ها قد فعلها الرجال..
شكرا للمقاومة اللبنانية العظيمة التي أكدت مجددا أن الانتصارات لا تُسطر بغير البنادق..
إذا حكيت بالألماني مع فرخ ما يعرف كان العربية ، كون واثق انو باش يقعد مبهم فيك و مش باش يفهمك..
وممكن حتى يعطيك طريحة .
إسرائيل دولة لقيطة نشأت بالقوة ، وتربت على القوة ، و عاشت بالقوة...
إذن ،
فهي لا تفهم غير لغة القوة..
المفاوضات بدون أوراق ضغط على الأرض هي حكاية أكثر من "بيدونة" لن تؤدي إلا لمزيد من الذل وضياع الحقوق..
نتمنى على العرب ( ضحايا الصحوة الإسلامية خصوصا ) باش يفيقوا على رواحهم ويتوقفو على الصيد في الماء المعفن متاع الطائفية..
كما أتوجه " لمثقفي" العصر الجدد ، منظّري فلسلفة الانبطاح ، بأحر التعازي لسقوط آخر معاقل نظريتهم التعيسة المرتكزة على شعار "رفع الأرجل حتى النصر"...
ونقلهم راهو كان باش تواصلو هكا ، من الأحسن تحجزوا بقعة من توة في مزبلة التاريخ إلي باش تلمكم كيما لمت غيركم في دول العالم إلي عانت من الاستعمار ومنها فرنسا والفيتنام والجزائر...
تحية كبيرة ومن الأعماق للقائد العظيم حسن نصر الله...
و للشهداء التونسيين الثمانية..
و إلى كل المحررين ،
الأحياء منهم والمنتقلين إلي عالم الفناء..
عاشت المقاومة ،
عاشت الحرية..
..
6 التعليقات:
تتمتع بشجاعة كبيرة برشى، أما خسارة في انتقاد الدين والتمسخير علّي خلقك، على الانبياء و الرسل و على القرآن
وأنا نتحداك ونتحدي ألف من أمثالك كان تنجم تنتقد الحاكم بنفس البراعة الّي تنتقد بها في الدين و في المتدينين بصفة عامة في الوقت الي تقول عاشت المقاومة عاشت الحرية و هذه ازدواجية ذكرتني بالعالم الغربي و تعاملوا مع قضية المحرقة اليهودية و قضية الرسوم الكاريكتورية الّي يعتبروها حرية متع تعبير في الوقت الّي كان فمّا صحافي يتجرأ و يكذّب قضية المحرقة يطردوه من خدمتوا و تولّي معاتش فمّا حرية تعبير
تعرف شكونهم المقاومين، المقاومين هما نفس الأشخاص الي تسخر منهم إنت وعدد من زملائك على اعتبارهم ناس متعصبين في الدين و متزمتين و مكبوتين في الوقت الي الناس هذوما بذلو الغالي والنفيس لتحرير أرضهم و ضحّاوا بأنفسهم ومرّغوا أنف المحتل بالتراب و رفعوا رأس العرب و المسلمين وراسك إنت زادة في فلسطين و العراق و أفغانستان و الشيشان لأنهم اعتقدوا بتلك الأفكار و إلاّ كيفاش واحد يفجّر روحو إذا كان ما يخمم كان في الشرب و الماكلة و الرقاد كي الحيوان في الوقت الّي الحكام العرب (كلاب بوش) تخلاو على هالدول بل و ساهموا في إحتلالها و قاعدين يحبسوا في المدينين دون ذنب و يقعّدوا فيهم على الدبابز لمكسرة لا لشيء حتى يرضّيوا بوش الكلب و بالتالي يضمنوا شوي سنين أخرى في السلطة باش يسرقوا و ينهبوا أكثر أموال الشعب
