Hors service

...

لجميع قراء هذه المدونة

بالله لا تاخذو في خاطركم خوكم واحل وحلة ماسطة مع الدوفورات ومش لاقي وقت حتى لروحو .
لجميع من قام بالتعليق خلال هذه الفترة... شكرا جزيلا لكم

عودة للتدوين متى سنحت الفرصة لذلك (:


..

عالم أقـــ*ـــب !

...

يحكيو على واحد عربي قام عالصباح مسكين هز القنفلاش متاعو باش يعمل دورة في بلادو المغتصبة .

يهجمو عليه حشاكم عشرين طحان يحبو يحرقولو كرهبتو ويضربوه .

علاش ؟ على خاطر هذاكا النهار المقدس متاع اليهود يصومو فيه و يتمتعو  بالعيش في عصر ما قبل التاريخ وقتلي طلعلنا موسى بحكاية مالحيط لتوة نعانيو في جرتها .

بعد دقائق تسربت اخبار انو السائق هذا مات ، مباشرة بعد ذلك انتفض العرب للانتقام .

دامت المواجهات عدة ايام تعاملت فيها الشرطة الاسرائيلية بعنصرية فاضحة و ساهمت بشكل كبير في مزيد اشعال المشكلة خاصة بعد سقوط عديد القتلة من الجانب العربي وبعض الجرحى والمفجوعين فقط من الجانب الاسرائيلي المكرزين مساكن  قال شنوة :

اعتداء على المشاعر الدينية  (:

وانا نعمل في دورة في التلفزة تعديت على فرونس 2  نلقاهم يحكيو على الموضوع في الاخبار .

 le pertubateur palestinien qui est a l'origine de ces violances est arreté aujourdhui pour...etc

 

ما نجمتش نكمل نسمع قلة الحياء هذي... سكرت التلفزة وهبطت عملت سيغارور و الي يسلم عليا نمشيلو شلبوق .

رسالة للغرب الي يدافع على تصوير محمد وهو مقعمز في التوالات باسم حرية التعبير ،

اش بيكم ما تتكلمو على احترام المشاعر الدينية كان كيف الحكاية تمس ولاد حومتكم ؟؟؟

تصور كان جاء واحد يهودي عازقو في بلاد عربية وهجمو عليه المسلمين حبو يحرقولو كرهبتو...

كنتو تقولو على اليهودي " بارتورباتور" يحب يفرعس السلم الاجتماعي  ، والا ضحية التطرف والتجوديرالعربي  ؟؟

اذا كان انتوما معفطين لهالدرجة وما تعرفوش تكذبو و تمثلو ادواركم... عاونونا بالسكات بالله وسيب عليكم من حكايات الشرق الاوسط .

تلهاو في هاك القطوس الي ضاع في مرسيليا خير.. 

...

وأخيرا... !!!

...

نهار الجمعة ، مع الثمنية متاع الصباح.. فقت نلقى قهوتي حاضرة .

فطرت وحليت الاورديناتور باش نلقي نظرة على مدونتي التعيسة جانيشي تعليق جديد ، قبل ما نتوجه لقرطاج او "كرتاج " كيف ما علمونا الفرانسيس كي استعمرونا .

حليت غناية " ثلاثة بزويشات صغار " للفنان الراحل بوب مرلي و ضربتني التبهيمة لمدة ربع ساعة و افكار عديدة تجول برأسي .

زعمة تعملها يا مروان ؟ لا ما نظنش.. المرة الاولى طيحني على حكاية اكثر من بيدونة ، علاش ما نطيحش المرة هاذي ؟؟

زعمة كان خذيتو وين نخلص المبروك على الجماعة ؟

تصور نحرق اولوية الزح !

زعمة المهندس يطلع رجلة و الا تعارك مع مرتو يحب يفش تكريزو فيا أنا ؟

..

حاسيلو كان نكتبلكم اش صار فيا الصباح هاذاكا ، تحبلكم ساعة اخرى باش تكملو الارتيكل..

المفيد ، استجمعت قوايا وقلت برة مولاها ربي .  " دونت ووري اباوتو ثينك.. " كيف ما قال الراجل..

وخذيناااه يا بو قلب !!!! ( ثلاثة نقاط بطبيعة )

نصيحة لكل فاضي شغل حل هالمدونة هاذي ، إياكم والخوف .

عدينا ويك آند طيارة ياسر ، مسطتها برك هاك البلاكة ثمانين متاع وذني فوق البلار ، بابا حب هكة اش باش نعملو .

اما جاب ربي  ما جاتش ورقة لاصقة ، على الاقل تنجم تنحيها "آ تو مومون" خاصة كيف يتعدى قروب متاع قطاطس وانت ادولش في اللاك . (:

يظهرلي طولت في الهدرة ، نجيوها مالاخر ،..

عطيونا هاك الضريبة "مبروك " يرحم والديكم

...

عيدكم مبروك !!!

...

انتهى رمضان اذن..
وحلت فرحة انتهائه عاكسة مدى تعلق المسلمين بهذا الشهر الكريم " الخير من الف شهر " !!!

مانيش باش نحكي برشة .

اما جوست حبيت نفكركم الي التصويت وفى بنسبة 16 بالمئة بركة صايمين ، و 18 بالمئة صايمين و يكحلو على البنات ( نبشرهم بانو اياماتهم كل منقوبة باذن الله )


ايا لولاد مذروب باث نمثي نعيد

عيدكم مبروووك !

...

مافيا والا دين ؟؟

..

...

نفس بشرية أخرى تنضم للائحة السوداء متاع ضحايا الفكر الصحراوي  المسمى بالإسلام . 

رنا رياض محمد ، عمرها 21 سنة  ، عندها زوز بنيات صغار ، قتلها بوها بسكينة وكسرلها راسها بالحجر قدام الناس الكل وبدم بارد .

حتى واحد من المتفرجين ما حل فمو.. وحتى الشرطة السعودية تكتمت على الموضوع بشكل مخزي .

سبب الجريمة البشعة هذي هو تحول رنا وزوجها الى المسيحية ، زوجها مهدد بالقتل ايضا وهو في حالة فرار الآن .

من هنا تنجمو تتفرجو على الحلقة الي تتناول الموضوع 

حلو الرابط وانزلو على "حلقة 81 "

بطبيعة الفضايح هذي ماهيش حاجة جديدة على المجتمعات الاسلامية ، فلو استثنينا تونس و لبنان وسوريا ، الجرائم الفضيعة هاذي تتكرر بشكل رهيب كل عام ،،

واخرها الطفلة فاطمة الي تقتلت  في الاردن رغم "اعتدال" المجتمع متاعهم .

زعمة اشنوة الي يخلي البو يقتل بنتو بهالبشاعة هذي و يحرم بناتها من الأمومة نهارين قبل عيد ميلادها ؟؟

اي دين واي فكر وحشي يسمح بهذا  ، لا و بل يأمر به ؟؟

واي وقاحة و ركاكة تخلي واحد مسلم يهز راسو و يحل جلغتو.. ويبرر الأفعال هذي ؟

هذا هو دين الرحمة وحرية المعتقد الي تحبو تردوه دستور للبلاد ؟؟؟

هذي مافيا  ، مافيا بأتم معنى الكلمة .

لأنو في العصابة طيبة الذكر و غيرها من العصابات ، بعد الانضمام ، ماعادش عندك الحق تتراجع والا تنسحب .

كونش في حالة وحدة يسيبوك... اما بلاش راس .

يا للعار !! 

نعرف بعض المعلقين المسلمين اش باش يقولو :

" تصرف المسلمين لا يعبر عن الاسلام . "

آآآ بون ؟؟

شبيه حد الردة موجود كان عند المجتمعات الاسلامية اذن ؟

زعمة لو كان جاء الاسلام يحرم هالنوع من القتل ويعطي للانسان غير المسلم كرامتو وحقو في الحياة.. كنا نشوفو مآسي كيما هكة ؟

اش تقولو كيف تعرفو انو اغلب الفقهاء والعلماء المسلمين افتاو بوجوب قتل المرتد ؟؟؟ تعرفو خير منهم ياخي ؟؟

هاو مؤخرا برك ، اعلى مؤسسة دينية في العالم الاسلامي ( الازهر ) طلعت فتوى تنص على وجوب عودة حد الردة للقانون المصري..

مش ربي يقلكم اسألو اهل الذكر... ؟  ونهار كل تكسرولنا في روسنا بغناية " انتوما جهال ، والعربية متاعكم  ما تخوللكمش باش تفهمو ، ويلزمك تقرا 90 مجلد من غادي  وتاخو شهادة من كلية الشريعة على جرد حكاية بيدونة تحب تفهمها.. الخ " 

باش نوضح توة كيفاش انو جرائم الردة ما جاتش من فراغ.. وهي نتيجة طبيعية لاجتماع العوامل المباشرة مع غير المباشرة في الشريعة الاسلامية وهي الي صنعت للقانون الهمجي هذا .

..

- الانتماء والتعصب للعصابة.. وتجاهل الآخر .

..

"وَمَنْ يَقْتُلْ مُؤْمِناً مُتَعَمِّداً فَجَزَاؤُهُ جَهَنَّمُ خَالِداً فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً) (النساء:93).

( المسلم أخو المسلم لا يظلمه ولا يخذله ولا يحقره … كل المسلم على المسلم حرام دمه وعرضه وماله ) رواه البخاري ومسلم.

( لزوال الدنيا أهون على الله من قتل رجل مسلم ) رواه الترمذي 

..

دم المسلم على المسلم حرام... الا يعني هذا ان دم الكافر على المسلم حلال ؟؟

لو كان حرمة الدم تشمل الجميع لما قام الرسول بالحصر.. ولقال " دم بني آدم على المسلم حرام " 

بطبيعة ، ضمان الهدوء داخل العصابة امر رئيسي جدا ، وكل منتمي للعصابة هو جندي اضافي في جمهورية المافيا الالهية .

لهذا اهتم محمد لهذه الدرجة بحرمة دم المسلم.. وتجاهل الانسان الذي قيل انه بعث لاجله ، في تصرف عنصري فاضح .

..

- المعلم الكبير يامر بقتال غير المسلمين.. فما بالك بالمرتدين !! 

..

قَاتِلُواْ الَّذِينَ لاَ يُؤْمِنُونَ بِاللّهِ وَلاَ بِالْيَوْمِ الآخِرِ وَلاَ يُحَرِّمُونَ مَا حَرَّمَ اللّهُ وَرَسُولُهُ وَلاَ يَدِينُونَ دِينَ الْحَقِّ مِنَ الَّذِينَ أُوتُواْ الْكِتَابَ حَتَّى يُعْطُواْ الْجِزْيَةَ عَن يَدٍ وَهُمْ صَاغِرُونَ  } ( سورة التوبة: 29 )

هنا القتال واجب ضد اهل الكتاب حتى يجيبو الحنينات .

