لاصوت يعلو فوق صوت الشلبوق...

...

كانت البداية على الساعة الرابعة مساء ، عندما انطلقنا نحو مغازة كارفور الغير بعيدة لاقتناء ما يلزم استعدادًا للمباراة المنتظرة على الساعة السابعة .

المرة هاذي ، برشة امتنعوا عن الشرب قبل المشيان "للبارتي" ، أغلبيتهم لأسباب مادية ، حتى الزوز الي مشاو معايا كانو باش يبطلو في آخر لحظة ، ثم تراجعو عن قرارهم كيف شافوني داخل مع سابق الإصرار والترصد ، منتفخ الخصيتين امشي ، في يدي هاك "البانيا" الحمرا ، و الدجاج الأكحل يمارس في طقوس الحج متاعو حول رأسي ..

الأسبوع إلي تعدى ما كانش باهي برشة ، خالتي تعدّات لعالم الفناء بعد صراع طويل مع المرض ، أعز طفلة عرفتها ونعتبرها أخت حقيقية مشات مع والديها وتروّح بعد 15 يوم ، إلي تقلو هيا نبحروا يقلك خلي غدوة ، الإمتحان التطبيقي متاع الرخصة حطوهولي في آخر أوت... الخ

كيما تشوفو ، وضع مُكرز كيما هكة نتصورو يعطي دافع كبير للمرء باش يمارس الطقوس الروحية متاعو خاصة كي يبدى عندو جمعتين على آخر دبوزة ، لهذا ، ما خرجت من كارفور إلا وفي يدي وحيدة "فان بلون" وكعيبتين بوات ، بلعة عيار متوسط متاع واحد ماشي باش يقابل جمعيتو..

خويا ، والجماعة الاخرين خذاو الكار ومشاو ، فيما ركش ثلاثتـنا في البقعة متاع العادة المجهزة بكل أنواع الرفاهية :

ياجورات و باب حديد مطيش ، وطرف حشيش منا ومنا يضفي نوعا من التلقائية على القعدة..
بعد ما كمّلنا ، شدينا الثنية لهاك المحطة ، أو بالأحرى العرصة الصفراء متاع 47... كانت الساعة تشير إلى السابعة إلا ربع ، مما يوحي بدنو حشوة مرتقبة..

سألت واحد قاعد على ياجورة بحذايا ( كتعبير دقيق على الموقف ) هل عندو برشة يستنى و إلا لا..؟
و يتطرشق المسكين ، بحيث فمة برشة سبان ماكنتش نعرفو تعلمتو من عندو..
أنا متأكد لو كان يعطيوه حزام ناسف ما يفجر روحو في وزارة النقل (:

الي يفرح في الحكاية هو انو قد ما تطول المدة الي ستناها واحد جاء قبلك ، قد ما تتضاعف فرصة قدوم الحافلة..
وهذا إلي صار ، بعد دقيقتين فقط لاحت من بعيد..

كيف طلعت ، كنت محظر روحي باش نشري عركة مع الخلاص ، لأنو في وضع كيما هكة حقهم هوما إلي يخلصونا مش أحنا...
تعديت على روحي وقلت إن شاء الله ما يكلمنيش برك ،
و حسنا فعل.. (:

* * *

في وسط 47 ، لفت نظري صورة طفلة في حجر أمها ما ريتش وحدة في برائتها ، قلت لازم ناخذولها تصويرة..
يا إما تكون راقدة ، يا إما تكون إحدى ضحايا التسمم بثاني اكسيد الضبوط (وهو الخيار الأرجح )..
( مع احتفاظ بيغ تراب بحقوق الملكية الفكرية لهذا المصطلح )..

وصلنا للمنزه ربع ساعة بعد انطلاق المباراة ، هبطنا من الكار وطحنا نتجاراو كي المهبلة ، تحت وابل من تربريب الزملاء على أفكاري إلي خلاتنا نوصلو المخّر..
كيف لقينا بقعتنا في البلوك 15 مشدودة وتستنا فينا ، والنتيجة صفر لصفر ، ولاو يطلبو في السماح (:

* * *

كان مردود الفريق متواضع جدا ، ماكانش فمة "موتيفاسيون" رغم الحضور الغفير للجمهور ، أداء معفّط بامتياز لـ"جينيور اوزاغي" و غياب يوسف المويهبي..

في الشوط الثاني ، و بعد التشعيلة متاع الفلامات ، حدث الذي جعل مني اكتب هذا المقال...

خويا إلي حكيتلكم عليه ، طفل مهبول بحب الإفريقي ( وهو إلي غرّمني بيها "دايور" ) يتحرم من نصف الشوط الثاني بدون أي موجب وبطريقة في غاية الصفاقة...
طلع واحد لابس سورية زرقاء مع عون أمن للبقعة متاعنا ، وقف بحذا خويا ، غزر لوطة لجماعة الشرطة الفنية وقاللهم هذا هو ؟
جاوبوه "أي" بريوسهم...
يعمل هكة و يقلو " قدامي"..

