة كيما هاذي ماثمة حتى بار ؟؟؟
زعمة المشكلة منا نحنا ؟؟ وإلا من القانون ؟؟
نتصور انو المشكلة مشتركة.. أما في حقيقة الأمر ، القانون ما يجيش من فراغ ، وهو بيدو يمثل انعكاس واضح لعقلية المجتمع وتصرفاتو.. و أحنا ، وللأسف ، مجتمع بلا أخلاق...
ما تستغربوش من الكلمة هاذي ، هذيكا الحقيقة ، على الفيكتوار ناوين.. سامحوني ، عادا قلتلكم ، هذاكا هو الواقع ، فالبناء الأخلاقي عند المسلمين "فراجيل" وقابل للهدم مع أول كعبة بيرة...
علاش يقول القايل... ؟
قبل كل شيء ، باش نعطيكم تصوري الخاص لسبب نشوء الأخلاق لدى الإنسان...
الإنسان يا جماعة هو حيوان اجتماعي بدرجة أولى ، ما ينجم يعيش كان في ظل هالمجموعة الي بدات تتشكل منذ وجودو ، عن طريق العائلة أولا ، ثم توسعت إلى القبيلة ، كل فرد يحاول يحافظ على المجموعة متاعو باش يحافظ على روحو ، لأنو بلاش هالمجموعة هاذي ينجم يتحوّل طعام ساهل للسيودة ، وكيف يضرب "قريب" ما يلقى حد عند راسو.. عادا هالفرد هذا بدا يلوّج على طرق تنظم نوعا ما التعامل الداخلي وسط هالشلة ، بحيث ما يتضرش فيها حتى عنصر لانو هالعنصر نفسو هو جزء من المجموعة هاذي.. و السبب الثاني هو علمو المسبق انو إذا كان يعمل الدوانة مع واحد فيهم راهو الواحد هذاكا باش يرجّعلو دوانتو ، على هالزوز الركائز الأنانية ، بدا مفهوم المصلحة المشتركة و عدم الإضرار بالآخر ينمو ، ثم أخذ يتطور تدريجا وببطء حتى ولى حاجة فطرية مزروعة في جينات الإنسان و بعيدة عن الربح الشخصي ، وتحولت في ما بعد إلى "الخير" و "الأخلاق" مع ظهور عديد الفلاسفة و بعض الأديان كالبوذية... إلى أن بلغت أوجها مع ظهور المدنية الإغريقية و نشوء رغبة عميقة لدى الإنسان في بناء المدينة الفاضلة..
كيف جاء محمد ، وحَب يبني الدولة الإسلامية متاعو ، كانت عندو رغبة حقيقية في رفع المستوى الأخلاقي عند العرب ، عبر إدخالهم عصر المدنية ، و توحيد القبائل متاعهم .. هاجر ليثرب وبدا يبني في المشروع متاعو..
أما المؤسف ، انو كان يجهل الي هو قاعد يرتكب في غلطة فظيعة مازالت تداعياتها حاضرة لحد هذه اللحظة و ستتواصل مع بقاء هذا الدين..
كيما نعرفو ، محمد تاجر ، وزوجتو خديجة تاجرة ، والتاجر وللأسف عمرو ما ينجم يبني منظومة أخلاقية صحيحة ، بل بالعكس ، باش يزلعها زلعة ماسطة ياسر وباش يهردلها أمها...
لأنو ببساطة ، باش يهدّم هاك الوازع الأخلاقي الفطري إلي تشكل تدريجا مع مرور الزمن ، وباش يرجعو للمربع الأول متاع الإنسان البدائي والي هو " نعمل باش ناخو... وما نعملش باش ما يتحشاليش "...
هذيكا هية طبيعة الأخلاق عند المسلمين ، مبنية على المفهوم الأناني والمصلحي..والميزان الكبير الي باش يشوفلك "الكونت" متاعك قداش حصّل ، والي يلقى روحو زوالي... امو "تنـ**ت" " فأما من خفت موازينه فأمه هاوية".. لحد الآن ، الوضع مش كارثي برشة ، أما الضرب الصحيح وقتها نساويو بين التسبيح وبين إطعام فقير.. وبين إنقاذ طفل من الغرق وقرائة بعض السور ، و عندما نقول أن الصلاة تجبّ ما قبلها ، أي تفسخ ما حدث قبلها من سيئات... و الزلعة الأكبر ، كيف تعمل حجّة ترجع كمن ولدته أمه.. خالي من أي ذنب..
غطي رب هاك الشعرات لنـزبزهالك !
علاش المنظومة الأخلاقية الإسلامية تتهدم مع كعبة بيرا ؟
لأنو إلي يشرب يعرف انو قاعد يرتكب في كبيرة من الكبائر.. فشنوة المشكل كان يتحيل وإلا يضرب ؟؟ هو صرف صرف.. وبعد الحجّة نتفاهمو...
هذاكا علاش يا جماعة ، السكارجية متاعنا أصحاب مشاكل ، وبسببهم نحنا محرومين من كويس بيرا في بقعة كيف البحيرة.. وإلا سيدي بوسعيد...
الأخلاق الإنسانية و القيم إلي بداخلنا وقع هدمها من قبل تاجر ادعى انه نبي... فتحولنا إلى كائنات لا هم لها سوى الربح.. تعمل جو كيف تتحيل على واحد " هههه عديتها عليه "... و ماتحشمش من كلمة " أخطى راسي واضرب"..
هذاكا علاش ما وقفلنا حد كيف عملنا ستوب..
و بالله في الختام.. ركزوا على الماتشوات متاع كاس أوروبا ، جماهير الفريقين في مدرج واحد..و الجميع يصفق عند نهاية المباراة..
أما نحنا.. ، ستاد مقصوم على ثنين ، وفي الوسط فمة مدرج فارغ محاط بوحدات التدخل ، وقوارير المياه ديما حاضرة... علاش ؟؟؟
إسألو التاجر اتو يقلكم.. على خاطر أي إبداع فني هو مرآة للمبدع إلي صنعو...
مهما حاول يتقمص شخصيات أخرى..
سورة البقرة - سورة - آية 16
" أولئك الذين اشتروا الضلالة بالهدى فما ربحت تجارتهم وما كانوا مهتدين"
---------------
سورة التوبة - سورة - آية 111
--------------
سورة فاطر - سورة - آية 29
" إن الذين يتلون كتاب الله وأقاموا الصلاة وأنفقوا مما رزقناهم سرا وعلانية يرجون تجارة لن تبور "
وغيرها الكثير...
باختصار..
أخلاقنا تعاني مرض التسطيح المزمن..
...
في التدوينة هاذي ، باش نوريو لأخواتنا المسلمين كيفاش انو دينهم وللأسف عمرو ما ينجم يتوافق مع الانجازات الحديثة للحضارة الإنسانية ، خاصة في مجال حقوق الإنسان..
الميثاق العالمي إلي عملتو الأمم المتحدة سنة 1948 ، والي وقعت عليه كل دول العالم كونو يمثل ضمان حقيقي للحفاظ على آدمية المرء وكرامتو ، يتعارض تعارض شديد مع القوانين الإسلامية ممثلة بما يعرف بالشريعة...
باش نوريولكم توة فاش يتمثل هالتعارض هذا ، ومستعدين كيما العادة لسماع آرائكم واعتراضاتكم و سبّانكم كان لزم..
أيا سيدي نبداو بالبندين الأولانين...
البند رقم 1
كل البشر يولدون أحرارا ومتساوين بالكرامة والحقوق ويتميزون بعقول وضمائر وواجبهم التعامل مع بعضهم البعض بروح الأخوة .