عن ابن عمر رضي الله عنهما ، أن رسول الله صلى الله عليه وسلم قال : ( أمرت أن أقاتل الناس ، حتى يشهدوا أن لا إله إلا الله ، وأن محمدا رسول الله ، ويقيموا الصلاة ، ويؤتوا الزكاة ، فإذا فعلوا ذلك عصموا مني دماءهم وأموالهم إلا بحق الإسلام ، وحسابهم على الله تعالى ) رواه البخاري و مسلم .

..

هنا.. على غير المسلمين اعلان اسلامهم ( انضمامهم للعصابة) باش سي محمد يرضى عليهم و ماعادش يفكلهم فلوسهم ويشلطهم . ( نفس مأساة منتصر مع هاك الصعلوط في مسلسل مكتوب... يلزم يولي ممثل تجاري متاع زطلة في الـ " إي. هـاش . او. س "

كيما تراو.. "حسابهم على الله تعالى " فقط في حالة ولاو مسلمين .

وبالتالي الحساب الدنيوي ( التشليط و فكان الفلوس  ) حاجة اساسية في الدين الاسلامي للتعامل مع غير المسلمين..

بالفلاقي :

اذا محمد يتعامل هكة مع الكفار... فكيفاش نستغربو تعاملو مع ناس دخلو للاسلام وحسوه معفط ياخي خرجو ؟؟؟

 تطيح قدر بورجولية..

..

- الامر بقتل المرتد واضح جدا في هذا الحديث الصحيح :

..

" حدثنا ‏ ‏أيوب ‏ ‏عن ‏ ‏عكرمة ‏ ‏أن ‏ ‏عليا ‏ حرق قوما ارتدوا عن الإسلام فبلغ ذلك ‏ ‏ابن عباس ‏ ‏فقال لم أكن لأحرقهم لقول رسول الله ‏ ‏صلى الله عليه وسلم ‏ ‏لا تعذبوا بعذاب الله  و لو كنت أنا لقتلتهم لقول رسول الله ‏ ‏صلى الله عليه وسلم ‏ ‏من بدل دينه فاقتلوه فبلغ ذلك ‏ ‏عليا ‏ ‏فقال صدق ‏ ‏ابن عباس ‏ "
رابط الحديث 

..

بورجولية يعطيه الصحة عباس هذا ما كانش باش يحرق والديهم . (:

كان باش يطيرلهم ريوسهم بموس بو سعادة برك .

يا ولدي هاو التسامح والا لوح !!

..

..

بالله سهال بسيط للاسلاميين 

ما كمش حاشمين على رواحكم  ؟؟

ما تحسوش بالعار كي تمشيو لبريطانيا والا فرنسا وتبداو تعملو في الدعوة لدينكم بكل حرية.. وفي كل حي تبنيو عشرة جوامع ؟؟؟

ياخي لعباد الاخرى قرودة وانتوما آخر سلالة متاع بني آدم في هالعالم هذا ؟؟؟

مالمفروض يعاملوكم كيف ما تعاملو العباد رغم انكم ما تستحقوش .

اما صحة عليكم وبرة .

الى كل المدونين التوانسة ، دعوة ليوم تدويني ضد هذه الجريمة الهمجية .

و تحية للشهيدة رنا ولكل نفس حر في هذا العالم تحدت حكم المافيا .

تحية زادة للوليد بن يزيد بن عبد الملك ، الي فهم الحكاية من أولها ، وكرز على دين ربها قام قطع المصحف..

وانشد يقول : (:

توعدت كل جبار عنيد *** فها أنا ذاك جبار عنيد
إذا لاقيت ربك يوم حشر*** فقل يا ربي مزقني الوليد

لن يمروا..

...

يشفر والله صـ....

...

في التدوينة هاذي.. حبيت نفرغ قلبي على واحد حاشاكم عاملي العصب من أول رمضان و حارمني باش ناكل لقمة و انا رايض على روحي كيف العباد .

" محمد مشفر ".. شخصية مُكرزة من الطراز الرفيع عرفتها أول مرة عن طريق إذاعة الزيتونة و أنا نعمل في سويعة سياقة .
نهارتها ، كنت مستكوزي على روحي في هاك الكرهبة ، في بلاصة حلوة كيما قرطاج ، طقس لطيف.. حاسيلو كل ما من شأنو باش يخليك تعمل كيف .
في التقاطع إلي يسبق البحيرة الصغيرة غادي ، ظهر للمونيتور باش يهلكلي كيفي بـالـ 97.6  متاعو  .

كيف يبدى شيخ يحكي ، تجـيـني رغبة غريبة باش نركز معاه رغم إلي الشي إلي باش يقولو صعيب برشة كان باش يندرج تحت مسمى آخر بخلاف " البيدون " .
أيا سيدي وعلى حلّـة الراديو ، نسمع في صوت أنتيكة منبعث من غادي يقول وبالحرف الواحد ما يلي ( نشكر قبل خويا عياش الي عطاني البارول الصحيح متاع الفازة ) :

" لازم نحمدو ربي إلي عطانا نظر متوسط..عطانا القدرة باش نراو "البوتو" ( عمود كهربائي ) ما ندخلوش فيه..
تصورو يا جماعة كان جاء بصرنا قوي ؟؟ رانا نجيو ناكلو المقرونة و إلا الطاجين نشوفو الميكروبات..
هاي أربع ساقين.. هاي ثمنية من غادي..
نعيفو و نوليو ما ناكلوش.. وتفنى الإنسانية ( دمعة تنسكب فوق خد المشفر )
مالة نحمدو ربي ونشكروه على نعمتو سبحانو " 

بطبيعة الصقر كونو يكسب نظر قوي يشوف الميكروبات تلعب فوق الفريسة متاعو .
بربي واحد كيما هكة ما يستحقش مُشطة زعمة ؟

من هالحادثة..حسيت روحي معني مباشرة باش نفضح السيد هذا .
وتوالت الطرائف بشكل شبه يومي :
 
" نتوجه للي ما يؤمنوش بربي سبحانو وتعالى..
جربو سدو النفس على رواحكم .. و اتو تشوفو كيفاش تتخنقو.. أي نعم
كيفاش ما تمنوش بربي مالة ؟ "

بالسذاجة والسطحية هاذي.. يواجه سي المشفر الملحدين . 

ومرة.. وفي حديث عن ليلة القدر
" تعرفوشي يا جماعة علاش اسمها ليلة القدر ؟
على خاطر الإنسان إلي يدعي.. يسترجع فيها قدرو .
أي نعم
كان تعديو الليلة تدعيو.. من غدو لعباد تبدى تقول :
 شوفو محلى لبستو.. شوفو محلى ريحتو
وهكاكة.. ربي سبحانو يرجعلك قدرك "  

وفي زلعة أخرى و أنا واقف نستنى في العطار :

نحب نقول للي ما يؤمنوش والعياذ بالله... راهو عاقبة الكفر النار ينجيني منها وينجيكم ( ديما يبدا بروحو كي يجي يدعي )... نار أوقد عليها حتى اسودت كم قال عليه الصلاة والسلام..

يقول القايل كي يبدى واحد عامل الخير اش يكون مصيرو ؟
ربي سبحانو وتعالى أوجدنا لطاعتو.. و توعد في كتابو العزيز الكفار والمشركين بعذاب السعير
إلي عملو الخير في الدنيا و هوما غير مؤمنين باش يلاقيو نفس المصير..
لأنو الخير إلي عملوه ما كانش لوجه ربي سبحانو " 

المفهوم المعفط إلي يفكر بيه الشيخ ينص على أن فاعل الخير الغير مؤمن باش يتعاقب رغم انو عمل الخير متاعو من دافع إنساني .
بينما يجازى المسلم المؤمن رغم إن أفعاله الحسنة هي عبارة عن طحين و كومرس لا غير .
الشيخ المشفر هذا يرى انو الجنة الإلهية هي حق مكتسب له ولأمثاله من تجار الغباء و البهامة وقلة الذوق ، ومحرمة على بيل غايتس مثلا إلي تبرع بمليار دولار لتطعيم ضد شلل الأطفال.. وإلا "باستور" إلي أنقذ الملايين بدوائه ، لوجه الإنسانية لا لوجه الله والطحين العمودي .

بكل صراحة... تواجد الأنماط هذي في التلفزة وفي وسط الماكلة والعائلة ملمومة هو قلة ذوق و حاجة مقرفة وتعبث بالخواطر .
راهو كي تحجم لحيتك وتبدى تكشخ بهاك الطريقة المعفطة هاذيكا ما توريش روحك إنسان بقدر ما توري روحك **** .
كان ريتوه كيفاش يغني على الوضوء رابع يوم في رمضان يظهرلي.. والبارح يحكي على أركان الإسلام قول علينا نسكنو في الكاراييب ! صدقني عباد جهال نعرفو من دينهم أكثر ملي يعرفوه هوما .

إلى مؤسسة الإذاعة و التلفزة التونسية...نحيو علينا هالرهوط .
 

...

ارفع راسك ، أنت تونسي...!

...

هذه الأيام ، و في منتدى الملحدين العرب ، يدور نقاش حول مستوى التقدم والتحضر بين الدول العربية .
الموضوع يحتوي تصويت يخيرك باش تختار دولة من بين خمس دول تراها أنت البقعة الأكثر بياضا في الثوب العربي المسوّد .
بصراحة تفاجئت بالنتيجة إلي جات في صالح تونسنا العزيزة بحكم كون الأعضاء غادي غالبيتهم مشرقيين و التواجد التونسي قليل نسبيا .
النتيجة الحالية هي كالآتي :

" من هي الدولة العربية الأكثر تقدما و حضارة؟

تونس (31.6%)

مصر (13.2%)

المغرب (26.3%)

لبنان (23.7%)

سوريا (5.3%) "

النتيجة هذي أقنعتني انو "بالوشي" - و هو احد الزبائن الطليان عند بابا – ما قالش " تونس هي سويسرا العرب " من قبيل المجاملة الخالية من الوقائع على الأرض ( باش الوالد يطيحلو في السوم ) . ففعلا كي تجي تشوف بلادنا من زاوية الاقتصاد والمرأة والأمن والوعي الاجتماعي تلقاها بالحق دولة مهيأة بقوة لتصبح أول دولة عربية و افريقية تلحق بالدول المتقدمة على المدى المتوسط وربما القريب.
التنمية في تونس تعتمد على العنصر البشري و عامل الإبداع والذكاء ، ونجاح الاختيار هذا في تحقيق نمو يفوق 5 بالمئة سنويا رغم افتقارنا للثروات الباطنية له دلالات كثيرة لعل أهمها أننا كشعب ،

بوسعنا أن نعيد امجاد قرطاج العظيمة !