مشيتلو بكل لطف و قتلو :

" يا ولدي راهو خويا هذاكة مشيش تطلع غالط فيه، عاود شوف الفيديو تعمل مزية.."

يعمل هكة ويسبقلي ضربتين بالجهاز اللاسلكي متاعو على صدري التراس متاعهم لتوا ظاهرين..

قالي :
" رب فمك تسكرو وإلا تخلط عليه.."

جبدني واحد من صحابي وقالي :
" ما دخلش روحك أتو يسلكها.. كان يشمو عليك الريحة مـ***ـة عليك "

ضمّيت فمي كيف الناس الملاح ، وقعدت نتفرج في خويا يجبدو فيه قدامي و أنا عاجز عن فعل أي شيء..

أول سؤال سألتو بعد ما تنحى مفعول الصدمة هو :

علاش ؟؟

الطفل عاقل وظاهر صغير..
منحي مريولو و مطول شعرو صحيح ، أما على حد علمي "اللوك" هذا تنجم تلقاه في الفيراج الكل..

بأي منطق تحرم واحد دافع فلوسو من مشاهدة بقية المباراة بدون أي موجب ؟؟

أنا قاعد بحذاه قد قد.. ونأكدلكم انو لا عندو "فلام" و لا عمرو شد كعبة في يدو...
أكثرية العباد إلي طلعوهم في "الباغا" (حسب ما حكالي خويا بعد).. كانو مظلومين وظاهرين ولاد نظاف..
إذا الحكاية بالكيفية هذي ، علاش عاملينلنا كاميروات تصور ماللوطة و شرطة فنية و ريق بارد ؟؟
منو هكة ، اعملو دورة في الستاد والطحان إلي مايعجبكمش ضَيفوه بحذاكم و بنقص شهاري زايدة..

كي وفى الماتش ، مشيت مع الولاد لأحد الأعوان أو بالأحرى هو طلعلنا ، كان مختلف جدا عن صاحب السورية الزرقاء ، ما كانش عندو هالتكبر و هواية الخريان على الشعب إلي عند الكبار ، حكيتلو الحكاية.. قالي :

" توا يعديوهم للمنطقة ، و بعد ممكن يبيتوهم في الحبس.. مالأحسن تعيط لبوك يشوف حل... "

تسلفت بورطابل من عند ولد حومتي باش نكلم الوالد نلقاه مسكّر...
تحشاااا والحمد الله ، قلت في نفسي...
الفيكس مقصوص عندو نهارين ، وأمي في البلاد لوفاة أختها كيف ماحكيتلكم ، حاسيلو تسكرت بالضبط..
بعد كي جيت نخمم قلت هاي جات بطبيعتها ، الحل الأمثل هو أني نروّح نحكي الحكاية مباشرة لبابا خير برشا من التلفيون... وهذاكا الي صار..
خذينا تكسي وصّلنا للحومة بعد ما حشاهولنا في أربع دنانس ، شريت وحيدة سكر فاني عالريحة ، وتوكلت على ربي..
أنا داخل للبلوك نلقى "الاسنسور" مكسر..
ترصيلي طالع للسادس على سقيا.. ) :

بعد ان التهب **** ، لقيت روحي في السادس...

هدّيت على الوالد.. نلقاه ناصب كعيبات مسكين ،
صبيتلو الحكاية فيسع لأنو الوقت بدا ينفذ وما يكفيش للتمهيد النفسي..
لبس حوايجو وخرج يكفر على رب الإفريقي.. زيد هو مكشّخ عاد ، مانحكيلكمش آش صار فيه...
وصلنا للمنطقة مع زوز من ولاد حومتي ، هبطت أنا وبابا..
المركز كان معبـي بصفة غريبة ، برشة أولياء غادي ترزاو في نهار راحتهم و رصاتلهم يحربطو على ولادهم ،
قرابة عشرين واحد مسلسلين " بالمونوت" ، فرخ صغير مزال حتى ما بلغش مسلسلينو زادة ..
واحد مسكين يخدم على روحو.. بييع في الكاكي في الستاد ، قالولو صحّح ، قاللهم " نا لا نحب لا الكليب لا سوسة جاي نخدم على روحي " ، على الكلمة هاذيكا كسرولو خشمو باللاسلكي ( الله لا تربحك في هالاختراع يا ماركوني )...
حاسيلو ، حالة احتقان شديدة عمت المكان على هالتصرفات المجودرة لفظيا وجسديا متاع الحاكم ولو أنها مش حاجة جديدة...
حتى آخر لحظة من المفاوضات ، سيبو كان ثلاثة برك ، خويا و زوز أخرين ،...
و أحنا خارجين ، مالقيت مانقول كان "ربي معاكم لولاد ".. للي اختارهم القدر باش يتضيفو في شونبر زوز ميترو على ثلاثة مع "بونسيون كومبلات" ، طرف خبز وكعبة زيتون ونص كعبة بصل...

الحي يروح و اكهو..

...