التدين حاجة ما تساعدش السلطة، تعرف علاه ؟ على خاطر تخلّي العبد يطالب بحقوقو بقوة أكثر و ياقف في وجه الدكتاتورية الي كل هدفها احتكار السلطة و تجويع الشعب والهاءو بأي شيء حتى يبقى ديما في تبعية للحاكم وهذي سياسة مدروسة مت تكويرة في البطحة (التقليل من الملاعب العمومية للشباب خاصة في الأحياء الشعبية) و عدم احترام الجيران و المشاكل الي تنجر عليها حتى نوصلوا للزنا و السرقة و الرشوة والربا و حتى جرائم الإغتصاب، سياسة محكمة لالهاء المواطن قدر الإمكان و إشغاله بكل شيء و حتى يدور الدولاب في البلاد و تكثر المشاكل و الناس الكل تخدم، المحاميين و الطبّا و البوليسية و الصبيطارات أما الإسلام و التدين ما يساعدش، الناس الكل محترمة أرواحها و كل واحد شادد ببّوشتوا مثال بسيط على ذلك في أيام حكم طالبان تم القضاء على الرشوة مثلا الي يستحق خدمة يخدم والي ما يستحقش ما يخدمش الى جانب تطبيق العدل على كل الناس مشات طالبان و جات حكومة كرزاي عميل أمريكيا رجع كل شيء كيما كان ورجعت نفس المشاكل للأسف و يتمناوا توا يرجع حكم طالبان، مش قتلك سياسة متّبعة في كلّ الدول الإسلامية و بتشجيع من الغرب بصفة عامة و أمريكيا و من وراءها الصهيونية بصفة خاصّة. بالنسبة لموضوع المرأة، الاسلام هو الدين الوحيد الي كرّم المرأة و أعطاها حقوق في الوقت الي ديانات أخرى تهين فيها كيما في الغرب مثلا نادوا بتحرير المرأة و بالإباحية، يقول القائل ناس شبعانين من الناحية الجنسية لكن بالعكس اتصور الي ماهمش قادرين يبيعوا علبة كبريت وحدة الا ما يحطّّوا عليها تصويرة مرا عريانة معناتها المرأة عبارة على بضاعة و غيرو و غيرو، المرا حاجة راقية و حاجة فينو و لذلك الإسلام كرمها بلزوم بيتها (إلا في حالات قصوى تخرج فيها للعمل) باش تربي أولادها و تتفرغلهم كامل الوقت مش باش تقعد تجري عل الكار و هذا ادزها و لاخر يسمعها كلمة و من بعد تروح للدار تاعبة ومش متفرغة ليهم قلبها معبي على راجلها وفي اللحظة هذيكة يكون التأثير مش على العائلة هذيكة برك أما على المجتمع بصفة عامة و للأسف هذا آش قاعد يصير و هذا هدف الحكومات العلمانية تخريب المجتمع دينيا و أخلاقيا و جعله لا يفكر إلا بذلك المهم يبعد على الحاكم و ما يفكرش باش يحل فمو.
الأم مدرسة، إذا أعددتها أعددت جيلا طيّبا
kاهلا بيك خويا "والوس"
ما نعرفش علاش حاسك تهز وتنفض !
كليتني بالحديث يا خويا!
تراه خنحاول نلقط نقاط واضحة من ردك ونحكيو بالهدوء بالله راسي يوجع و لاهي بالمخيم الي باش تعملو الشلة متاعنا في البحر نهار السبت .
في مايخص نقد الحاكم :
ياخويا تفضل انت ورينا براعتك
اعمل مدونة - انجم نوريك كيفاش كان ما تعرفش (: - ولن تجد منا الا التصفيق والتطبيل الساذج الذي سأجده في حالة انا دورتها سياسة في مدونتي .
ثقافتي الحالية و المعلومات الي عندي ما تخلينيش ندخل في "الدومان" هذا.. كونش نولي نهز ونسبط ونضحك في العباد على روحي . هذا اولا
وثانيا..
عندي اسباب تكتيكية بحتة
علاش الكذب
اش ريت منو عمري انا ؟؟
على الاقل واحد يعرس هالنمي !!!
من صغرتي تحبو طيشوني في الحبس (:
شعمتلك يا خويا
في مايخص المقاومة :
نوافقك على انو المقاومة الصاعدة حاليا عندها طابع اسلامي ما ننكروش هذا .