هاذي بعض المراتب إلي احرزناها حسب تقرير دافوس العالمي ( والي كنت نجهلها بصراحة) ، واللافت فيها انو تونس احتلت المرتبة الأولى إفريقيا في عديد المجالات ، مما يعني تفوقنا على جنوب إفريقيا وهي دولة تعتبر تقريبا متقدمة ومؤهلة بقوة لتنضم للعالم المتقدم .

* * *

من دخل تونس فهو آمن..

- صنّفت مجموعة "غلوبال بيس انداكس" للأمن والاستقرار في العالم تونس في المرتبة الأولى إفريقيا و 39 عالميا من بين الدول التي تتمتع بدرجة رفيعة من الأمن . وبحسب التقرير الذي نشر في العاصمة البريطانية، لندن، فإن تونس حصلت على 1762 نقطة، متقدمة بذلك على دول عديدة مثل بريطانيا التي جاءت في المرتبة 49 بـ 1898 نقطة .
وأوضح التقرير أن دولا أخرى حصلت على نقاط قريبة من تونس مثل أستراليا التي حصلت على 1664 نقطة، وايطاليا 1724 نقطة، وفرنسا 1729 نقطة، وماليزيا 1744 نقطة . وتصدرت النروج الترتيب العام للدول الأكثر أمانا وإستقرارا، حيث حصلت على1357 نقطة، وتلتها نيوزيلندا الجديدة 1362 نقطة ثم الدانمارك 1377 نقطة ( ثلاثة دول هاذم فيهم أعلى نسبة الحاد في العالم ) ، بينما جاءت أمريكا في المرتبة 114 وروسيا في المرتبة 118

التنافسية الإقتصادية :

احتلت بلادنا في هذا المجال المرتبة الأولى في إفريقيا والعالم العربي والثالثة ضمن مجموعة الدول الصاعدة و المرتبة 30 على المستوى العالمي من بين 125 دولة محرزة تقدما بـ 7 مراكز على العام الفارط .
وفسر الخبراء وأصحاب القرار في الدوائر الاقتصادية العالمية، التقدم الذي سجلته تونس بنجاح الإصلاحات الهيكلية التي أدخلتها على مؤسساتها خلال السنوات الأخيرة، حسبما نقلت وكالة الأنباء الصينية "شينخوا " .
و أشار الخبراء إلى أن تونس تمكنت مؤخراً من إرساء بنية أساسية متطورة ، والرقي بمواردها البشرية ، فضلاً عما حققته من نمو اقتصادي بلغ 6 بالمائة سنوياً، مع القدرة على التحكم في التكنولوجيات المتطورة " .
(القدرة على جلب الاستثمارات ركن أساسي في تقييم التنافسية طبعا)

مصدر

التكنولوجيا :

المرتبة الأولى في المغرب العربي وفي إفريقيا والمرتبة 35 على المستوى العالمي في ميدان تكنولوجيات المعلومات.
المركز الأول من حيث عدد مستعملي الهاتف المحمول في منطقة شمال إفريقيا حسب تقرير للبنك الدولي .
وقال التقرير إن نحو 55 في المائة من التونسيين أي أكثر من نصف تعداد السكان يملكون هواتف محمولة مضيفا أن تونس تحتل تقريبا المركز الاول فى مختلف المؤشرات المتعلقة بقطاع التكنولوجيا الحديثة للاتصال والمعلومات فى شمال إفريقيا باستثناء عدد مستخدمى شبكة الانترنت التي تأتى فيها تونس في المركز الثاني بعد المغرب .

السياحة :

المرتبة الأولى أفريقيا و 34 عالميا والثانية عربيا بعد الإمارات التي جاءت بالمركز الثامن عشر في مجال السياحة والسفر من بين 124 دولة شملها تصنيف المنتدى العالمي . (رابط)
مصر والمغرب المعروفين بالسياحة احتلو مراتب بعيدة نسبيا عن المرتبة إلي احتليناها .

كذلك تحتل بلادنا المرتبة الثانية عالميا في المعالجة بمياه البحر بعد فرنسا ، و الأولى عربيا في السياحة الاستشفائية عموما . ( :

الرياضة :

المرتبة الأولى عربيا حسب تصنيف الفيفا (كرة القدم) تلينا المغرب ثم مصر .
مكانة مرموقة لكرة اليد في العالم .
بلد يخرج الأبطال العالميين إلي يعليو "الدرابو" في المحافل الدولية كيما أسامة ملولي .

المرأة :

طبعا الموضوع هذا مايستحقش برشة كلام.. المرأة في تونس تتمتع بالمساواة الكاملة مع الرجل و تتفوق على بعض الدول الأوروبية في هذا المجال .

كل هذه التفاصيل نزيدوها بعض النقاط الإضافية المهمة مثل :

- الاتساع المتواصل للطبقة الوسطى في مقابل نسبة فقر ضئيلة مقارنة بكثير من دول العالم .
- النظام الجمهوري العلماني الذي يحكم تونس منذ الاستقلال كونه الضامن الحقيقي للحفاظ على مفهوم المواطنة بعيدا عن أي تصنيف ديني..
- تونس أول الدول العربية التي وضعت دستور لبلادها .
- مجلة الأحوال الشخصية إلي تقارب بشكل كبير نظيراتها في العالم الغربي .
- تاريخ ضارب في القدم يجمع الفينيقيين بالرومان و الامازيغ ثم العرب في خليط حضاري ثري هو الذي يشكل الهوية التونسية الحديثة .
- حرية ممارسة الحياة أفضل بكثير من باقي الدول العربية .
- طبيعة خلابة ومنوعة بشكل كبير.. في بضع السويعات تنجم تلقى روحك في صحراء بعد إلي كنت تترشف في كويس "ماغون" في إحدى الغابات الصنوبرية المغطاة بالثلوج .
- اقتصاد خدماتي ( قرابة خمسين بالمائة من الناتج القومي الإجمالي لقطاع الخدمات )
- تونس محج يومي للجزائريين والليبيين بغرض المداواة وهو ما يعكس تفوقا للنظام الصحي هنا .
- بلادنا تعتبر من الدول الأقل غلاء في العالم .
- الخصال العديدة التي يتميز بها شعبنا خاصة طيبته و تحضره مقارنة ببقية الدول العربية .

- تونس كانت ومنذ القدم منارة للفكر المستنير والعقلاني و ولدت عديد المفكرين العظماء لعل اهمهم " ابن خلدون " .
الخ

هذا كلو... بثروة نفطية تعتبر "تفتوفة" غير قادرة على تسديد نصف حاجياتنا من الطاقة . في وقت تغرق فيه الكثير من الدول العربية إلى العنكوش في عائدات نفطها .

إذن.. وبكل تواضع :

" تونس أفضل الدول العربية تقدما وحضارة " والي يخالفني الرأي نكسرلو وجهو .
اه سامحوني.. !
على ذكر تكسير الوجوه..
نسيت باش نبرز النقاط السلبية للنظام و إلي كانت السبب في كوننا دولة نامية حتى لتوة :

- الانفراد بالسلطة .
- التعامل البوليسي العنيف مع المواطنين خاصة المعارضين منهم .
- مرتبة متدنية عربيا في حرية الصحافة و تضييق كبير على الإعلام والانترنت ( الـ 404 الشهيرة) فضلا عن رهبة المجتمع التونسي من النقد ومواجهة العوج ( الظاهرة هذي بدات تشهد تراجع تدريجي مع ظهور التدوين و أدات لعودة بعض الثقة في نفسية المواطن )

- إتباع نظام "الدكتاتورية الراشدة" عوض الديمقراطي.. و عدم الاعتراف بذلك ( هو كي تجي تشوف.. نوع الحكم هذا هو الأصلح للعرب )
- التساهل في التعامل مع المد الرملي الحديث المصاحب لانتشار الفكر الرجعي خاصة في الفترة الأخيرة .
- عدم التعامل بحزم مع البيروقراطية والفساد .
- تكريس مفهوم الحزب الواحد و منافسة اللون البنفسجي للراية الوطنية .
- اللغة الخشبية المعفطة إلي تتميز بيها القناة الناطقة باسم السلطة .
الخ

إذا تناولنا بجدية النقاط هذي في " المشروع الحضاري لتونس الغد " إلي يمنّيو فينا بيه.. من غدوة نوليو دولة متقدمة .

وحتى كان ما حالفنيش الحظ باش نعيش اللحظة هاذيكا.. يحق لي أن أقول مرة أخرى :

" ارفع راسك.. فأنت تونسي "

...

رمضان كريم !!

...

 

...

بهالمناسبة السنوية" السعيدة" حبيت نبلغ تحياتي للشعب التونسي ولجميع المسلمين في العالم و نقلهم رمضانكم مبروك أعاده الله عليكم بالخير واليمن والبركة . ( :
ولو أني ما نعرفش هاليمن والبركة منين باش يجي بالضبط وكلنا نعرفو و التجربة علمتنا انو رمضان - رغم كونو مناسبة اجتماعية ظريفة تعودنا عليها من صغرنا- فهو يحمل بين طياته عدة جوانب سلبية قد تكون كفيلة بإخفاء الطابع الإلهي الكمالي الي مالمفروض باش يتميز بيه .

باش نتناول المسالة من عدة جوانب أولها :

اقتصاديا :

- الهبوط بالإنتاج القومي ، بإضعاف مردودية العامل و إنتاجيته بحكم افتقار جسمه إلى الطاقة اللازمة والنشاط الكافي ، فضلا عن حرمانه من الكافيين والسكريات الضرورية للحصول على التركيز .
و هذا ما يفسر تقليص عدد الساعات المطالب بانجازها . 
- الارتفاع المطرد في حجم الاستهلاك والتبذير رغم اعتراض الدين على ذلك ، فلا يمكنك بأي حال من الأحوال أن تتحكم في تصرفات شخص في حالة جوع كالتي يعيشها الصائم ، هنا يتضح الخلل الذي يكمن في طرح غير قابل للتطبيق . 
دولة مثل تونس تحتاج الى استيراد الآلاف من الاطنان من القمح والحبوب لتسديد حاجيات اولئك الجوعى ، والتي يذهب نصفها الى المزابل لسوء تقدير الصائم لحاجياته الحقيقة وهو في تلك الحالة .
تراجع الانتاج + ارتفاع الاستهلاك = ارتفاع العجز التجاري
- ارتفاع الطلب مقارنة بالعرض والذي يؤدي الى ارتفاع الاسعار .
- تراجع مردودية قطاع التعليم خاصة في صفوف التلاميذ...