البند رقم 2
كل فرد يتمتع بكافة الحقوق والحريات المنصوص عنها في هذا الإعلان بدون تمييز من أي نوع مثل العرق واللون والجنس واللغة والدين والمعتقد السياسي أو غيره أو الانتماء الوطني أو الاجتماعي أو الطبقي أو الطائفي وغيره. كما لا يجب التمييز بناء على أساس الحالة السياسية أو التشريعية للوطن أو المنطقة التي ينتمي إليها الفرد سواء كان الوطن مستقلا أم تحت الاحتلال أم تحت حكم ذاتي أو أي أشكال أخرى للحكم والإدارة .
طبعا.. بعض البشر مايتولدوش أحرار ، و هوما المنحدرين من طبقة العبيد أو أملاك اليمين ، والحقوق والحريات في الإسلام تفرق على أساس الدين والجنس والطبقة ، وهذا أمر مفروغ منو أما ميسالش كان نستشهدو ببعض الأمثلة..
" تفريق على أساس طبقي "
" يا أيها الذين آمنوا كُتب عليكم القصاص في القتلى الحر بالحر والعبد بالعبد والأنثى بالأنثى" البقرة
يعني حياة العبد لا تساوي حياة الحر، فلو قتل حرٌ عبداً لا يُقتل الحر بالعبد، ولكن يُقتل العبد إذا قتل حراً..
بعض الأمثلة من التفريق على أساس الجنس"
" للذكر مثل حظ الأنثيين" قرآن
المرأة ممنوع عليها أي منصب " ما أفلح قوم ولوا أمرهم لامرأة".. حديث
للرجل الحق في تعدد الزوجات بينما المرأة ليس لها الحق في ذلك..
شهادة الرجل تساوي شهادة امرأتين.. الخ
التفريق على الأساس الديني..
أصحاب الديانات الأخرى هم أنصاف مواطنين ويسمون أهل ذمة ، هم محرومون من الدفاع عن أوطانهم والمشاركة في القتال ، ولا تجوز شهادتهم على المسلم بينما يجوز للمسلم الشهادة على الذمي ، وزارة المالية والضرائب أو بيت المال لا تعامل الناس على أساس المواطنة ، بل تطالب أهل الكتاب منهم بما يسمى الجزية أو الخراج.. أما أصحاب الديانات الأخرى الغير سماوية فهم غير مطالبون بدفع أي شيء لان دمهم مهدور ومن الواجب إبادتهم إن رفضوا اعتناق الإسلام.." فَإِذَا انسَلَخَ الأَشْهُرُ الْحُرُمُ فَاقْتُلُواْ الْمُشْرِكِينَ حَيْثُ وَجَدتُّمُوهُمْ وَخُذُوهُمْ وَاحْصُرُوهُمْ وَاقْعُدُواْ لَهُمْ كُلَّ مَرْصَدٍ فَإِن تَابُواْ وَأَقَامُواْ الصَّلاةَ وَآتَوُاْ الزَّكَاةَ فَخَلُّواْ سَبِيلَهُمْ إِنَّ اللَّهَ غَفُورٌ رَّحِيمٌ " التوبة/ الآية الخامسة
بعض الأمثلة من عدم اعتراف الإسلام بالتعامل الأخوي مع الآخر..
" لا تبدأوا اليهود والنصارى بالسلام ، فإذا لقيتم أحدهم في طريق فاضطروه إلى أضيقه" رابط الحديث
" قَاتِلُواْ الَّذِينَ لاَ يُؤْمِنُونَ بِاللّهِ وَلاَ بِالْيَوْمِ الآخِرِ وَلاَ يُحَرِّمُونَ مَا حَرَّمَ اللّهُ وَرَسُولُهُ وَلاَ يَدِينُونَ دِينَ الْحَقِّ مِنَ الَّذِينَ أُوتُواْ الْكِتَابَ حَتَّى يُعْطُواْ الْجِزْيَةَ عَن يَدٍ وَهُمْ صَاغِرُونَ " سورة التوبة :29
عن ابن عمر رضي الله عنهما ، أن رسول الله صلى الله عليه وسلم قال : ( أمرت أن أقاتل الناس ، حتى يشهدوا أن لا إله إلا الله ، وأن محمدا رسول الله ، ويقيموا الصلاة ، ويؤتوا الزكاة ، فإذا فعلوا ذلك عصموا مني دماءهم وأموالهم إلا بحق الإسلام ، وحسابهم على الله تعالى ) رواه البخاري و مسلم
الشرح
بعث الله سبحانه وتعالى الرسل الكرام ، وأنزل معهم الكتب العِظام ، لينشروا الدين في أرجاء المعمورة ، فيكون ظاهرا عاليا على سائر الأديان والملل ، كما بيّن سبحانه ذلك في قوله : { وقاتلوهم حتى لا تكون فتنة ويكون الدين لله } البقرة
البند رقم 3
لكل فرد الحق في ممارسة الحياة والحرية والأمان الشخصي .
بالطبيعة كلكم تسمعو بالأمر بالمعروف والنهي عن المنكر.. ومسؤولية الدولة في تطبيق فتاويها المبشولة على المواطن ، و حشيان جعبها في حريتك الشخصية...
احمدو ربي على العلمانية إلي عطاتكم الحق في شرب كعيبات بيرة من غير ما تروّحو وترمكم حمرة بثمانين جلدة وإلا قدّاش... قال حرية قال..
البند رقم 4
يحرم الاقتناء والتجارة بالعبيد والتشغيل بالسخرة وكل أشكالها العلنية والمستترة ممنوعة .
اقتناء العبيد والمتاجرة بهم أمر مكفول شرعا للمسلمين.. بل إضافة إلى الاقتناء بمقابل مادي ، فمة مكان آخر ينجم يخطف فيه المسلم هايشة من الهوايش باش يخدم عندو والي هو ساحة الحرب ، والي فيها زادة النساوين متاع المحاربين المنهزمين ، صالحين للاستخدام الجنسي أو للعمل كجواري ، وفمة الصغار زادة ينجمو يصلحو كغلمان بعد ما يخصيوهم.. هذا وروي انه كان لرسول الله قرابة الأربعة عشر زوجة وعدد غير معروف من الجواري وسبايا الحرب أبرزهن "ماريا".. فضلا عن بعض الخدم..
البند رقم 5
يمنع ممارسة التعذيب ولا يجوز تعريض الفرد لعقوبات أو معاملة قاسية أو وحشية من قبل أي جهة كانت ولأي سبب كان..
جلد الزاني وشارب الخمر.. قطع يد السارق.. رجم المرتد.. و صلب الأعداء...
" إِنَّمَا جَزَاء الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الأَرْضِ فَسَادًا أَن يُقَتَّلُواْ أَوْ يُصَلَّبُواْ أَوْ تُقَطَّعَ أَيْدِيهِمْ وَأَرْجُلُهُم مِّنْ خِلافٍ أَوْ يُنفَوْا مِنَ الأَرْضِ ذَلِكَ لَهُمْ خِزْيٌ فِي الدُّنْيَا وَلَهُمْ فِي الآخِرَةِ عَذَابٌ عَظِيم "ٌ التوبة
الرجم ، قطع الأيدي والأرجل ، الصلب ، الجلد... هذي يسميوها عقوبات وحشية و مجودرة وبدائية تعتبر من ركائز التشريع الإسلامي..
البند رقم 16
للرجال والنساء من كل الأعمار التي تتجاوز سن البلوغ وبدون تحديد لأعراقهم أو جنسيتهم أو دينهم كل الحق بالتزاوج الطبيعي وتكوين الأسر. ولهم حقوق متساوية أثناء الزواج وبعد الطلاق
يعقد الزواج بموافقة الزوجين وبملء حريتهما دون أي منع خارجي أو إجبار .
الأسرة هي الخلية الرئيسية للمجتمع ويجب على المجتمعات والدول القيام بحمايتها والحفاظ عليها .