الحكاية هاذي تعود بدرجة اولى للصحوة الاسلامية وتراجع المد القومي واليساري في العالم العربي . اما مش معناها راهو الدين هو المحرك الاساسي للمقاومة عند الشعوب
ابدا لا
حماس مثلا جات بعد فتح باربعين سنة !!
وقتلي الرنتيسي كان يرضع في صبعو،عرفات و ابو جهاد و جورج حبش والشلة الكل كانو في الجبولات يقاتلو !!!
وكيما تعرف.. حركات مثل الجبهة الشعبية و فتح وغيرها كانت حركات يسارية وعلمانية وقومية وما عندها حتى علاقة بالدين..
احنا "الغير متدينين" ، ما عندناش هاك التعصب الي تتمتعو بيه مع احتراماتي .
بحيث مانراش مانع في تاييد حزب الله بكل قوة زادة والهتاف لنصر الله رغم توجههم الاسلامي .
اقتباس
" و إلاّ كيفاش واحد يفجّر روحو إذا كان ما يخمم كان في الشرب و الماكلة و الرقاد كي الحيوان "
هههههههههههههه
حلوة هاذي
علاش الكاميكاز باش دافعو على ارضهم وفرقعو رواحهم في البوارج الحربية الامريكية خمو في الشرب والرهج ؟؟؟
والا السوفيات كانو يتخيلو في الحوريات فوق الابناك وقتلي صدو اكبر هجوم عسكري عرفه التاريخ في معركة ستالين غراد ؟؟ ماهو كانو شيوعيين وملحدين ؟؟
الفيتنام كيف كيف... الخ
حب الارض هو دافع عظيم عند الانسان السوي.. الانسان الاناني والحيواني هو الي يلزمو الماكلة و الزقايط باش يدافع على كرامتو .
(يتبع)..
" التدين حاجة ما تساعدش السلطة، تعرف علاه ؟ على خاطر تخلّي العبد يطالب بحقوقو بقوة أكثر و ياقف في وجه الدكتاتورية "
هذاكا علاش الشعب السعودي - حفظه الله- هاردلها امها مظاهرات واحتجاجات ، وفي القريب العاجل باش يعمل ثورة على النظام الملكي الفاسد والمتخلف الي عندهم .
بينما الشعب الفرنسي مثلا - صاحب اشهر ثورة على الاقطاع والتخلف الديني في التاريخ - بقى راكش وشاد تركينتو..
يستنى باش يجيهم واحد بولحية ماعزية يحررهم و يلغي الدكتاتورية الي عندهم .
يسخفو الزح مساكن . قداش يعانيو .
والا شعب امريكا اللاتينية !! ماهو قالك طلعو مسلمين.. وشي غيفارا طلع قاري في جامع الازهر وخريج الحوزة متاع النجف.. ! هذاكا علاش دمر الاستبداد وحرر شعبو هو .
اقتباس
" في أيام حكم طالبان تم القضاء على الرشوة مثلا الي يستحق خدمة يخدم والي ما يستحقش ما يخدمش الى جانب تطبيق العدل على كل الناس "
مزالو ناس عندهم عالجراة هاذي الي تخليهم يحكيو على طالبان ؟؟
يا ولدي استغفر مولاك قالي طالبان و الا ثلاثة طلاب
عار فعلا
عار
هذوكم بشر هذوكم ؟؟
يغزرو للنساء على انهم ترمات متحركة ويعدمو في الابرياء في الاماكن العامة على اتفه الاسباب
مدمري اعظم تماثيل في التاريخ
قتلة متخلفين... جل اهتمامهم " الحيض والنفاس والذبح الشرعي "
يتنافسو شكون يرد البلاد اقرب الى العصر الحجري ؟
ما عندهم كان ثقافة الموت والنكد في ريسوهم
التعليم هردولو امو.. الاقتصاد بعبصولو اختو..الحريات خراو على والديها
تقدم = 0
العباد تخليها عام وترجع تلقاهم تقدمو ولو بنسبة ضئيلة
هوما تلقاهم وخرو !!!