= خسائر اقتصادية بالجملة على الدولة أن تعلن بشجاعة عن تكلفتها الجملية .


اجتماعيا :

- أعلى نسب الطلاق تحدث في رمضان .
- العرك وتكسير الكرايم... و التوتر الكبير الذي يسود العلاقات بين الناس .
- تهافت جماعي على الأسواق مما يؤدي إلى ازدحامات كبيرة تعبث بالخواطر .
- انتشار الطابع التدافعي بدل التضامني .

= حالة مكربة تسود المجتمع .

...

...

صحيا :

- الحرمان من الغذاء عندو دور رئيسي في إضعاف جسم الإنسان . 
في فترة الصوم ، يظطر الجسم الى اللجوء "للرزيرف" متاعو باش يحولها لطاقة .
التحويل هذا ( الكاتابوليزم ) يخلق فضلات يلزم يخرجو عبر التبول.. وهو أمر ضار جدا في غياب الماء .
في غضون كل هذا ، يحس الصائم بوجيعة راس ، عدم التوازن ، نوع من الدوار ومشاكل داخلية أخرى .
الجسم يلزمو يتصرف بكمية اقل من الماء و الصوديوم والبوتاسيوم ، والذي يؤدي إلى ما يعرف بالفرنسية بـ " هيبوتونسيون" ، و دوخة واضطرابات قلبية التي يمكن أن تقود إلى الموت في بعض الحالات .
- المصطلح " توالات" يتبع بقوة " الشون لكسيكال" متاع رمضان . الاستهلاك الكثيف في وقت قصير يعمل مشاكل عديدة في الجهاز الهضمي وصعوبة في الطرح .
- التقسيم السليم للغذاء والأفضل للجسد حسب جميع علماء و أطباء هذا العصر ينص على توزيع الطعام إلى ثلاثة وجبات طيلة اليوم ، و تناول وجبة خفيفة في الليل ، وهو ما يتعارض تعارضا صريحا مع ما جاء به محمد "من كلو واشربوا حتى يتبين لكم الخيط الأبيض من الأسود " .
- الجسم في حاجة إلى ثلاثة ليتر ماء يوميا ، مقسمة طيلة اليوم لضمان العمل الطبيعي للجهاز الكلوي و الجسم عموما ، ولخير الخلق رأي آخر..
باختصار :
= إضعاف الجسم ، و حثه على العمل بطريقة شاقة وضارة .

"

notre organisme a besoin d'énergie, procurée par les aliments, pour que nous puissions accomplir

nos activités quotidiennes. Il est important de prendre ses repas à heures fixes pour fonctionner de façon optimale. Si vous avez tendance à sauter des repas ou à manger à des heures irrégulières, vous pourriez éprouver de la fatigue, des fringales, ou manger davantage au repas suivant.

"

من غير ما ننساو
الارتفاع الكبير في نسبة حوادث المرور = خسائر بشرية ومادية للدولة لا ينفع معاها لا حملة تحسيس ولا وذني .
تراجع مفهوم الحرية الشخصية بفرض قانون لا يلزم نسبة كبيرة من الشعب ( الشرب مثلا )... 
تكريس العادات السيئة كالكسل والنوم في السيارة و الفصعة من الخدمة والشيشة كل يوم...

= عوج في عوج

لتقييم فكرة معينة علينا أن نتناول أصل القانون.. و أثره على الأرض .
و إذا تناولنا رمضان من هذين الشقين

 فلن نجد غير الدمار...!

...

لوست

...

رغم انو روحنا مبزلين ، النهيرين إلي عديناهم غادي كانوا أحسن تجربة عديتها ملي هبطت لهالدنيا الكلبة .
كان الانطلاق على الساعة الرابعة صباحا نهار السبت ، هزينا "الباغاج" متاعنا وتعدينا للمخبئ السري (خزنة التريسيتي) في البلوك باش نتزودو بهاك الشقوفات إلي شوية لقعدنا عليهم بعد ما قص الضوء نهار الجمعة ، جاب ربي ماجاوش يبعبصو في الخيوط بحذانا .

دبابزنا حاضرة من نهار الخميس العشية ، تعدينا نهارتـها لكارفور و ما خرجنا من غادي كان وكل واحد فوقو كعبتين "فان بلون" و خمسة بوات .

كي جينا باش نخلصو ، الجموع عطاتني الفلوس وتسرسبت لهاك الأبناك المقابلة ، و رصاتلي وحدي قدام 10 دبابز شراب والعباد تتشوحر من غادي ، كيما تعرفو عواشر ، والوقيت هذا ، العريبة تبدا تفسخ في" الذنوب" إلي ارتكبتها عام كامل تمهيدا للشهر الفضيل ، الناس الكل تعمل "اكتيفاسيون" لهاك الجزء الصغير متاع التقوى في شخصيتهم المنفصمة ، وبعد رمضان ، يرجعو للصحيح ، والي هو الانحياز الفطري للحياة .

عاد قلتلكم قمنا الأربعة متاع الصباح ، نطايحو بالنوم ، خذينا " تي سي في " للباساج ( أول مرة نركبو في هالكار ) ، وخذينا المترو لباب سعدون ومن غادي كملنا للمحطة متاعا النقل الوطني .

على دخلتي و أنا متعدي بحذا كشك في الباب ، يضربني صفة صوت متاع مقرء في كاسات ، عبثلي بخواطري.
واحد عالصباح وريقو شايح في عوض يحطولو فيروز و إلا حويجة خفيفة وتنعوش ، هبطولو الدمار في ركايبو .
يا خويا حطو قرآن ميسالش ، أما علاش الترتيل الإرهابي هذا متاع جماعة "الرمل هو الحل " ؟
ما عناش مقرئين في تونس ؟
شو المسيحيين محلاهم كيف يقراو ترانيمهم - رغم سذاجتها- ، علاش القرآن ما يتقرا كان بالطريقة النكدية هاذي ؟
بالله اسمعو هالمقطع هذا و قولولي وبكل صدق ، ما هو إحساسكم ؟

أفضل قبل الاستماع أم أسوأ .
وهل من الطبيعي باش يكون أسوأ ؟؟؟

بنّكنا في مطعم صغير للقيام بالطقوس "الجاروشية" متاعنا ، هردنالها امها كسكروتات وقازوز وتوجهنا للباحة الخلفية نستناو في الكار متاع الستة باش تحل الباب خلي واحد يطلع يشد تركينة يـ*** فيها النوم .

مع الستة غير درج جاء عمكم "عزيز" حللنا الباب ، طلعنا ركشنا من تالي ، خمسة كراسي على عدادنا..
خونا "بصة " كلوبيست لين خرا فيه ، كي يشوف كراسي وسقف وعرص يقوم يدربك وحدو..
" كومندو كومندو "
يا ولدي ارقد يهديك ،

وهو حب يسكت ؟
الشي أقوى منو الله غالب..
كي الكار بدات تتعبى والعباد تتشوحرلو ، فهم روحو .

وصلنا لراس جبل حكاية الثمنية ، ومن غادي خذينا تاكسي للقرية الجبلية الناعمة " رفراف" .
تقع هذه القرية على بعد 60 كم شمال تونس العاصمة ، تتبع ولاية بنزرت و معتمدية رأس الجبل ، من أهم منتجاتها هي العنب و الحوت ، عندهم طابونة ياسر طيارة ، وبحر الماء متاعو كأروع ما يكون . تنقسم بصفة رئيسية إلى جزئين جزء الفوق يعيطيلو " البلاد" ، وجزء لوطة بحذا البحر يعطيلو "الحماري" ، الحمير بطبيعة يمثلو وسيلة نقل معتبرة في رفراف ، و كي يبداو جايين على اليمين عندهم أولوية المرور على الكراهب . فمة بلاكة مصور فيها "خطر خروج سيارة ".. في عوض " خطر خروج هوايش" كيما تعلمنا في الكود . ( :

وسط المدينة يتمثل في "رونبوان" أو مفترق دوراني كيما يقول المونيتور متاعنا . والرونبوان هذا فيه عرصة متاع ضوء مزينة بعلمات علقوهم كيف فرنسا عتقت والدينا بعد تكبيشة دامت 75 سنة .
حاسيلو عاطين عالابيض اكثر مالاحمر ...

عاد قلتلكم خلطنا للبلاد ، عملنا قهوة وسيجارو ، وشدينا الثنية للبحر المعروف باسم "المستير" .
هذا يا سيدي بحر يبعد على "الحماري" مسيرة ساعة ونص على الأقدام ، ويبعد على "البلاد" ساعة غير ربع ، و احنا وبما أننا جينا من السفر و تاعبين قلنا نهبطولو ليه هو ، ومن بعد نرجعو للبحر الرئيسي متاع الحماري إلي باش ننصبو فيه خيمتنا.

عدينا نهار مش خايب ، رغم إلي البحر هايج برشة ، حشينا رواحنا في تكويرتين ، شرينا عركة كلامية مع واحد "زميغري" تعلم طرف فرنسي جاء يتجوبر علينا ، قلنالو بربي سلفنا البيتش الراجل شنع وحدو.. عملنا شوية تنقيزات من "الداموس" و "الراس" و "المغاير" من علو محترم وفي ماء صعيب كان تنجم تمس القاع الصخرية متاعو رغم انك تشوفها بوضوح شديد هي والحوت الي راكش فوقها .

هذا خوكم جمال.. التفليم بعينه

وكيف جينا ماشين عملنا قهيوة في بقعة طيارة برشة ، حاسيلو ملا ديكور في هاك القهوة .
هاذم تصويرتين من القهوة ذاتها في مشية سابقة مع العايلة .

* * * *

وصلنا للحماري قبل غروب الشمس بساعة ، تعدينا للعطار ، خذينا الشمع والدخان والخبز ، من بعد للحوات خذينا رطل ورقة وشكارة ثلج ، و من ثم للفحام..
قدمنا القدام باتجاه "عين دمينة" ، وهي البقعة إلي يتنهي فيها الرمل متاع الشط ليعلن ابتداء الساحل الصخري متاع جبل رفراف . وبعد البقعة هاذي ببضعة أمتار ، غرسنا الباراسول وسركلناها بالملاحف .
أي نعم ياسيدي ، باراسول وحدة في خمسة من الناس ، ناويين نباتو فيها ليلتين .
بعد ما انتهينا من تشييد الخيمة الافتراضية متاعنا ، زرفت أنا و سي " بصة" باش نلمو الحطب ، و بداو لولاد الاخرين يخرجو في الدبش و ينظمو في القعدة .