- بالطبيعة الإسلام أحل الزواج من الأطفال ( نذكرو مأساة عيشوشة والبنيات إلي جاو بعد عيشوشة نتيجة رغبة الكثيرين في الاقتداء بخير الخلق ).. من غير ما ننساو انو الإسلام احل أيضا بكل قلة حياء مفاخذة الرضيعة )
- الزواج في الإسلام يأخذ بعين الاعتبار ديانة المتزوجين و يضع العراقيل في ذلك..
- حقوق الزوج مش كيف حقوق الزوجة ، فالرجل يحتكر حق الطلاق ، و عندو الحق في الزواج بثلاث نساء أخريات ، وعندو الحق يضرب زوجتو و يهرب عليها في الليل و يخليها تصبعت وحدها.. كان بدات تلوج على شوية استقلال وحكم ذاتي..
- الفتاة ماتنجمش تتزوج بدون موافقة ولي أمرها ( خوها وإلا بوها..)
البند رقم 18
لكل فرد الحق في ممارسة حرية الفكر والضمير والدين وكذلك كل الحرية في تغيير دينه ومعتقده وله حرية التعبير عن دينه ومعتقده إما بشكل فردي أو ضمن جماعات علنا أو بشكل غير علني وممارسة الدعوة والعبادة والطقوس والشعائر .
- بالطبيعة حرية الفكر في الإسلام ما يلزمهاش تقرب على "الزون" متاع الدين..
أي محاولة اقتراب تعني تهديد حقيقي بالموت..
- ماعندكش الحق تبدل دينك.. يلزمك تعيش منافق تدعي انك تؤمن بالإسلام وأنت في حقيقة الأمر ماكش مقتنع بيه.. كونش يسموك مرتد ويطيرولك راسك...
" أتى علي رضي الله عنه بزنادقة فأحرقهم فبلغ ذلك ابن عباس فقال لو كنت أنا لم أحرقهم لنهي رسول الله صلى الله عليه وسلم لا تعذبوا بعذاب الله ولقتلتهم لقول رسول الله صلى الله عليه وسلم من بدل دينه فاقتلوه " رابط الحديث
- ممارسة الدعوة لدين غير الإسلام ممنوعة ، وهي حملة تنصير ، وحرب على الدين ، وابتغاء فتنة..
- ممارسة الطقوس والشعائر ممنوعة على غير أهل الكتاب.. هذا وشوف وشوف يخلّيوك تضرب الجرس متاعك كيف ما تحب وإلا لا...
البند رقم 19
لكل فرد الحق في حرية الرأي والتعبير عنه وهذا الحق يتضمن حرية اعتناق الآراء بدون تدخل خارجي وحرية البحث وتلقي وتوزيع المعلومات والأفكار بكافة وسائط النشر والإعلام .
البند رقم 21
لكل فرد الحق في استلام حصة في حكم وطنه إما بشكل مباشر أو من خلال ممثليه المنتخبين بشكل حر ونزيه .
لكل فرد نفس الحقوق في الحصول على وظيفة أو منصب عام في وطنه .
إن إرادة الشعب هي أساس سلطة الحكومة وهذه الإرادة يعبر عنها بانتخابات دورية ونزيهة وشاملة لكافة اتجاهات المجتمع وبنسب متعادلة وتنافس حر وتجري بواسطة الاقتراع السري أو ما يعادله من الإجراءات.
بالطبيعة الديمقراطية لا وجود لها في هذا الدين.. فالحكم هو من اختصاص الله لا الشعب...
و التاريخ يبرزلنا انو ما حصلش تداول على السلطة بغير السيف و الموس ودواء الفيران..
الديمقراطية تعني تداول على السلطة.. والله مش بالتواضع الكافي إلي يخليه يقوم من هاك الكرسي كان شدو في يوم من الأيامات.. منذ الأزل وهو قاعد فوق العرش يبعث في الصواعق والسخطات و مافدش.. علاش باش يفد كيف يلقى جماعة بهايم يحكمهم كيف حالنا نحنا ؟؟
البند رقم 27
لكل فرد الحق في المشاركة الحرة في الحياة الثقافية للمجتمع وأن يتذوق الفنون والآداب وأن يشارك في التقدم العلمي وتطبيقاته.
- فن التصوير حرام لأنو تشبه بالخالق.. والمصورين مطالبين يوم القيامة بإعادة إحياء ما رسموا..
فن الموسيقى حرام بإجماع جميع الشيوخ.. لكن بعضهم يجيز الإنشاد الديني وهو إنشاد لا يمكن أن نقول عنه إلا انه "معفّط".. لا يساهم إلا في تبلد الحس الفني عند لعباد..
- الآداب.. حلال ما لم يمس بالدين.. أو ولي الأمر.. وكلنا نستذكرو مأساة ابن المقفع.. وإلا تكفير نزار قباني.. وإهدار دم سلمان رشدي.. و منع آلاف الكتب الأدبية الأخرى..
- السطو على حق المواطن في الاطلاع على النظريات العلمية التي تتعارض مع الدين مثل نظرية التطور...
ونستذكرو لهنا الفتوى الشهيرة لابن "عثيمين" التي تكفر القائلين بكروية الأرض..
بغض النظر عن أي التشريعين أفضل للإنسانية..
نحب نفهم حويجة..
بالله يا منادين بدولة إسلامية.. تنجموشي تفسرولنا آش باش يكون مستقبل هذي الدولة لو ما وقعتش على هذا الميثاق لتعارضو السافر مع الشريعة ؟ تتوقعوشي الحالة الكارثية إلي باش نوصلولها في ظل العزلة عن العالم ؟ مزال يجيونا سياح هوما كيف يعرفو انو دولتنا تطبق قانون بدائي همجي وضعو واحد فاضي شغل قبل 1400 سنة ؟؟؟
أيا نخليكم توة واحد يمشي يرقد ، غدوة عندي بلعة على شاطئ قمرت..
:)
تجاوبا مع التدوينة الحمراء إلي بداها خونا بيغ تراب اليوم.. حبيت نقترح طريقة بسيطة نعبرو بيها على التضامن متاعنا مع قفصة وأهلها وقضيتهم المشروعة في الحصول على الحياة الكريمة والشغل ورفض التعامل البوليسي مع الاحتجاجات السلمية..
تتمثل هذه الخطوة في مساندة منتخب قوافل قفصة في مبارياتو القادمة متاع الكأس في كل المقاهي وقاعات الشاي وفي الملاعب زادة...
نعرف أنو الفكرة ساذجة شوية... أما علاش ما نعرفو نحشيو الكورة كان في السبان وفي الجهويات ؟؟
علاش ما نستغلوهاش في اهداف نبيلة أخرى ؟؟
(طبعا إلي تطيح جمعيتو مع قفصة مش مطالب بالخطوة هذي )
و كون الفريقي خرجت من الكأس.. نعلن روحي "قوافليست" بصفة رسمية...
قوافل عشرة ملايين حبيناها..
من كل بلاد رانا زرناها..
توووونس بالروح والدم نفديها..
والدنيا فانية وما يبقى كان مولاها..
..
المكان ... في إحدى المنازل في طور البناء ( بلاش سقف)...
بقعة إستراتيجية بعيدة عن الأعين... نظيفة برشة و محاطة بمشهد طبيعي تحفون..
نخليكم مع التصاور..
ياجورة..
كعبة بيرا...
وطرف حشيش..
مانتصورش فمة حاجة معبّرة أكثر من هكة...
مع السبعة ونص.. خذينا الفان "20".....
الشوفور شوية لا عدّانا للمركز بعد إلي أطلقنا الاحتفال العالمي
بفوز الإفريقي بالبطولة في وسط الكار..
هبطنا في اللاك وتعدينا لمقهى اللاكروازات الي تشوفو فيه في التصويرة...
vue ta7founa yesser…
أما كاس تاي بزوز دنانس...
خسارة معاها أمها...
البحيرة مكرّزة زادة... بقعة حمرا في الوسط..