شنوة الدمار هاذا
قالي طالبان
تي حتى المسلمين يحشمو منهم
(يتبع)
في مايخص موضوع المرأة
فديت من والديها الحكاية هاذي
سامحني خويا
اما اعمل طلة على منتدى الملحدين العرب واتو تلقى البنيات متاعنا غادي يوريوك بالحق شواهد تكريم المراة في الاسلام
هوما الاقدر باش يدافعو على رواحهم.
فمة زوز بنيات " العقل_نور" و
"apala" ننصحك باش ما دورش بيهم ههههه
عندهم K.O فكري يعملك الاحباط المزمن .
نصيحة اخوية فقط (:
ليلتك زينة
..
أولا بارك الله فيك نعرف كيفاش نعمل مدونة و هي فعلا موجودة لكن ما انجمش انقلك عليها في الوقت الحاظر حتى لا يتم حجبها و حتى تاخو حظها و من بعد ربي يعمل دليل و ممكن تلقاها نهار بالصدفة كما أنا لقيت المدونة متاعك وقررت اني نبعث تعليق لا لشيء الا أني لاحظت أنو عندك مقدار لاباس به من الثقافة و لو اني ما نتفقش معاك كان في نقطة المقاومة و هذاكهو الي كان السبب باش اقريت المدونة من أصلو و الا مانتعبش روحي واضح الي انتي عندك قناعاتك و انا كذلك و كيما يقول المثل كلامك مع الي مايفهمكش انقص من الأعمار ثانيا انا مانيش انسان متعصب بالعكس تحتى لحيا ما نيش عاملها وما ندعيش الا أنا خير من حد لكني نؤمن بأنو الاسلام قبل ما يكون دين هو تشريع سماوي ينضم حياة المسلمين اذا فم مشاكل موجودة فهي من صنع الانسان و ليست من الاسلام في حد ذاته كديانة و الا باش تفسر هذا الكم الهائل من الاجانب الي يعتنقو في الاسلام خاصة منذ أحداش سبتمبر و باش تفسر اعتماد الأنجليز على نظام الوراثة الي موجود في القرآن بعد ما وحلو باش يلقاو حلول ترضي جميع الأطراف
و باش تفسر زادة تكريمهم للقائد الكبير صلاح الدين الأيوبي في ميثاق الفروسيةو جعله كمثل يحتذى به للانجليز لتعاملو بغاية الكرم مع ريتشارد قلب الأسد و قتلي مرض و شد الفرش و هو من ألذ أعداءو كان انا انهز و ننفض حسب كلامك انتي ما نتصورش كان همازادة نفس الشيء حبيت انقلك من خلال هالكلام علاش برشى في الغرب يحترمو دينا في الوقت الي برشى مسلمين ينظرولو على انو سبب تخلفهم.