البقعة متاعنا قد ما نوصفها عمري ما نجم نعطيها حقها ، تصورو انتوما غروب شمس ، الجبل فوقك مغطي بغابة ريحتها اقل ما يقال عنها أنها سحرية ، ماء قدامكم لونو مزيج متاع ازرق واخضر وصافي رغم هيجانو ، و قمرة طالعة في الثنية ..

شعلنا هاك النار ، وحفرنا حفرة بعيدة شوية باش نشويو فيها الحوت .
حطينا الفحم وتوكلنا .
طاح الليل وطلعت القمرة .
تطوعت لتنظيف الحوت ، جبدت هاك السكينة المعدة للغرض و لأغراض دفاعية أخرى ، و بديت انخرج في المصارن لأول مرة في تاريخي .
هزيتهولهم فرحان ومورالي طالع ، و تفكرت كيف وصلت أهم حاجة تتعمل للحوت... التقشير
رجعت للبحر نقشر و ز** حاشاكم لهب بهاك الموجة الي شبعت فيا تتريم هاك الليلة القحـ** .
شوينا حوتاتنا ، وطرشقنا هاك الدبيبزات ، سهرية على ضوء القمر من الطراز الرفيع .

خونا وليد يعزف على الغيتار من غادي ، مستنياك يا روحي بشوق ، و احنا نغنيو والنشوة عاملة بعمايلها .
هزيت راسي الفوق ، اول مرة نشوف نجوم بالكثرة هاذي ، غزرت للقمرة باش نشوف وجه عزيزتي ، آه نمي ؟

شبيها مقدومة ماللوطة ؟! مش كانت تو كاملة...
هذا ما يكون كان خسوف.. وفعلا

رقدنا على ظهوراتنا نتأملو.. وكيف رجعت كاملة ، قمنا نتجاراو عملنا غطسة ،..
جبدت هاك " الكان أ باش " ، و رميت الخيط في الماء على أمل باش تجي حوتة في قالب غلطة ترهج الدودة ميكروسكوبيك إلي عطاهالنا صياد و احنا جايين .

تعدات ساعة وما حبت حتى وحدة تاخو بخاطرنا ، رجعت بحذا النار بعد ان عبث بي الريح والبرد الي هبط في هاك الليلة ، شربنا كعيبتين بوات ، و ضربناها للثلاثة متاع الصباح تنكيت وتفدليك ، و كيف حسينا بالتعب ، تزرفنا لهاك "الخيمة" .

" الطاقة القصوى متاع الاستيعاب هي ثلاثة من الناس في وضعية معوجة ، يلزم زوز يباتو البرا .
ولى تعرفشي كيفاش ، نعملو كيف جماعة الجيش ، زوز يعسو البرى على ما ياتي ، وثلاثة يرقدو ، وبعد نتبادلو المواقع باش ما يبات حد مكرز . "

هذي آخر حاجة نتفكرها كي فقت الصباح والصيادة يتشوحرولنا ، شبي والديهم هذم ؟
خرجت باش نعمل غطسة خلي واحد يفيق ، و انا راجع للباراسول فهمت الحكاية ..

5 دبابز "فان بلون" و 10 بوات مطيشين قدام الباراسول.. والجماعة مطيشين بحذاهم..
لميت هاك الآثار و هزيتهم للغابة..
و فيقت لولاد باش نمشيو نفطرو في الكرنيش متاع " ظهر عياد" ..
هزينا دبشنا وانطلقنا على بركة زيوس ، ملا كلتة حاسيلو..

* * * *

اغلب القهاوي كانت مسكرة ، ما عدى قهوة وحدة جاية في أول الكرنيش ، تعدينا للعطار خذينا ياغورت وفطاير ، و طلعنالها .
هبطنا قهاوي و طحنا نجرشو كي المتوحشين .
هزيت راسي للتلفزة ونشوف اسامة ملولي وميدالية ذهبية تتدلدل في رقبتو .
دزيناه لولاد !!

عمركم ما تتصورو الفرحة إلي فرحناها الصباح هذاكا ، خونا بصة تبرنشا مع كومندو كي العادة ، واحنا طحنا نهنيو في بعضنا .
على الأقل يا دين الرب ، فمة واحد عربي شرفنا.
عدينا نهارنا نعومو ، البحر ركح شوية نهارتها ، وكيف قرب الماتش متاع الجمعية تعدينا كلينا كسكروتات وطلعنا للقهوة ركشنا غادي وكلنا أمل في نتيجة اجابية .
للأسف الأمور ما مشاتش ، اوزاغي زالع ربها كي العادة ، والولاد فاشلين وسي المويهبي معاقب..

****

اقترح احدهم باش نرجعو للمستير نعديو ليلتنا غادي ، الفكرة باهية اما خطيرة شوية .
البحر هذا مرتاديه بدرجة اولى هم من اولاد البلاد ، وماعندوش كياس واضح يهزلو ، يلزمك تقص على غابة باش توصلو ، بعيد على كل المرافق الحيوية و مافماش تغطية أمنية ، يعني مرتع آمن للمنحرفين .
أما قلت واحد يكمل المغامرة متاعو على قاعدة..
وصلنا قبل غروب الشمس بشوية ، سقّينا منقبة بالحجر والتعب عامل بعمايلو..

عملنا دخلة باهية خرجنا منها بالزك ، نصبنا هاك الباراسول وشعلنا شمعتين باش ما نجلبوش الانتباه.. وبعد لحظات طاح الليل..

حلينا شربنا الي تبقى ما عدى خويا الي ماحبش يشرب ليلتها وتبرعلنا بدبوزتو..
ومع نص الليل هكاكة ، حسينا انو فمة واحد ناقصنا..

هالنمي وينو جمال ؟؟؟

ايوااااااش هاو فيلم رعب صحيح..
كل مرة باش ينقصلنا واحد ،
هزينا بورطالواتنا وتفرقنا زوز زوز نلوجو عليه..

" يا دجوووووووووو وينك نعمبو والديك "

وهو حب يجاوب ؟
بدينا نحسو جديا بخطورة الموقف ، يطلعشي مشى يبشول وبراكوه غادي ؟
رجعنا لباراسولنا نفكرو في حل ، وقتلي شعرة برك لا كلمنا الحاكم ، خرجلنا مالغابة شايخ وجعبو محلول كيفاش تفجعنا عليه..

ليلتها عطيناه طريحة وطيشناه في البحر..

رجعنا للباراسول نفبريو بالبرد ، ريح وبرد ، ظلام دامس ، خدوش وجروح تعلو أجسادنا ، و كلاب تنبح ، و لا اثر للحياة ، لا اثر للبشر...

فكرت مليح في الوضعية ، ما عادش عنا كان حق الكار ، يعني مستحيل باش نبقاو حتى لبعد غدوة بلاش ماكلة وماء ودخان ، الحل الوحيد هو الكار متاع الستة ، بالعربي الحل الوحيد هو انو نشقو هاك الأدغال مع الأربع متاع الصباح...

توكلت على ربي وقلت يلزم الجماعة يعرفو الحقيقة هذي..
اقترحت عليهم الفكرة..
و كانت الإجابة : صمت مطبق..

****

بعد ربع ساعة من التفكير ، أدرك الجميع أن لا حل لنا غير هذا.. لمينا دبشنا و هزينا طرف عصي و كرود و توكلنا باتجاه الغابة ، شديت المقدمة بحكم معرفتي للمنطقة ، قبل ما يزلعني خويا ويقترح باش يقودنا هو لأنو الصاحي الوحيد بيننا..
استحسن الجميع الفكرة رغم أنها لم ترق لي..

- " يا ولدي مثبت تعرف الثنية ؟ "

- "أي بالطبيعة نعرفها.." ( قال لي و التفليم باد على محياه )

- مشات معاك ، انطلق مالة..

بعد نصف ساعة من السير ، وصلنا لمفترق فيه زوز مسالك ، يعمل هكة ويكسر للثنية الي تطلع للجبل .
" يا ولدي وين ماشي من غادي ؟ "
الجماعة بصوت واحد كي كورال البحيرة " اص مروان.. انت بالعو "
ضميت فمي كي الناس الملاح... وقلت برى خلي يترباو..
نص ساعة أخرى من المشي ، ولا ديار ظهرت ولا غابة وفات..

بالعكس كثافة الاشجار ماشية وتزيد ، و الصعدة بدات تاخو في حدة اكبر..

وفجأة

ومن دون سابق انذار

يتعدى خويا عجاجة قدامي..

" اجريوو نـ**و يا لولاد "

- شبي ربو هذا ؟ باز يحشي فيه ويمارس في هوياتو المفضلة "اللعب الماسط"..

غزرت قدامي..

و على غزرتي يا بو قلب ،،،!

نلقى زنس حنش متعدي قدامي... أكحل واصفر ويعمل 3 ميترو ، الديامتر متاعو حاسيلو يسكر فوهة متاع مدفع..
رمينا هاك الأسلحة البدائية إلي كنا ناوين نواجهو بيها الأشكال هاذي.. وعينك ما تشوف النور لقينا رواحنا في البحر من جديد..

و اعلنا بصفة رسمية انطلاق فعاليات مهرجان الاغنية..

" نعمبو هاليلة الكلبة " " نيـ**ي كان مزلت نجي " " كي نروح باش ناخو باكو لام نشلط ترمتي " " امي القـ**ـة تنـا**ت اليوم " " اه ربك تحشا " الخ

بعد ربع ساعة من اللطم استرجعنا رباطة جأشنا ، الساعة تشير للخامسة إلا ربع ، مزال عنا وقت باش نخلطو..
" لولاد كوراج.. نجمو نخلطو عالكار غير تبعوني برك "

غزرنا للغابة بعد ما خذينا نفس عميق ، وعقدنا العزم على أن لا نبيت إلا في تونس...

بدينا نمشيو وكل واحد خايف من حاجة ، أنا مالحلالف ، وخويا مالحنوشة ، والي بجنبو مالعبابث والرهابين ، والي بحذاه مـ "الآخرون" متاع لوست..
وصلنا الخمسة ونص في حالة انهيار كلي ، وفرحة حقيقة برؤية أول منزل..
فمة جامع قريب قلنا نتعداو نعملو فيه غمضة مادام وصلت الكار ، دخلنا لغادي مع صلاة الفجر ، لابسين شورتوات و باراسول في ايدينا وريحة "الفان بلون" تضرب تعمي..
فرشنا الملاحف وتكينا ريوسنا...