تكسر اللون الأخضر.. والفاهم يفهم..
...
"باش يزيدو التفكير الإسلامي في الباك متاع عام الجاي".. هكذا قال لي أحد أصدقائي البارحة في جلستنا الموسعة في المقهى.. بين الحقيقة والإشاعة ، عدّى خوكم نهارو محطّم الأعصاب ، يستنى في تأكيد للخبر هذا أو نفيو ، نتمنى أنو إلي جاب الخبر هذا يطلع يحشي فيه على خاطر عكس ذلك يعني تحشالي...
عام السنا ، ورغم أني نقرا في شعبة علمية اختصاص رياضيات ، فرض علياّ فرضا باش نخسر كل أسبوع ساعة من عمري في سماع حكايات فارغة وماسطة أجمع جميع زملائي على مساطتها...
حصة التفكير الإسلامي كيما تعرفو ، هي أرزن ساعة عند التلامذة الكل على اختلاف توجهاتهم
أيا سيدي ، أكثر حاجة تخلي الواحد يكفر على الساعة هذي هي القيمة الزايدة إلي تحب تعملها الأستاذة لروحها.. بحيث حطّتنا في بقايع أول العام وقيدتلنا أسامينا ، وكل حصة تعمل دورة علينا كيف الذري باش تثـبّت من البقايع... والي ما عندوش كتاب يضرب إنذار مضمون الوصول على الصباح.. وهذا شي ماعملوش حتى أستاذ "المات" متاعنا...
من النماذج الأخرى للحول الفكري عند أستاذتنا الكريمة هي الزلعات المتكررة إلي تزلعهم في الحصة متاعها ، وباش نذكرلكم إلي نتفكر منها ،.. أيا سيدي ، مرة نقراو على وحدة القوانين والنواميس في الكون ، دارت بنت كلاسي قالتلها ، " توة احنا آش اكتشفنا من الكون ، كيفاش نجزمو بوحدة القوانين في كل المجرات... و احنا مزّلنا ما طلعناش للمريخ ؟ " ( السؤال هذا كان قبل ما تبعث الناسا المسبار "فينيكس" للكوكب الأحمر )... بغض النظر عن سذاجة السؤال ، تعرفو الأستاذة آش جاوبتها ؟
" وحدة القوانين.. معناها... شوف... هل من المعقول مثلا باش تشرق الشمس في الليل ؟؟ "...
أول حاجة عملتها ساعة كيف سمعت الكلام هذا هو أني دوّرت وجهي للشباك باش ما تصكنيش بإنذار ثالث سببه الضحك في القسم.. و ترصّيلي في طرد...
استوعبتو الحكاية ساعة وإلا لا ؟؟؟...أيا باهي....
الفازة الأخرى بعد ما عرفت أني ملحد ، دخلت للقسم كابسة روحها وتحب تشري الشبوك معايا ،
دارت قدام التلامذة وقاتلي :
- ما فماش واحد مش مؤمن راهو!! فمة إلي يعبدو ربي وهوما المسلمين.. والي يعبدو يسوع و الي يعبدو البقر والي يعبدو بوذا... والملحدين يعبدوا "لينين"...
- قلتلها ، علاش ، ياخي الملحد يعني شيوعي بالضرورة ؟
- قاتلي آش هزنا ياولدي للسنة والشيعة ؟؟؟
شديت روحي باش مانضربهاش بستوش... وكملت حواري :
- يا مدام.. نحكيلك على الشيوعيين كان سمعت بيهم ، وهوما جزء بسيط من الملحدين في العالم ، "اون +" عمرهم ماقالولك رانا نعبدو في لينين...
- مالا شبيه عاملينلو صنم ؟؟
- معناها أحنا نعبدو في بورقيبة ، والعراقيين كانو يعبدو في صدام ؟؟ هاو عندهم تماثيل.. وإلا أصنام كيف ما تقول أنت ؟؟
- أي وهالملحدين هاذم قداش فمة منهم في العالم.. ماهو أربع مهبّلة ( معناها زوز برك "بويسك" عندها المشكلة هاذي متاع النظر )
- علاش زوز.. في بالك إلي في دولة كيف السويد وإلا اليابان يمثلو نسبة أكثر من 80 بالمئة ؟؟ وكيما تعرف يامدام.. الدولتين هذم هم من اكثر الدول سلما اجتماعيا واستقرار اقتصاديا..و راهو مــ...
- باهي باهي .. سكّر القوس.. وما عادش تخرج على موضوع الدرس ما كانش نطردك !!!
بغض النظر عن النظرة الحولة متاع السيدة حوّالة هذي تجاه الملحدين ، جبدانـها الموضوع قدام التلامذة من أصلو هو تصرف غير أخلاقي.. على خاطر من المفروض أنها تشوف قبل... عندي استعداد باش لعباد كل تسمع أني غير مسلم وإلا لا !! من غير ما نحكيو على اتهامي بالخروج عن الموضوع وهي إلي حلّتو...
من هنا.. تلقاو إحصائيات حول نسبة الملحدين و اللادينيين في العالم... (رغم إلي اللادينين والملحدين متاع العالم الإسلامي محسوبين مسلمين )
فمة بالطبيعة برشة نماذج اخرى متاع حول فكري كيف "الشهداء أجسادهم تقعد لا باس عليها بعد مايدفنوهم".. و " مشط الشعر من اليسار يعمل القشرة".. والي مايتسعليش الوقت باش نذكرهم الكل...
* * * * * *
عام السنا.. ما طلعتش على 6 على عشرين في امتحانات التفكير الاسلامي.. والسبب متاع الشيء هذا هو انو عندي مشكلة كبيرة... كل حاجة نخمم فيها يلزم نقولها وإلا نكتبها.. وما نجم نقول حاجة كان كيف نبدا مقتنع بيها... ملي أنا صغير عندي الحكاية هاذي ، ورغم أني حاولت مرة في هذا العام باش نستعمل سياسة تنوفيقية بعد إلي ضربت واحد ونص في فرض المراقبة... مانجمتش نواصل ربع ساعة أخرى.. و دوّرتها " ولكن في المقابل..." وتحلّيت عااااد....
أستاذتنا الكريمة حبّت تهديني مسكينة ، تكسبشي شوية حسنات تضيفهم للخزينة المتواضعة متاعها ،
وفي وسط الساعة وانا متكي راسي نضرب في النوم ، عيطت وقالت : مروان !
هزيت راسي مفجوع.. نلقاها تغزر بتخوبيث... ربي يستر قلت لروحي...
توخّر وتقدّم..وتشرّع... وتجبد كتاب قول عليها جبدت موس ! وبدات تحكي بهستيريا.... "ريتو هذا يلزمك تقراها 5 مرات باش تفهمو...ههههه... إسمو مقاصد الشريعة.." .. بالطبيعة أنا ستنيت باش تعطيهولي "بويسك" جايبتو معاه.. عملت هكة وحشاة أمو في الصاك متاعها !! بالطبيعة هي أصغر من إعطاء أي حاجة لواحد مصنّف كعدو رئيسي للإله الراكش في السما الفوق..
في الختام... تواجد هذه المادة في الباك القادم يعني عام آخر من التكريز و النقاط المخصومة من المعدل..
والفكرة هاذي برجولية فكرة أكثر من مبشولة على خاطر ما نتصورش كان مهندس حاسوب مثلا باش يستحق الدين في خدمتو.. كونش باش يصنع مضاد فيروسات يخدم بالتعويذتين و آية الكرسي.. !!