و قت الي تكلمت عل الاستشهادين كنت نقصد على أشخاص يمتلكو شجاعة كبيرة الي حيرت المحتلين و الشجاعة نابعة بالاول و الأخير من قناعاتهم الدينية كان جاو السوفيات ما همش قوة كبرى في ذلك الوقت زعمة كانو يدخلو في مواجهة مع الألمان نفس الشيء بالنسبة للمقاومة الفرنسية ضد الألمان كان مش تساند فيهم قوى عظمى كما بريطانيا و أمريكيا في الوقت الي الفلسطيني و الا العراقي داخل على دبابة بحجرةحبيتك تعرف حاجة مهمة الي تسبب في تخلف المسلمين هما الأشخاص المارقين الي كان جل همهم التمتع بالملذات الجسدية و انساو الجانب الروحي. فم قصة محزنة ياسر ممكن تكون طريفة بالنسبة للبعض الي ما يمهمش الأمر كانت فما بلاد اسمها الأندلس تحت سلطة المسلمين و كانو فم جماعة يقولولهم الافرنجحبو يحتلوها بعث القائد العسكري متاعهم جاسوس و قتلي وصل لكل البلاد لقى شاب يبكي قالو علاش تبكي قالو على خاطر قمرت بالقوس متاعي على عشرة تفاحات آخي جبت تسعة و فلت وحدة تعجب كالجاسوس و رجع لبلادو و احكالهم آش صار و قاللهم الي تخمو فيه حاجة مستحيلة كان شاب في العمر هذا يتصرف هكا فما بالك بالجنود متاعهم بر يا زمان ايجا يا زمان مرت عشرين سنة على كالحكاية بعثو جاسوس و حداخر و صل لنفس المكان و لقى شاب قالو شبيك تبكي قالو صاحبتي أعطاطني روندافو و ما جاتش رجع يجري كالجاسوس و قاللهم تو حان الوقت باش نحتلو الأندلس و فعلا احتلوها في ساعات معدودات بعد حكم اسلامي لمدة ثمانية ميات سنة و هذا يعطينا فكرة واضحة لتدهور الوضع عباد لاهية كان بالملذات ادى لفقدان حضارة من أروع الحضارات الي عرفها التارخ مش قتلك المشكلة مش في الاسلام اما في عدم التزام الناس ببعض المعايير قصة اخرى معروفة ياسر و هي قصة التتار أو المغول الي وصلو اعتنقوا الاسلام لانهم وجدوه دين عظيم و ذلك بعد احتلالهم لعدد من الدول الأسلامية و تمكنهم من معرفة الأسلام عن قرب.
"و إلاّ كيفاش واحد يفجّر روحو إذا كان ما يخمم كان في الشرب و الماكلة و الرقاد كي الحيوان "
انا بالكلام هذا ما قصدتش الي فهمتو انتي اما قصدت الي هالأستشهاديين ما كانش همهم الأول و الأخير هو التمتع بملذات الحياة الي مهما طال الزمن باش تزول زيد انوضحلك أكثرانا مثلا ما وصلتش لدرجة الايمان الي يتمتعو بها الأشخاص هذمكا و الي نحسدهم عليه و ما زلت انخمم باش نعيش و باش نعرس و باش و باش و هذا في حد ذاته شعور أناني يخليك اتخمم في روحك و ما يهمكش في غيرك و كان جاء هالشعور هذا موجود في مجاهدي حزب الله و غيرهم راهي ما تذلتش اسرائيل و امريكيا وروسياالي تقهرت على ايدين طالبان أنا نوافقك الي الغلو في الدين و التطرف مش حاجة باهية لكن انا كي تحدثت على طالبان تحدثت من ناحية انو فما حاجات ايجابية في فترة حكمهم و حتى من قبل حكمهم شكون قال الي بلاد كما روسيا قوة عظمى يقهروها ثلاث طلاب على رأيك انتي. الحجات الايجابيةالي ناتجة عن تطبيق الشريعة اكثر من الايجابيات الناتجة عن التسيب الأخلاقي و اذا كان انتي تقدر باش تسكر و ما تسوقش و هذه خطوة باهية هناك أشخاص علمبالهمش بالطقس بعد ما يشرب يخرج يدجلطم على العباد و ساعات يتسبب في مأساة لعائلة كاملة.
و اخيرا انحب ننصحك كما انتي نصحتني انتي في حد ذاتك ابداع الاهي في خلقك وفي الطبيعة برشى آيات تدل على وجود الله و الا فمن سيحاسب اولئك الطغاة و المجرمين ومن سيرد الحق للمظلومين و اسأل روحك علاش العديد من العظماء اعتنقوا الأسلام و منهم كوستو و اسأل روحك علاش برشى مسيحيين ما يشربوش الخمر مش على خاطر يخلي الانسان كالكوميك و اسأل روحك شنو لخلي الانسان في حاجة للعبادة أصلا آخي شنو للز الهنود و غيرهم من الحضارات باش يعبدو البقر و القرود و الأصنام و حتى الجرذان مش كان قعدو مرتاحين خيراخي لازم عليهم يعبدو حاجة من أصلو لكن هذاكا دليل قوي الي الانسان في حاجة ماسة و فطرية تقلوالي لازم يعبد حاجة و أقرب حاجة للوجيك هي الله سبحانه و تعالى و الا كان جات الطبيعة مثلا كما يقولو الملحدين مو لازم يكون فما حد خلقها تي واحد اخدم مخو شوي ازح.