* * *

مع الستة و نص فقت على صوت تربريب خونا جمال..
نلقاه مقعمز ومغطي بالملحفة وقريب يبكي ، و الدنيا ضاوية..
إننا بصدد التعرض لحشوة أخرى من العيار الثقيل..

الكار هربت علينا !

درنا القهاوي الكل نسالو على حل لمصيبتنا.. الكل اجمعو على انو عنا خيار واحد ، كار متاع راس جبل الي تخرج التسعة ، و راس جبل هاذي تبعد على رفراف 8 كيلومتر باش نقطعوهم كعابي..

* * *

بعد ستة سوايع وصلنا لتونس..

دقيت الباب ، حلتلي أمي ،

- " أهلا وليدي نعبيلك تفطر هاو عمتـ.... "

وما سمعتش البقية..

فقت كاس ماء بالسكر بحذا راسي ، قمت دوشت وفطرت ورقدت...

قمت من غدوة العشية عملت سويعتين سياقة تمهيدا لامتحاني المرتقب نهار الجمعة هذا ، و مع الستة ، تلمينا كلنا في القهوة... نبرمجو وقتاش نعاودوها..!!!!

...

كم مرةْ.. ستسافر الثورة ؟

...

بحزن شديد ، تلقيت قبل قليل خبر عاجل يفيد بوفاة الشاعر العظيم محمود درويش بعد عملية أجراها في أمريكا .
بطبيعة ما ثماش كلام ينجم يوفي للراجل هذا قدرو..
عشرة أيام خيالية مع أصدقاء السوء في البحر تنحى التأثير متاعهم مباشرة تو كيف جيت و حلّيت التلفزة .
يظهرلي مكتوب علينا باش نترزاو في كل مبدعينا فرد ضربة ، فبعد يوسف شاهين ومصطفى العقاد ونجيب محفوظ وغيرهم ، جاء دور محمود درويش وهو قلة من العمالقة الذين بقوا في عالمنا العربي بعد الصحوة" الرملية الحديثة" .

ما نعرفش علاش نحس إلي مستقبلنا معفّط و عاطي عالأكحل ، وباش يشهد مزيد من الزحف الرملي على أوطاننا وشعوبنا.
و باش يشهد كذلك تراجع كبير في الذوق والذكاء والجمال والفن ، خاصة مع صعود الأشكال هاذي إلي تتصرف على أساس أنها في دار السيد الوالد ، تقرر شنوة إلي يصلح وشنوة إلي ما يصلحش في عوض راهم يعملو في الأشغال الشاقة في الحبس كان جاء فمة طرف عدل في هالدنيا الكلبة .

محمود ،

لك المجد ،

سنذكرك حتى وان لم يذكر الزيتون غارسه و يتحول الزيت دمعا ( ونترزاو في هاك الحنينات الي نلقطو فيهم من بيعان الزيت للروامة )

تعازي الحارة لشعبنا العربي .

- اروع قصيدة تخليدا لذكراه

سجِّل! أنا عربي

ورقمُ بطاقتي خمسونَ ألفْ
وأطفالي ثمانيةٌ
وتاسعهُم.. سيأتي بعدَ صيفْ!
فهلْ تغضبْ؟

سجِّلْ!

أنا عربي
وأعملُ مع رفاقِ الكدحِ في محجرْ
وأطفالي ثمانيةٌ
أسلُّ لهمْ رغيفَ الخبزِ،
والأثوابَ والدفترْ
من الصخرِ
ولا أتوسَّلُ الصدقاتِ من بابِكْ
ولا أصغرْ
أمامَ بلاطِ أعتابكْ
فهل تغضب؟

سجل
أنا عربي
أنا اسم بلا لقبِ
صبورٌ في بلادٍ كلُّ ما فيها
يعيشُ بفورةِ الغضبِ
جذوري...
قبلَ ميلادِ الزمانِ رستْ
وقبلَ تفتّحِ الحقبِ
وقبلَ السّروِ والزيتونِ
وقبلَ ترعرعِ العشبِ..
أبي.. من أسرةِ المحراثِ
لا من سادةٍ نجبِ
وجدّي كانَ فلاحاً
بلا حسبٍ.. ولا نسبِ!
يعلّمني شموخَ الشمسِ قبلَ قراءةِ الكتبِ
وبيتي كوخُ ناطورٍ
منَ الأعوادِ والقصبِ
فهل ترضيكَ منزلتي؟
أنا اسم بلا لقبِ

سجل
أنا عربي
ولونُ الشعرِ.. فحميٌّ
ولونُ العينِ.. بنيٌّ

وميزاتي:

على رأسي عقالٌ فوقَ كوفيّه
وكفّي صلبةٌ كالصخرِ
تخمشُ من يلامسَها

وعنواني:

أنا من قريةٍ عزلاءَ منسيّهْ
شوارعُها بلا أسماء
وكلُّ رجالها في الحقلِ والمحجرْ
فهل تغضبْ؟

سجِّل
أنا عربي
سلبتَ كرومَ أجدادي
وأرضاً كنتُ أفلحُها
أنا وجميعُ أولادي
ولم تتركْ لنا.. ولكلِّ أحفادي
سوى هذي الصخورِ..
فهل ستأخذُها
حكومتكمْ.. كما قيلا؟

إذن

سجِّل.. برأسِ الصفحةِ الأولى
أنا لا أكرهُ الناسَ
ولا أسطو على أحدٍ
ولكنّي.. إذا ما جعتُ
آكلُ لحمَ مغتصبي
حذارِ.. حذارِ.. من جوعي
ومن غضبي..

..

و لا بد للقيد أن ينكسر...

...

ها قد فعلها الرجال..

شكرا للمقاومة اللبنانية العظيمة التي أكدت مجددا أن الانتصارات لا تُسطر بغير البنادق..
إذا حكيت بالألماني مع فرخ ما يعرف كان العربية ، كون واثق انو باش يقعد مبهم فيك و مش باش يفهمك..
وممكن حتى يعطيك طريحة .
إسرائيل دولة لقيطة نشأت بالقوة ، وتربت على القوة ، و عاشت بالقوة...

إذن ،
فهي لا تفهم غير لغة القوة..

المفاوضات بدون أوراق ضغط على الأرض هي حكاية أكثر من "بيدونة" لن تؤدي إلا لمزيد من الذل وضياع الحقوق..
نتمنى على العرب ( ضحايا الصحوة الإسلامية خصوصا ) باش يفيقوا على رواحهم ويتوقفو على الصيد في الماء المعفن متاع الطائفية..

كما أتوجه " لمثقفي" العصر الجدد ، منظّري فلسلفة الانبطاح ، بأحر التعازي لسقوط آخر معاقل نظريتهم التعيسة المرتكزة على شعار "رفع الأرجل حتى النصر"...

ونقلهم راهو كان باش تواصلو هكا ، من الأحسن تحجزوا بقعة من توة في مزبلة التاريخ إلي باش تلمكم كيما لمت غيركم في دول العالم إلي عانت من الاستعمار ومنها فرنسا والفيتنام والجزائر...

تحية كبيرة ومن الأعماق للقائد العظيم حسن نصر الله...
و للشهداء التونسيين الثمانية..

و إلى كل المحررين ،
الأحياء منهم والمنتقلين إلي عالم الفناء..

عاشت المقاومة ،
عاشت الحرية..

..

لاصوت يعلو فوق صوت الشلبوق...

...

كانت البداية على الساعة الرابعة مساء ، عندما انطلقنا نحو مغازة كارفور الغير بعيدة لاقتناء ما يلزم استعدادًا للمباراة المنتظرة على الساعة السابعة .

المرة هاذي ، برشة امتنعوا عن الشرب قبل المشيان "للبارتي" ، أغلبيتهم لأسباب مادية ، حتى الزوز الي مشاو معايا كانو باش يبطلو في آخر لحظة ، ثم تراجعو عن قرارهم كيف شافوني داخل مع سابق الإصرار والترصد ، منتفخ الخصيتين امشي ، في يدي هاك "البانيا" الحمرا ، و الدجاج الأكحل يمارس في طقوس الحج متاعو حول رأسي ..

الأسبوع إلي تعدى ما كانش باهي برشة ، خالتي تعدّات لعالم الفناء بعد صراع طويل مع المرض ، أعز طفلة عرفتها ونعتبرها أخت حقيقية مشات مع والديها وتروّح بعد 15 يوم ، إلي تقلو هيا نبحروا يقلك خلي غدوة ، الإمتحان التطبيقي متاع الرخصة حطوهولي في آخر أوت... الخ

كيما تشوفو ، وضع مُكرز كيما هكة نتصورو يعطي دافع كبير للمرء باش يمارس الطقوس الروحية متاعو خاصة كي يبدى عندو جمعتين على آخر دبوزة ، لهذا ، ما خرجت من كارفور إلا وفي يدي وحيدة "فان بلون" وكعيبتين بوات ، بلعة عيار متوسط متاع واحد ماشي باش يقابل جمعيتو..

خويا ، والجماعة الاخرين خذاو الكار ومشاو ، فيما ركش ثلاثتـنا في البقعة متاع العادة المجهزة بكل أنواع الرفاهية :

ياجورات و باب حديد مطيش ، وطرف حشيش منا ومنا يضفي نوعا من التلقائية على القعدة..
بعد ما كمّلنا ، شدينا الثنية لهاك المحطة ، أو بالأحرى العرصة الصفراء متاع 47... كانت الساعة تشير إلى السابعة إلا ربع ، مما يوحي بدنو حشوة مرتقبة..

سألت واحد قاعد على ياجورة بحذايا ( كتعبير دقيق على الموقف ) هل عندو برشة يستنى و إلا لا..؟
و يتطرشق المسكين ، بحيث فمة برشة سبان ماكنتش نعرفو تعلمتو من عندو..
أنا متأكد لو كان يعطيوه حزام ناسف ما يفجر روحو في وزارة النقل (:

الي يفرح في الحكاية هو انو قد ما تطول المدة الي ستناها واحد جاء قبلك ، قد ما تتضاعف فرصة قدوم الحافلة..
وهذا إلي صار ، بعد دقيقتين فقط لاحت من بعيد..

كيف طلعت ، كنت محظر روحي باش نشري عركة مع الخلاص ، لأنو في وضع كيما هكة حقهم هوما إلي يخلصونا مش أحنا...
تعديت على روحي وقلت إن شاء الله ما يكلمنيش برك ،
و حسنا فعل.. (:

* * *

في وسط 47 ، لفت نظري صورة طفلة في حجر أمها ما ريتش وحدة في برائتها ، قلت لازم ناخذولها تصويرة..
يا إما تكون راقدة ، يا إما تكون إحدى ضحايا التسمم بثاني اكسيد الضبوط (وهو الخيار الأرجح )..
( مع احتفاظ بيغ تراب بحقوق الملكية الفكرية لهذا المصطلح )..