ونحب نفهم علاش جماعة "التكنيك" مرتاحين من هذه المادة سواء كان السنا أو في الباك ؟؟؟
ياخي فمة علاقة معينة بين الرياضيات وفن الغباء ؟؟؟
بورجولية أمي حكاتلي حكاية وهاو باش نعاودهالكم... عاد ماهو بابا في السبعينات وقتلي كان يقرا في المعهد... كان عضو بارز في الحركة اليسارية هو وأمي... وكان يفد برشة على أستاذ الإسلامية ،
دخل مرة مكرّز من عند ربي وزاد لاخر خرى فيه بالبهامة والوقاحة.. يقوملو بابا يحشّم دين أمو على روحو غادي ..
أهم حاجة شديتها من الحكاية هي " العيب موش فيك... العيب فلي قراك وخلاك تولي أستاذ.. وراس بابا كان جيت في دولة أخرى راك مالقيتش كيفاش تلقّط خبزتك..."
هاو الكلام الصحيح ياولدي...
لا لتمديد البهامة للباكالوريا...
أيا نخليكم توة.. واحد يمشي يشري طرف ثلج و يحضّر كميتو.. ادعيولنا باش ما يكرفطوناش الحنوشة اليوم...!
دمتم بخير
...
ماتستغربوش من العنوان... للأسف ما لقيت حتى عبارة أخرى تنجّم تعبّر على ردة فعل أي شخص عادي تجاه هذه الصورة الكاريكاتورية إلي يرسمها الدين لخالق من المفروض يكون عظيم برشة وبعيييييييييييييد على أي وصف ساذج مثل هذا...
نظرة بسيطة على صورة الله في الإسلام.. تورّينا أني مجرد صورة مكبرة لملك من ملوك هذاكا الوقت... ومن المستحيل باش تعكس حقيقة هذا الإله...خالق الكون .
نبداو بالتكوين الجسماني لهذا الإله ، برشة آيات في القرآن تحكي على
وبغض النظر عن طبيعة الوجه وإلا اليدين الي عند خالق الكون.. إلا انو تواجد أعضاء في حد ذاتو يعني محدودية حجم هذا الإله... أي انو يخضع لقانون من المفروض انو هو من أوجدها.. فكيف يستقيم أن نقول أن الله لانهائي... ثم عندو وجه هنا ويدين غادي ؟؟
مش من المفروض يكون وجهو هو يديه ويديه هوما وجهو ؟؟؟؟ الحقيقة هو انو محمد عمرو ماقال انو الله غير محدود.. فلو كان غير محدود ، يلزم هاك الثمنية الملائكة المساكن إلي هازينلو الكرسي متاعو منذ الأزل يكونو غير محدودين في الحجم زادة هوما... أو يكونو غير محدودي العدد !! وكلنا نعرفو أنهم ثمنية برك ( ويحمل عرش ربك فوقهم يومئذ ثمانية ) ... و أحسن حديث يحكي على تركيبة جسم الله البشرية هو هذا " عن أبي هريرة أن النبي صلى الله عليه وسلم قال : إذا قاتل أحدكم فليتق الوجه فإن الله عز وجل خلق آدم على صورته "...
نجيو توة إلى تصرفات هذا الإله... فهو يغضب كيف نشرب كعبة "بوات" باردة.. ويفرح بتوبة عبدو ( لله أفرح بتوبة عبده من أحدكم سقط على بعيره وقد أضلّه في أرض فلاة ) البخاري ( 5949 ) في الدعوات : باب التوبة... و يتخوبث كيف العريبة تتخوبث معاه..( ومكروا ومكر الله والله خير الماكرين ) آل عمران / 54 ... ويفلّم قدام ملايكتو بريحة فم الصائم... و يحب يمدح روحو ويوري صفاتو.. يحب يكون هو المعبود وحدو لاشريك له.. وهذاكا علاش خلق العباد والعبابث (وماخلقت الجن والانس الا ليعبدون) ... نرجسي لأبعد الحدود ويحب يعذّب الناس... قادر باش يهديهم لكنه لايفعل ويخير التمتع بالتشوشيط ( ولو شئنا لآتينا كل نفس هداها ولكن حق القول مني لأملئن جهنم من الإنس والجنة أجمعين ) السجدة
تصيرلو نوبات متاع هيستيريا يولي يحكي وحدو...
" لمن المــلك اليوم لمن المـلك اليوم
لمن المـلك اليوم
فتجيب الذات الذات - أى فيجيب نفسه بنفسه
للـــه الواحد القــهــار " !!!
ماعندوش ثقة في روحو ويكبّش في حكايات فارغة... " عن أبي هريرة قال
قال رسول الله ما يأمن الذي يرفع رأسه في صلاته قبل الإمام أن يحول الله صورته في صورة حمار " رابط الحديث ...
ينتقم من إلي اصغر منو ويعمل عقلو من عقل عبد صغير قول فكلو رزق بوه..
{ يوم نبطش البطشة الكبرى إنا منتقمون }.... الخ
باش نلخصو توة الصفات عند الإله هذا نلقاوها صفات معروفة عند الملوك وعند البشر بكل بساطة...
التكبر... النرجسية... حب الذات... الغضب... الفرح... الحزن ( اهتز عرش الرحمن لمقتل سعد بن معاذ ) ... الانتقام... الخ
وحاجات كيف الفرح والغضب والحزن.. كلنا نعرفوا أنها من صنع الدماغ البشري وإلا الحيواني وأنها مربوطة بإفرازات دماغية معينة و فمة طرق كيف التخطيط الكهربائي تكشف الحكاية هاذي... إذن شنية آلية حدوث هذه التصرفات عند الله ؟؟؟؟
كيفاش الله الغير مادي يكرّز نحب نفهمها هاذي ؟؟؟؟
نجيو توة للتشابه الكبير بين الملوك وبين الله في طريقة تسييرهم للشؤون وفي صورتهم العامة...
1/ العرش
الله عندو عرش.. وكأن الملك لا يكون إلا إذا كان له عرش أو كرسي شأنو شأن كل الملوك في ذلك العصر... على هذاكا اهتم محمد بذكر حجم العرش و موقعو فوق روسنا قد قد في أعلى سما...
" و يحمل عرش ربك فوقهم يومئذ ثمانية " الحاقة
" الرحمن على العرش استوى " طه
" أذن لي أن أحدث عن ملك من ملائكة الله عز وجل من حملة العرش ما بين شحمة أذنه إلى عاتقه مسيرة خمسمائة عام أو قال: خمسين عاما " حديث صحيح
بغض النظر عن هذا التصور الساذج للإله الجالس فوق كرسي كبير يهزو فيه الملايكة...
بالله جاوبوني.. ياخي الإله يحتاج للجلوس هو من أصلو ؟؟ ياخي يتعب من الوقفة وإلا شنوة ؟؟؟؟ آش يعمل بيه الكرسي ؟؟؟؟؟؟ وعلاش يهزو فيه الملائكة ؟؟؟؟؟؟ فمة جاذبية هي الفوق ؟؟؟؟ يهزو فيه من شنوة ؟؟؟؟ ريق بارد وراس أمي...
2/ الجنود والنخبة
الله هذا عندو برشة جنود يقدسوه ويطيعوه طاعة عمياء.. والي هوما الملايكة ، يبعثهم ربي في الأوقات الحرجة كيف تلحم بين الكفار والمسلمين ، يبلغ عددهم حسب ماحكالي صاحبي - إلي شوية لا ضربتو بشلبوق نهارتها- " عدد قطرات المطر + عدد اوراق الشجر"... الجنود هاذم فيهم طبقة مميزة إلي هوما النبلاء وإلا لحاشية المقربة كيف ما جبيرل وميكائيل واسرافيل.. جبيرل هذا هو الممثل الشخصي أو الناطق الرسمي للملك ، يلعب دور الرسول بين السماء والارض ، قال عليه ربي في الخواطر متاعو "ذي قوة عند ذي العرش مكين { 20 }التكوير... وحسب ما وردنا من النبي كيف جاه في غار حراء انو عندو 600 جناح.. ( بورجولية ماريتش شجاعة كيف متاع محمد.. كان جيت أنا راني فصعت والا دخت غادي.. مش بقيت نحسب في الجوانح )
ميكائيل هو المسؤول على الماء والزرع والمنح الإلهية... وفمة زادة كتّاب الدولة ، والموظفين متاع التدوين والأرشيف .." كراما كاتبين" الانفطار... يكتبو على وراق "داكتيلو" وبستيلوات "حبار"... "رفعت الأقلام وجفت الصحف "...