ثم انا متأكد الي انتي باش تفكر في الموضوع و لو على المدى البعيد لأن واضح
أنك من الطبقة المثقفة و على اطلاع واسع بمجريات الأحداث و التاريخ مش كيما برشى عباد الي يعاندو و ما عندهمش حتى درايا بالأحداث و ما تخليش بعض الأشخاص الي متاثرين بالغرب و يقلدو فيهم تقليد أعمى يأثرو عليك و يخليوك مذبذب...
و تو انقلك السلام
اهلا مجددا بالعزيز "والوس"
باش نقتبس منك الجملة هاذي
"اذا فم مشاكل موجودة فهي من صنع الانسان و ليست من الاسلام في حد ذاته كديانة "
علاش مانطبقوش نفس الجملة على العلمانية الي تنقد فيها ؟
انت توة وصفت مشكل معين او ظاهرة معينة ، وبعد رجعت سببها للقوانين العلمانية... علاش ترا انو استعمال نفس الطريقة مع الاسلام لايجوز ؟
الاسلام عندو مجموعة قوانين زادة تسمى الشريعة !
هذا اولا
ثانيا
احنا ننقدو في اصل القانون وماناش ننقدو في التطبيق .
يظهرلي الامر واضح
ماجيتش نكتب على التخلف متاع الشعوب الاسلامية والا نسبة التحرش الجنسي الكبيرة في مجتمعاتهم...انا قاعد نتناول في الاسلام كتشريع وكفكرة وككتاب من منظور : هل هو من صنع الخالق ام من صنع محمد ؟ وعلاش هو من صنع محمد ( اخطاء علمية او بلاغية او تشريعات تعكس عقلية البدو...الخ )
في مايخص مسالة اعتناق الاسلام
ياخويا فمة برشة مسلمين زادة قاعدين يعتنقوا في المسيحية.. و برشة تركو الدين جملة وحدة !
بعض الغربيين الي يسلموا يسلمو لسبب بسيط وهو
الديمقراطية الموجودة عندهم والتي لاتمنع اي كان من تغيير دينه.. مش تتحلف باش تقصلو راسو كيف عند المسلمين .
حرية التعبير التي تمكن الدعاة المسلمين من تقديم دين معدل بصفة غريبة لايحتوي غير "الاله والواحد.. الثواب والعقاب.. واطعام المسكين وبر الوالدين "
خاصة بهاك الترجمة المضحكة للقرآن الي تحول "واضربوهن " الى " وانصحوهن" الخ...
ثالثا..المسيحي يحس ببرشة حاجات غير منطقية في دينو ومنها "التثليث " اذن باش يلوج على دين يرتكز على التوحيد..
فيتحول مسلما او الوهيا في بعض الاحيان
مختصر الحديث
كل الاديان تخدم على روحها وتعمل في الاشهار المجاني متاعها
و اعتناق مسيحي للاسلام والا العكس ما يدل على شيء.. فقط دليل على اللخبطة والحيرة لدى المؤمن لاختيار الطريق الصحيح..
11 سبتمبر كيف ما ادات الى اعتناق البعض للاسلام ، ادات زادة الى تصاعد كبير في الكره للمسلمين ، وخرجتلنا التصاور الدنماركية على محمد..
" و باش تفسر اعتماد الأنجليز على نظام الوراثة الي موجود في القرآن "
ههههههههههههههههههههه
منين جبتها هاذي !
معناها المراة التونسية طيحت على المراة البريطانية في حقوقها المدنية.. طالما ان الاخيرة تاخو نصف الي ياخذو خوها من الورثة على عكس نسانا !!!