وصلنا للمنزه ربع ساعة بعد انطلاق المباراة ، هبطنا من الكار وطحنا نتجاراو كي المهبلة ، تحت وابل من تربريب الزملاء على أفكاري إلي خلاتنا نوصلو المخّر..
كيف لقينا بقعتنا في البلوك 15 مشدودة وتستنا فينا ، والنتيجة صفر لصفر ، ولاو يطلبو في السماح (:

* * *

كان مردود الفريق متواضع جدا ، ماكانش فمة "موتيفاسيون" رغم الحضور الغفير للجمهور ، أداء معفّط بامتياز لـ"جينيور اوزاغي" و غياب يوسف المويهبي..

في الشوط الثاني ، و بعد التشعيلة متاع الفلامات ، حدث الذي جعل مني اكتب هذا المقال...

خويا إلي حكيتلكم عليه ، طفل مهبول بحب الإفريقي ( وهو إلي غرّمني بيها "دايور" ) يتحرم من نصف الشوط الثاني بدون أي موجب وبطريقة في غاية الصفاقة...
طلع واحد لابس سورية زرقاء مع عون أمن للبقعة متاعنا ، وقف بحذا خويا ، غزر لوطة لجماعة الشرطة الفنية وقاللهم هذا هو ؟
جاوبوه "أي" بريوسهم...
يعمل هكة و يقلو " قدامي"..

مشيتلو بكل لطف و قتلو :

" يا ولدي راهو خويا هذاكة مشيش تطلع غالط فيه، عاود شوف الفيديو تعمل مزية.."

يعمل هكة ويسبقلي ضربتين بالجهاز اللاسلكي متاعو على صدري التراس متاعهم لتوا ظاهرين..

قالي :
" رب فمك تسكرو وإلا تخلط عليه.."

جبدني واحد من صحابي وقالي :
" ما دخلش روحك أتو يسلكها.. كان يشمو عليك الريحة مـ***ـة عليك "

ضمّيت فمي كيف الناس الملاح ، وقعدت نتفرج في خويا يجبدو فيه قدامي و أنا عاجز عن فعل أي شيء..

أول سؤال سألتو بعد ما تنحى مفعول الصدمة هو :

علاش ؟؟

الطفل عاقل وظاهر صغير..
منحي مريولو و مطول شعرو صحيح ، أما على حد علمي "اللوك" هذا تنجم تلقاه في الفيراج الكل..

بأي منطق تحرم واحد دافع فلوسو من مشاهدة بقية المباراة بدون أي موجب ؟؟

أنا قاعد بحذاه قد قد.. ونأكدلكم انو لا عندو "فلام" و لا عمرو شد كعبة في يدو...
أكثرية العباد إلي طلعوهم في "الباغا" (حسب ما حكالي خويا بعد).. كانو مظلومين وظاهرين ولاد نظاف..
إذا الحكاية بالكيفية هذي ، علاش عاملينلنا كاميروات تصور ماللوطة و شرطة فنية و ريق بارد ؟؟
منو هكة ، اعملو دورة في الستاد والطحان إلي مايعجبكمش ضَيفوه بحذاكم و بنقص شهاري زايدة..

كي وفى الماتش ، مشيت مع الولاد لأحد الأعوان أو بالأحرى هو طلعلنا ، كان مختلف جدا عن صاحب السورية الزرقاء ، ما كانش عندو هالتكبر و هواية الخريان على الشعب إلي عند الكبار ، حكيتلو الحكاية.. قالي :

" توا يعديوهم للمنطقة ، و بعد ممكن يبيتوهم في الحبس.. مالأحسن تعيط لبوك يشوف حل... "

تسلفت بورطابل من عند ولد حومتي باش نكلم الوالد نلقاه مسكّر...
تحشاااا والحمد الله ، قلت في نفسي...
الفيكس مقصوص عندو نهارين ، وأمي في البلاد لوفاة أختها كيف ماحكيتلكم ، حاسيلو تسكرت بالضبط..
بعد كي جيت نخمم قلت هاي جات بطبيعتها ، الحل الأمثل هو أني نروّح نحكي الحكاية مباشرة لبابا خير برشا من التلفيون... وهذاكا الي صار..
خذينا تكسي وصّلنا للحومة بعد ما حشاهولنا في أربع دنانس ، شريت وحيدة سكر فاني عالريحة ، وتوكلت على ربي..
أنا داخل للبلوك نلقى "الاسنسور" مكسر..
ترصيلي طالع للسادس على سقيا.. ) :

بعد ان التهب **** ، لقيت روحي في السادس...

هدّيت على الوالد.. نلقاه ناصب كعيبات مسكين ،
صبيتلو الحكاية فيسع لأنو الوقت بدا ينفذ وما يكفيش للتمهيد النفسي..
لبس حوايجو وخرج يكفر على رب الإفريقي.. زيد هو مكشّخ عاد ، مانحكيلكمش آش صار فيه...
وصلنا للمنطقة مع زوز من ولاد حومتي ، هبطت أنا وبابا..
المركز كان معبـي بصفة غريبة ، برشة أولياء غادي ترزاو في نهار راحتهم و رصاتلهم يحربطو على ولادهم ،
قرابة عشرين واحد مسلسلين " بالمونوت" ، فرخ صغير مزال حتى ما بلغش مسلسلينو زادة ..
واحد مسكين يخدم على روحو.. بييع في الكاكي في الستاد ، قالولو صحّح ، قاللهم " نا لا نحب لا الكليب لا سوسة جاي نخدم على روحي " ، على الكلمة هاذيكا كسرولو خشمو باللاسلكي ( الله لا تربحك في هالاختراع يا ماركوني )...
حاسيلو ، حالة احتقان شديدة عمت المكان على هالتصرفات المجودرة لفظيا وجسديا متاع الحاكم ولو أنها مش حاجة جديدة...
حتى آخر لحظة من المفاوضات ، سيبو كان ثلاثة برك ، خويا و زوز أخرين ،...
و أحنا خارجين ، مالقيت مانقول كان "ربي معاكم لولاد ".. للي اختارهم القدر باش يتضيفو في شونبر زوز ميترو على ثلاثة مع "بونسيون كومبلات" ، طرف خبز وكعبة زيتون ونص كعبة بصل...

الحي يروح و اكهو..

...

made in Badw center

...

اليوم عملت تنقيزة " للاوتو ايكول" الي بحذانا باش نعمل سويعة كود أخرى قبل الامتحان المرتقب نهار 7 جويلية .
كي وصلت ، ضربت قرابة ساعة غير ربع نستنى في "المونيتور" ، السيد طلع مزال يكخ في النوم..
الأمر هذا مش مستغرب ، فاحترام المواعيد حاجة دخيلة علينا نحن العرب ، ومصنفة كجريمة يندى لها الجبين عند البعض..
كيف جاء ، حطلي هاك "البروغرام" متاع امتحانات الكود وبديت نجاوب على بركة الله..

إلي لاحظتو بصراحة هو انو فمة برشة أسئلة معوجة وتفتقد للمنطق ، قول عليهم حاطينها بالعاني باش يـبزلو أكبر عدد ممكن من المواطنين ويرزيوهم في فلوسهم..

مثلا يجي يقلك :

كيف كرهبة تعمل حادث على طريق سيارة ، يوضع مثلث الخطر من الأمام والخلف أم من الخلف فقط ؟
أي واحد بمخو باش يجاوب من الخلف فقط لأنو المثلث إلي من قدام ما يصلح لحتى شي بحكم اننا في طريق سيارة ذات اتجاهين وكل اتجاه مفصول على خوه ... رغم ذلك كانت الإجابة من الأمام والخلف..!

سؤال آخر :

مصاب مغمى عليه ، هل أعطيه الماء ؟ عطاك زوز إجابات

- لا

- إن هو طلب ذلك

ونحب نفهم بجاه والديكم كيفاش واحد دايخ ينجم يحل جلغتو ويقول عطيوني ماء ، الدايخ ينجم يحكي هو وإلا يحس بالعالم الخارجي من اصلو ؟؟؟؟

بالطبيعة هذي عينة بسيطة مالعوج الي ريتو في هاك الأسئلة ، والي خلاني نشعر بحالة إحباط بصراحة وخايف من حشوة متوقعة في امتحاني المرتقب...

ما طلعتش فوق 23 على ثلاثين في الاختبارات إلي عملتهم اليوم ، رغم انو عندي عامين نسوق بلاش "بارمي" ، و عندي فكرة جيدة على قانون الطرقات ، وفي العامين هذم مانتفكرش كان زمر عليا واحد رغم الي التوانسة عندهم عشق فريد للمنبه الصوتي...

اغلب الأخطاء متاعي كانت تتعلق بالعقوبات الخاصة بجرائم الجولان ، وشنية الجنحة وشنية الجناية..
وشنية المخالفة الخطيرة والمخالفة العادية..
وقداش تشد حبس كيف تسوق وانت بالعو ( بيناتنا هذي برك الي شديتها ههههه )
من غير ما ننساو هاك الأسئلة إلي تخص الزيت والعجالي متع وذني...

مختصر الحكاية ، ربي يستر واكهو..

عاد و انا نخمم في هاك الكرهبة متاع الوالدة كيفاش باش يولي عندي الحق في سياقتها من غير ما نبدى مفجوع مالحشوات الحكومية والأبوية ، تفكرت هاك النكتة الي حكاهالي صاحبي -الله لا تربحو- في وسط ساعة المات وشوية لا طردوني في جرتو ،.. قالك مرة محمد يجري في الجنة بالكرهبة متاعو وباعث رب إشارات المرور الكل ، وَقفو جبريل قيدلو خطية ، تعدى موسى كيف كيف نفس الحكاية ، جاء عمكم عيسى بالبورش متاعو شوية لا عفس دين والديهم ، السيد يلوح في 300 وجبريل ما حلش فمو ، دارلو موسى يحتج ، قالو جبيرل " سكر فمك يا ولدي .. نلعبو بخبزتنا ، مافي بالكش بيه ولد المعلم ؟ "

هي صحيح النكتة ماسطة شوية أما هي إلي كانت السبب في كتابتي للتدوينة هاذي اليوم..