3/ السطوة الرهيبة
الملك هذا يفجع "بالكاريزم" متاعو... كيف يتحرك الجنود تبدى تمشي وراه صفوف صفوف.. " وجاء ربك والملك صفا صفا "الفجر/22... وحتى واحد ما يحل فمو في حضرتو.." يوم يقوم الروح والملائكة صفا لا يتكلمون إلا من أذن له الرحمن وقال صوابا" النبأ / 38
4/ البشر والعباد
وهو كيفو كيف أي ملك عندو عبيد وإماء يتكاثرو في ملكو، وينعم عليهم من النعم متاعو... والي "يبوجي" منا وإلا منا وما يسمعش كلامو... أمو تـ****اك... والي يقعد رايض يكافؤو بالزقايط وانهار الشراب وبشتى النعم...
والملك هذا زادة... -كيفو كيف أي ملك آخر- عندو ساعة إجابة يقبل فيها الدعاء (وقتلي يبدا زاهي) و إلي يسالوا حاجة يعطيهالو ( ساعة يوم الجمعة و ليلة القدر )...
هو الخير والحكمة والعلم والرحمة وغيرها من الصفات إلي يوصف بيها ربي روحو... ونفس الصفات هذي كانو شعراء البلاط يستعملوها باش يدبرو زوز سوردي
حق بلعة نهار السبت..
استكمالا للصورة هاذي.. بقى دور المنشقّ من القواد النبلاء ، وإبليس كان من الطبقة الراقية متاع الملايكة لكنو رفض باش يسجد و يطيّح قدرو قدام واحد زوالي مخلوق من الطبعة...( إلي هو آدم )..
فسجد الملائكة كلهم أجمعون (73)
إلا إبليس استكبر وكان من الكافرين (74)
قال يا إبليس ما منعك أن تسجد لما خلقت بيدي أستكبرت أم كنت من العالين (75)
قال أنا خير منه خلقتني من نار وخلقته من طين (76) الأعراف
وانشق عن الملك بسذاجة مفرطة ، على خاطر الحكاية كانت مدبّرة ومخطط لها كيف ما عمل الملك نفسو مع آدم وقتلي قالو " ريتها التفاحة هذيكا.. تمسها نغلط معاك"
و علاش حطها غادي من اصلو هالتفاحة... وزاد حط معاها الشيطان.. هو وحدو يعرف !!!!
تي عادا بعد ما انشق هالبليس هذا.. ربي ماحبّش يقتلو و إلا يحبسو و كان ينجم يعملها ، بالعكس .. قالو برى امشي إنت و ياه يا سي البطل فضوها لوطة في الأرض ونقصولنا من الحس والخوضة في محلي...
والصراع هذا يفكرني بالصراع حتى الموت إلي يصير قدام ملوك الروم بين زوز زنوج والملك شايخ ولا يأمر بوقف القتال...
وفي الأخير.. الملك يحشي القائد المنشق والشلة متاعو والعباد إلي تبعوه في جهنم باسم التخلص من الشر واقامة العدل...
" قال اخرج منها مذءوما مدحورا لمن تبعك منهم لأملأن جهنم منكم أجمعين" / 18
وكيف ما قال بن كريشان... " لا يمكن ان تكون أنت الاهي... أبدااااا "
تسقط البهامة...
...
اليوم لولاد باش نحكيلكم حكاية مش نرمال ، حكاية كان حكاهالنا أي طحان آخر راهو شدينا ترّمناه بتهمة نعتنا بالغباء بطريقة غير مباشرة .
" أيا سيدي قالك فمة واحد اسمو ذي القرنين ( بزوز قرون معناها ) ، ربي عطاه القوة والقدرة وعلالو مكانتو في هالأرض... عمل هكا وشد صحيبنا الثنية لمغرب الشمس إلي ما وصللها حد من قبل ، لعباد يشدو فيه وأمو تندب فيهم ، يا وليدي يهديك فاش تعمل ، شي ! قالك ماشي ماشي ..
هو هكاكة ، وبفضل التمكين الإلهي ، وصل في ظرف نهارين ، عاد يلقى الشمس تغطس في عين سخونة ويلقى جماعة غادي طاح يفلّم عليهم..
شرب كاس تاي وقال " نحنا صرفنا صرفنا... برى نعملو تنقيزة لمشرق الشمس " ، وكانلو آش حب ، والمرة هاذي يلقى جماعة مساكن تشرق عليهم الشمس مباشرة من غير حتى شي يحميهم من التشوشيط.. !
صاحبنا جعبو تحل.. قال برى خلينا نكملو نعملو طلة على قوم اخرين يحكيو عليهم يقاسيو مساكن ، شد الثنية وبدى يمشي يمشي يمشي يمشي..... لين وصل لمبتغاه.. يلقى جماعة بهايم غادي قالولو راهو فمى زوز ولاد حرام اسمهم يأجوج ومأجوج عاملين فينا يا خويا.. بورجولية تنجمشي تبني حيط بينا وبينهم ؟ ، قاللهم باهي اما جيبولي الماتريال ساعة ( حديد و النار الي تنفخوها انتوما وشوية ماء من عند خوكم ).. كملوشي بناوه هالحيط ، قاللهم راهو هذا باش يتهد يوم الساعة وباش يهدو عليكم جماعة يأجوج وباش ******كم أمكم... ما قالو شي مساكن ،و دوّر خونا ذي القرنين ظهرو وشد "الاوتوروت" لبلادو... "
وحكايتنا طابا طابا.. وعام الجاي تجينا صابـ... ستنى ساعة ! نسيت ! أما عام الجاي ؟؟ محمد مات عندو 1400 سنة !! وحرق الفيلم علّي كان مبرمج باش يستبله الخلق وقت الي قاللهم "راني آخر نبي" !!!
تي موش مشكل.. هاو عندي مصدر رائع من الخرافات الشبيهة لهذي من عند مماتي - ربي يشفيها- ، وكي تجي تشوف خرافات مماتي أكثر منطقية من النكت البايخة إلي نسمع فيها كل يوم من عند المسلمين...
نرجعو لميضوعنا ، بالطبيعة الأخطاء العلمية في القصة المذكورة واضحة برشة وما تستحقش باش نظهروها ، أما ميسالش كان نزيدو نوضحو للي فهمو رزين شوية... وقبل كل شي .. اقراو من الآية 83 الى الآية 99 من سورة الكهف.. وفيها تفاصيل القصة هذي..
أولا
بلوغ مغرب الشمس او مشرقها
هذا مستحيل علميا بحكم انو لا فما مشرق ولامغرب !! لأنو الأرض كروية وغير محدودة بجانب شرقي وجانب غربي كيف ما يشوفها واحد عايش قبل ألف سنة في بالو الأرض مسطحة... إذن ، كيف نقولو بلغ مغرب الشمس – البلوغ يعني تمام الوصول- فهذه سقطة علمية كبيرة لا يمكن تأويلها...
ثانيا
غروب الشمس في عين حامية
واضح ياسر انو لفظ "حامية" جاء كربط مباشر بين نزول الشمس في الماء ، لأنو الشمس سخونة وبالتالي باش تسخن الماء معاها... والشمس هاذي يسكن "عندها" قوم أي "حذوها"... بالطبيعة الكلام هذا ما يستحق أي تعليق وفرخ صغير متاع ابتدائي يعرف انو الشمس اكبر من الأرض بمئات المرات ويعرف انو ما فمى حتى تواصل مباشر بين الأرض والشمس ، وانو غروب الشمس هو أمر نسبي بالنسبة لينا نحنا بحكم دوران الأرض...