ياولدي صلي ع النبي تربح وماتخليش العباد تضحك عليك (:
تكريمهم لصلاح الدين هو اعتراف موضوعي انو الرجل هذا هو بطل تاريخي .
شفت قداشهم ناس طيبة وماعندهمش التعصب والريق البارد الي عنا .
ريتش واحد مسلم اعترف بالجميل لحتى طحان واحد من عظام الانسانية ؟؟
يحترمو قائد تاريخي يكتسب قيم اخلاقية
شبيه عيب ؟
ماناش مبشولين لهالدرجة عاد بطريقة انو ما يطلع حتى واحد فينا يستحق احترام الآخر .
عودة الى موضوع المقاومة
اذن انت رجعت قدرة الانسان على المواجهة الى وجود قوة عالمية تساعده على ذلك .
باهي هاو ميثال الثورات في امريكا اللاتينية .
بضعة انفار فوقهم كان هدومهم و صبابطهم و سجائرهم الكوبية مرغو انف دكتاتوريات مدعومة من القوة الاولى في العالم في التراب .
كيفاش صار هذا ؟
الثورات هاذي كانت لادينية اليس كذلك ؟
مثال آخر
مندلا في جنوب افريقيا
وثورة السود.. ناس تواجه في الكرتوش متاع البيض بصدورهم وفقط
حل السورية وانطلق
كانو يحلمو بالجو الفوق ؟
غاندي في الهند... الشعب الهندي لم يكن مدعوما من اي طحان ، لم يكن مسلحا ، يجوي عشرة يرميو رواحهم فوق سكة القطار ، يتعدى القطار متاع الانجليز يعجن والديهم بكل بساطة
سنين طويلة من هذه التضحيات العظيمة الى ان حشمت بريطانيا على روحها و فصعت.
الفيتنام زادة ، اليابان في مواجهة اعتى دولة في العالم ،
كل شعوب هذا العالم الحر قاومت و قاومت افضل منا بكثير زادة...
احنا شعب راقد ، وحكومات عميلة ، و ناس يذبحو في بعضهم ، شوف مقاومة العراق وقارن مع مقاومة الفيتنام (80 بالمئة منهم ملحدين) وبعد ايجا احكيلي .
نفس الشيء في فلسطين.. فتح وحماس
حالة مكربة في كل ربوع الوطن الاكبر
وبعد نجيو نبعبصو رواحنا و نقولو انو الدين هو حامي حمى اوطاننا !!!
في مايخص القصة متاع الاندلس ( الي لتوة تبكيو عليها وهي مش متاعكم )
تصلح كنكتة بورجولية .
نتمنى ماتطلعش صدقتها كيف ماصدقت فازة الورثة العروبي في القانون البريطاني .
عودة الى طالبان
خويا العزيز انتصارهم على السوفيات ماكانش بفضل اللحي الي تتكركر في القاع متاعهم .
و لا علاقة بالدين بالحكاية .
انه الدعم الامريكي بكل بساطة
المخابرات الامريكية هي الي اوجدت حاجة اسمها طالبان الي تتفوخر بيها.. ومشاتلها السلاح المتطور بلوشي.. هات اضرب السوفيات برك !
لو كان جاء الاسلام عندو علاقة بالحكاية راهو مقر الخلافة الراشدة في كابول ما طاحش في نهارين قدام زحف المارينز .
اخيرا
طبعا الانسان يحتاج للاله لانه جاهل .
قبل كي مافهمش الرعد قال هذا اله في حد ذاتو .
وكيف مافهمش اشنية الشهب قال " رجوما للشياطين " ، يعني صواريخ جو-ارض الاهية لقنص العبابث والجنون الي تطلع تنسنس على ربي الفوق .
ورغم اقتناعي انو "الاله" هو فكرة من صنع البشر.. لا فطرة ولا وذني
الا اني اؤمن بوجود خالق ما او قوة ما
لهذا انا لاديني ولست ملحدا (:
ممكن ماعادش تراني بعد التعليق هذا لحد نهار الثلاثاء الجاي .
peace
..
إرسال تعليق