ثالثا
بلوغ المشرق.. والاقتراب من الشمس..
هذه الآية تدعم الاستنتاج السابق انو محمد كان يعتقد انو الأرض مسطحة... وأنها محدودة الأطراف وبما أنها كذلك فهذا يعني انو فمة بقعة "كالكو بار" تطلع منها الشمس... والبقعة هاذي يسكنو فيها ناس -منهم للشمس- وهذاكا علاش قال "لم نجعل لهم من دونها سترا"...
توة نعرف أنكم باش تمشيو تجريو للمواقع الإسلامية باش تشوفو الرد على هذه "الشبهة"... وأنا نقلكم ما غير ما اتعبوا رواحكم.. الردود متاعكم عندي إجاباتها الكل ، والي يحب يجرب ينجم يكتب تعليق لهنا وأنا نوريك فيه..
وفي الأخير.. ما فيها باس كان نثريو الموضوع بشوية أحاديث نبوية توضح القصة هاذي كونو أحنا سنة ومن أتباع المذهب السني الحنيف..
59613 - هل تدري أين تغرب هذه ؟ قلت : الله و رسوله أعلم . قال : فإنها تغرب في عين حامية
الراوي: أبو ذر الغفاري - خلاصة الدرجة: إسناده صحيح على شرط مسلم - المحدث: الألباني - المصدر: السلسلة الصحيحة - الصفحة أو الرقم: 2403
41550 - هل تدري أين تغرب هذه ؟ قلت : الله ورسوله أعلم ، قال : فإنها تغرب في عين حامية
الراوي: أبو ذر الغفاري - خلاصة الدرجة: إسناده صحيح - المحدث: الألباني - المصدر: صحيح أبي داود - الصفحة أو الرقم: 4002
85551 - هل تدرون أين تغرب هذه ، تغرب في عين حامية
الراوي: أبو ذر الغفاري - خلاصة الدرجة: صحيح - المحدث: الألباني - المصدر: صحيح الجامع - الصفحة أو الرقم: 7026
وتوة نحب نسإل سؤال :
انتوما ديما تقولو انو عصرنا هذا هو عصر ضعف في اللغة العربية... وانو عصر محمد هو عصر قوة في البلاغة لهذا لعباد آمنوا بيه كيف قرا عليهم شوية قرآن... بااااااااااااهي شبيه المفسرين القدماء فهموا الآية كيف ما هي ، واضحة وضوح الشمس وما بداوش يحاولوا يتهربوا ويتفلسفوا كيف ما يعملوا رجال الدين توة ؟ تعرفوا خير منهم ياخي ؟ ماهو هوما أقوى منكم في اللغة عاد وعايشوا السلف الصالح والصحابة ؟ علاش تحبونا نصدقوكم انتوما ؟؟؟
وشفتو الحكاية هاذي... راهي كيف مثيلاتها.. محمد ما جاب شي جديد.. كلو مسروق من الجاهلية ومن الأديان الأخرى.. وشوفو "أمية بن صلت" كيف حكى الحكاية هاذي قبل ما يخمم عبد الله باش يجيبلنا خير الخلق...
قال أمية بن أبي الصلت عن ذي القرنين
بلغ المشارق والمغارب يبتغي أسباب أمر من حكـيم مرشد
فرأى مغيب الشمس عند مآبها في عين ذي خلب و ثأط حرقد
وفي الختام بجاه والديكم ركزو مع الحديث هذا :
" حدثنا محمد بن يوسف حدثنا سفيان عن الأعمش عن إبراهيم التيمي عن أبيه عن أبي ذر رضي الله عنه قال قال النبي صلى الله عليه وسلم لأبي ذر حين غربت الشمس أتدري أين تذهب ؟ قلت الله ورسوله أعلم قال فإنها تذهب حتى تسجد تحت العرش فتستأذن فيؤذن لها ويوشك أن تسجد فلا يقبل منها وتستأذن فلا يؤذن لها يقال لها ارجعي من حيث جئت فتطلع من مغربها فذلك قوله تعالى و الشمس تجري لمستقر لها ذلك تقدير العزيز العليم "
صحيح البخاري .. كتاب بدء الخلق .. باب صفة الشمس و القمر
رابط الحديث
كيما قاعدين تقراو... محمد قالكم راهو كيف الشمس تغرب لهنا... راهي ماهيش شارقة عند الأمريكان و إلا الكوبيين... راهي مشات تعطي في حق ربي تحت العرش... مشات تصلي يا دين الرب !!
معناها فمة ليل واحد ونهار واحد... بكل بساطة... تصدقوا العلم وإلا الخزعبلات هاذي ؟
للأسف... نعرفكم باش تصدقوا الخزعبلات هاذي.. و اللازمة ... كان يطلعلكم محمد بذاتو يقلكم " يا عباد راني نحشي فيه عليكم... يزيو من البهامة..." اتو تسميو بسم الله وتقيمو عليه الحد...
يا أمة قد ضحكت من جهلها الأمم...
( بالمناسبة ..نهدي النفحة "التسطيكية" هاذي للزميل العزيز "تيتوف"...)
نراوكم بخير..
في هذا المقال ، حبيّت نطّرق إلى مسألة مهمة جدا ديما نرا فيها في وجهي على كل مقال يكتبو واحد رفض باش يبقى على ملة والديه . المسألة هاذي هي التعليقات والردود الي تاخو صبغتين لا ثالث لهما :
- سباّن وكلام زايد و تبوريب على صاحب الرأي المسكين .
والا
- تساؤلات اقل حدة من قبيل..
يا ولدي اش مدخلك في المعتقد متاعي ؟ سيبلي ديني ؟ كل واحد و عقيدتو.. انت شي همك ؟
العنصر الأول ما عندي فيه ما نقول ، لأنو راجع بدرجة أولى للتربية والأخلاق للشخص وهي إلي تحدد كيفية تعاملوا مع العباد ، الضرب كلوا على مسالة آش يهمّك ، وكأننا ولاد صغار في حضانة ، قام فرخ مالفروخ عطا " شلبوق" لفرخ آخر وفكلو لعبتو ، الفرخ المعتدى عليه حل فمو باش يحتج ، دارلو الفرخ الجعبون وقالو "آش يهمّك"..
بصراحة لا أرى فرقا أبدا بين الحالتين ، لأن الدين في جوهره وللأسف ليس علاقة خاصة بين العبد وخالقه كما يصوره العلمانيون ، إنما هو منظومة شاملة للتعامل مع الآخر ومع الدولة ومع الحياة ككل ، وبالتالي فهو يمسني ويمس والدياّ زادة ، و يمس بنت جاري إلي لبسوها - خيمة كحلة- زورا وبهتانا ، باختصار يمس المجتمع ككل...ويمس الوطن متاعي ومستقبلو..
من أصول النقد العلمي والمنطقي هو عدم الخضوع "للمقدس" ولا للغيبيات المزعومة ، معناها من حقنا عندما نتحدث عن الدين أن ننظر إليه من جانب علمي ومنطقي تحليلي للحصول على النتيجة المطلوبة وهذا يطّلب مساحة معتبرة من حرية التعبير تحترم الرأي المخالف مهما كان..
وباش نوضّح توة من 3 منطلقات علاش عنا الحق باش نحكيو على دينك من غير ما سيادتك تكرّز وتبدى تسكّت فينا كيف الذري..
أولا من منطلق وطني
كلنا نعرفوا أن الأحزاب الدينية عندها قبول عجيب في أوساط الشعب بحكم العامل العاطفي الكبير إلي يخلي المسلم يختارها دون غيرها ، وبالتالي فان دخول مثل هذه الأحزاب في الانتخابات تعني كارثة بأتم معنى الكلمة رغم انو ما وصلناش للمرحلة هاذي جاب ربي ، أما تنجمو تتوقعو النتيجة بعد المأساة إلي شفناها في الكويت والمأساة في الجزائر .
ما نيش باش نتحدث عن الكارثة الكبرى إلي باش تصير عند قيام دولة دينية لأنو على ما يبدو كلكم تعرفوا تبعات مثل هذه الخطوة على الاقتصاد وعلى الديمقراطية والمرأة وحقوق الإنسان وكل ركائز الدولة الحديثة..
لكن حبّيت نقول انو البعض من العلمانيين المسلمين – حلوة علماني مسلم هذي - يقول انو الحل يكمن في عدم الترخيص للأحزاب الدينية في العمل وهو حل تتبّعو تونس الآن ، هو حل ناجع مبدئيا لكن عندو انعكاسات أخرى خطيرة تتمثل في كسب مزيد من تعاطف العامة مع هذه الاحزاب فضلا عن التجاء هذه الأخيرة للإرهاب والعنف للحصول على السلطة ، و الشيء هذا ما يخفى على حتى حد في هذا العصر التعيس ، إذن ، يلزم حل آخر موازي للحل الأول ، وهو الدعوة "اللادينية" او "الالحادية" والحل هذا مكفول من كل مواثيق حقوق الإنسان الدولية كونو يندرج تحت عنوان حرية التعبير والفكر ، وكيما المسلم يعطي لروحو حق استبلاه الناس والضحك على ذقونهم الكريمة تحت شعار الدعوة الإسلامية ، فلنا الحق أيضا في القيام بدعوات مضادة ولو أنها تنويرية عقلية تعتمد على المنطق مش إستبلاهية كيف سلعتهم... هنا تكمن المفارقة أعزائي ، هل سيوافق المسلم على حقك هذا ؟
طبعا لا.. فهو مخلوق من الصنف الجعبوني الملكي ، وخير من خلق ربي كل ، وهذاكا علاش يرى انو من حقو باش يمارس "الدعوذة" متاعو في الدول الغربية بكل حرية ومن غير مزية زادة ، بينما يسمي الدعوة للمسيحية في بلاده بـ " حملة تنصير " تستوجب التصدي وزج القائمين عليها إلى السجون إن لم نقل إلى القبور...
إذن.. فالمنطلق الوطني الذي حدثتكم عنه هو توعية الناس بحقيقة الدين.. الغطاء الوحيد للحركات الإسلامية ، ونزع هذا الغطاء يعني القضاء شعبيا على هذه الحركات ، بينما أن نقد الحركات الإسلامية في حد ذاتها لن يؤدي إلى شيء طالما أنها تستتر بهذا الدين...
ثانيا من منطلق إنساني أخلاقي بحت
عندما تعلم أن هناك من يعيش حالة وهم عميق ، مسلوب الإرادة والذوق والاختيار ، يقرر حياته ويسطر عليها شخص عاش قبل 1400 سنة ، فمن واجبك حينها أن تحاول توعيته مثلما يحاول هو هدايتك ، انت توعّي من هنا وهو يهدي من غادي.. ينشأ نقاش حضاري بيناتكم تكون الغلبة فيه لمن حجته أقوى... فمّى عيب في الحكاية هاذي بجاه والديكم ؟؟ شبيكم تعقدو فيها بشرة ياخي ؟؟؟
ولو انو المقارنة هنا غالطة شوية طالما أنو التوعية متاعك هي فقط لصالح هذا الشخص المحروم من كأس وسكي مع صاحبتو ، وليس لأي منافع شخصية أخرى من قبيل الحور العين و القصر الي بيبانو ذهب وقدامو بركة متاع شراب وعسل...
وأخيرا... يا خويا اقراو هالثلاثة بنود متاع ميثاق حقوق الإنسان !!
البند رقم 18
لكل فرد الحق في ممارسة حرية الفكر والضمير والدين وكذلك كل الحرية في تغيير دينه ومعتقده وله حرية التعبير عن دينه ومعتقده إما بشكل فردي أو ضمن جماعات علنا أو بشكل غير علني وممارسة الدعوة والعبادة والطقوس والشعائر.
البند رقم 19
لكل فرد الحق في حرية الرأي والتعبير عنه وهذا الحق يتضمن حرية اعتناق الآراء بدون تدخل خارجي وحرية البحث وتلقي وتوزيع المعلومات والأفكار بكافة وسائط النشر والإعلام.
البند رقم 20
لكل فرد كامل الحق بحرية إقامة وحضور اجتماعات وتكوين تنظيمات سلمية أو الانضمام إليها.
لا يجوز إلزام أحد على الانتماء إلى أي تنظيمات أو إجباره حضور أي اجتماعات.
اش يهمكم فيا فاش نكتب يا خويا ؟؟ تراو انو كلام سخيف و تافه ؟؟ مش لازم تقراو.. ساهل برشة
ياخي هزّيت "هو بارلور" أنا وبديت نعيّط كيف ماتعملو انتوما كل صلاة جمعة ؟؟ مادام عندك إمكانية عدم سماع أو قراءة ما أفكر فيه مش لازم تكرزونا بالكلام الفارغ وشوفوا حاجة أخرى اعملوها...
Scodento
أيا قلنا السلام عليكم ، بعد ما كمّلت امتحاناتي أخيرا و تفاضيت شويّة ، قررت باش نحشي روحي في ها الجو التدويني الرائع الي عندي مدة وانا نتابع فيه بصمت بعد ماكانت لي تجربة سابقة مع "مكتوب" . التجربة هاذي علمتني أنو صعيب برشة باش تتعايش مع عباد يختلفو معاك جذريا في طريقة تفكيرهم ونظرتهم للامور فضلا عن بعدهم عن الواقع والمحيط الي تعيشو انت .
اول مادخلت كنت فرحان ومتشجع بالحضن العربي الي باش نلقاه ، وطلعت غالط بالطبيعة طالما انو افكاري ما تروقش لبرشة ناس ، خلي عاد طلعت عميل للمخابرات الغربية و الصهيونية.. اكهو عاد ، غادي وين تحامات فيا الجماهير يحبو يطردوني...
وبناء عليه قررت باش نولي تونسي متطرف نغزر لبلادي ونكتب كان بلهجتي هذا اولا..
وثانيا... الانضمام الى "بلوغ سبوت" طالما انها تشكل مناخ حرية حقيقي لا يعترف لا بخط احمر ولا قزوردي.. من غير ما ننساو الثراء الفكري الواضح للأقلام هنا على عكس الكثيرين هناك.. وحسب ما ريت ، انو اغلبية المدونين التوانسة والعرب هم من اولئك الذين يحترمون عقولهم وما يفكروش بمؤخراتهم...
كلامي هذا ما يعنيش اني نادم على تجربتي ، بالعكس ، كانت محطة رائعة تعرفت فيها على برشة ناس محترمين ، اما للاسف ، مانجمش نقعد تحت رحمة الادارة وحملات اخوتنا الاقصائيين.. وكل يوم وانا مفجوع بتنبيه والا بتهديد بحذف شقايا وتعبي بقرار اخرق قد يتخذ في أي لحظة..
قبل ماننسى ، اسمي مروان ، عملت 18 مؤخرا وعام الجاي باك مات – تعيش وترحم- .. نسكن جيهة كارفور.. كلوبيست بيانسور ، عضو منذ سنتين في منتدى الملحدين العرب وما نؤمن بحتى ****** (حاشاكم) قال على روحو نبـي..
نحب المطالعة والنت والكرة والسباحة والبيرة كيف تبدى باردة... ونكره التسوقيط والبهامة..
نتمنى باش نكون في المستوى و ما نضيعلكمش وقتكم بتدوينات مبـ** لة
نخليكم توة على امل اللقاء في تدوينتي الأولى...
...