كيفاش المسلم ينجم يحصل على كل شي الفوق ؟

كيفاش واحد مهبول بالكراهب ينجم يدخّل الحضارة لمكان بدائي ؟
ما تلاحظوش الي العصر هذا ماهوش "كومباتيبل" مع صفات الجنة ؟
كيفاش تنجم تمارس القفز في الجنة ؟ فن الرسم ؟ عشق الألعاب الالكترونية.. كل الهوايات الحديثة باختصار ؟ زعمة تنجم تحصل على خط "دسل" رباني الفيتاس متاعو 1000 جيغا في الثانية ؟

لو ألقينا نظرة بسيطة على الجنة إلي حضرهالنا ربي نلقاو أنها مجرد انعكاس لأقصى طموحات واحد بدوي صحراوي في ذلك العصر..ومن المستحيل باش تكون انعكاس للإله الأزلي خالق الإنسانية .
هذا المكان ، حسب رأي وحسب رأي الكثيرين هو مكان مثالي للملل والرتابة الفظيعة...

نبداو بالعناصر الرئيسية إلي يفتقدها البدوي اشد الافتقاد و نلقاوها حاجة رئيسية في الجنة..

عنصر الماء :

كيما تعرفوا ، أكثر حاجة تغلغلت في ثقافة البدوي العربي هي مسالة قيمة الماء..
القيمة هاذي ما جاتش من فراغ ، لا بل هي انعكاس طبيعي لندرة هذه المادة في تلك الجزيرة القاحلة..
أينما نظرت كان الرمل ، بئر أحفوري واحد تبولت فيه هوايش ربي الكل قد يشعل حربا بين قبيلتين ،
وبالتالي فان حاجة هذا البدوي إلى الماء الدائم الذي لا ينقطع جعله يحلم بمكان " تجري من تحته الأنهار خالدين فيه أبدا "... (:

ممكن أكثر من تسعين بالمئة من الحالات الي تذكرت فيها الجنة في القرآن تذكر معاها الماء ، والحكاية هاذي ما نتصورش كان جات من فراغ..
هي ماتعني حتى شي لواحد سويسري مثلا ، وإلا تونسي عايش في كنف الصوناد -حفظها الله- ، وإلا أي شعب آخر واصلو الماء لحد باب دارو..
لكنها تكشف بوضوح معاناة البدو الازلية مع جزيرتهم.. وكيف يمكن للقادة الاذكياء ان يستغلوا هذه المعاناة لقيادتهم كالقطيع..

الظلال :

مسألة الوهج والحرارة الشديدة للجزيرة العربية كانت إحدى الأسباب التي دفعت هذا البدوي لأن يتمنى حديقة وأشجارا وارفة الظلال تقيه هذا الحر وهذه الشمس اللعنية فوق رأسه...

" إن للمتقين مفازا ، حدائق وأعنابا " النبأ

أو هذه الآية

(( وأصحاب اليمين ، ما أصحاب اليمين ، في سدر مخضود ، وطلح منضود ، وظل ممدود ، وماء مسكوب ، و فاكهة كثيرة ، لا مقطوعة ولا ممنوعة ، وفرش مرفوعة ))

أو هذه

يس" هُمْ وَأَزْوَاجُهُمْ فِي ظِلَالٍ عَلَى الْأَرَائِكِ مُتَّكِؤُونَ"

الحدائق إذن.. وبالتعاون مع الأشجار.. تصنع هذا الظل !

اقرؤوا هذا الحديث من صحيح بخاري

حتى في الجنة ، وين من المفروض مايكونش فمة شمس من أصلو ، العربي في حالة اللاوعي متاعو ديما مفجوع ويلوج عالظل..

مسكين...(:

الجنس

كيما تعرفو الناس الكل ، الجنس عندو مكانة كبيرة عند عرب الجزيرة...
فإضافة إلى الكحطة الفطرية إلي يتميزوا بيها ، يمثل الجنس أيضا رمزا لفحولة الرجل وقوته ، وعلى هذا الأساس ، انطلقت التخيلات البدوية لترسم صورة مغايرة لنسائهن اللاتي فعلت قساوة الصحراء بهن ما فعلت ..
الحور العين ، كائنات في منتهى الرقة والنعومة ، يشعن بياضا (كأنهّنَّ الياقوتَ والمرجان) سورة الرحمن.. ، عندهم "بواترين" يا لطيف.. "كواعب اترابا" ، مايفقدوش العذرية متاعهم أبدا ، مايكبروش ، ديما شباب ، حارت العقول في وصفهم...كيف تنقز عليك وحدة تعملك "فيلاسيون" تنسى رب العالم الخارجي ..
و حسب الحديث هذا ، كيف تعمل وحدة منهم طلة علينا ، الريحة متاعها تسكر البلاد ، والنور المنبعث من جسدها يضوي الدنيا ( يظهرلي هذا حل ناجع لمشكلة الطاقة.. ادعيو لربي يبعثلنا وحيدة خلي نستغناو على الإنارة العمومية )...
مزالو مالباكو وماهمش "اوكازيون" ، وما يغزرو لحتى حد بخلاف راجلهم ( عقلية عربية بحتة) " قاصرات الطرف لم يطمثهن انس قبلهم ولا جان " الرحمن 56

أنيك راجل في الجنة عندو 72 منهم (رابط الحديث)...!
كل راجل ربي يعطيه قوة نكاح تساوي قوة مائة رجل... (رابط الحديث)

بالطبيعة باش ماتفدوش مالقراية ، هاو باش نتعدى للعنصر الي بعدو ، أما نعلمكم انو النصوص الي ادرجتها ما تجيش عشرة بالمائة من النسبة الجملية إلي خصصها ربي لمخاطبة الخصيتين عوض مخاطبة العقل...

الخمر واللبن والعسل

كلنا نعرفو انو اللبن هو الغذاء المفضل للبدوي ، وحكاية محمد مع اللبن حكاية طويلة ، ممكن قرابة عشرة أحاديث يتحدثو على فضائل اللبن و التمر ، وهذي حاجة طبيعية لأنو الدين هو انعكاس للمحيط إلي جاء فيه "بيانسور"..
الشراب زادة ، العرب كانو معروفين بحبهم وعشقهم للخمر ، وبرشة كتبوا فيه أشعار كيف أبو نواس ، و محمد باش يزيد يرغب العريبة فيه ، مشى حرم والديه في الدنيا قالك شنوة من عمل الشيطان فاجتنبوه... بالطبيعة في الجنة ماعادش من عمل الشيطان...!

العسل زادة حاجة هايلة و كانت حكر على الأمراء والملوك.. جاء عمكم محمد طلّع والديها للجنة..

قال تعالى : (مثل الجنة التي وعد المتقون فيها أنهار من ماء غير آسن ( متعودين بالسبخ مساكن ) وأنهار من لبن لم يتغير طعمه ( كان يفزدلهم بالسخانة بلاش فريجيدار ) وأنهار من خمر لذة للشاربين وأنهار من عسل مصفى ) محمد: 15

* * *

بعد ما كملنا هالعناصر الرئيسية ، باش نزيدو نشوفو بالتفصيل البصمة البدوية العربية الواضحة في صفات الجنة ،

ونبداو بالعنصر الأول وهو :

الأنهار..

ايا سيدي قالك كيف محمد ركب على هاك البهيم المجنح التابع "لوكالة براق الفضائية" ، ومشى يعمل في طلة على الجنة ، لقى زوز انهار مالدنيا وزو مالجنة ،

تعرف الي مالدنيا اش اسمهم ؟

النيل والفرات... هههههههه ( وهذا رابط الحديث)

الحوريات :

الجمال العربي

في معنى الحور العين

الحور: جمع حوراء وهي التي يكون بياض عينها شديد البياض، وسواده شديد السواد .

العين: جمع عيناء ، وهي واسعة العين

بالطبيعة هاذي مواصفات الجمال عند بدو الجزيرة..

البكارة..

( إنا أنشأنهن إنشاء ، فجعلناهن أبكارا ، عربا أترابا ) الواقعة

والعرب أي المتحببات إلى أزواجهن، وكونهن أبكارا يقتضي أنه لم ينكحهن قبلهم أحد كما قال تعالى

" لم يطمثهن إنس قبلهم ولا جان "

كيما تعرفو ، مع البكارة والعذرية ، العربي ما يبوجيش..(:

الولاء

"قاصرات الطرف".. أي اللاتي يغضضن أبصارهن ولا ينظرن لغير بعولهن.. ( يعني حتى الغيرة والحزارة ماهيش ناوية باش تتنحى في الجنة..)

غيرة الحورية على زوجها

اقراو هذا الحديث إلي يستحق جائزة أكثر الأحاديث تعفيطا و احتقارا للمرأة..

* * *

السكن :

( فيهن خيرات حسان ، فبأي آلاء ربكما تكذبان، حور مقصورات في الخيام )

ياااااااااااااا والله مهزلة

حتى من الخيمة طلّع ربها للجنة الإلهية !!!

يحب يقلك بلغة اخرى " عيونهم سود و ركشو في الخيمه"

ربي يحكي وإلا محمد ؟؟؟؟؟؟

خيمة ؟؟؟؟؟؟؟؟؟؟؟؟

بدون تعليق..!

العلفة :

علفة أهل الجنة تتمثل في الفواكه واللحم ، لكن أي فواكه و أي لحم ؟؟؟؟؟

المأكولات البحرية ما تذكرتش كطعام لأهل الجنة في حتى موقع ، بل عوضها لحم الطير ، و ما نتصورش كان لعباد الكل تحب تاكل الطيور ، أنا يا خويا نحب العلوش ، غيري يحب البقري ، واحد آخر يحب القرنيط..شعملنا فيهم هاذم ؟؟

الآية الوحيدة الي تذكر فيها اللحم هي هاذي :

" يطوف عليهم ولدان مخلدون، بأكواب وأباريق وكأس من معين، لا يصدعون عنها ولا ينزفون، وفاكهة مما يتخيرون، ولحم طير مما يشتهون " سورة الواقعة

في مايخص الفواكه ، صحيح تنجمو تقولولي هاو قالك " مما يتخيرون " ، يعني تنجم تلقى أي أنواع فاكهة ، أنا ما نحكيش على فمة وإلا ما فماش،

شمعناها تجي تقلي راهو الرمان والعنب من فاكهة الجنة ؟ والأناناس والمنغا والدلاع وين مشاو ؟
شمعناها ربي يذكر نوع ونوع لا ؟ مش تتسمى جهوية هذي (: ؟؟
يا خويا نوّع على الأقل و جامل الشعوب الاخرى وإلا مش لازم تذكر الأسماء ! هذا يسميوه تحيز لقوم معينين و ما يليقش بالخالق..
وبالمناسبة ، راهو الأكل غريزة للبقاء ، يمارسها الإنسان في حالة الجوع ، وكيف تحكي على الأكل في الجنة يعني ماك فاهم شي مالدنيا..!
فمة اله مخو محدود لهالدرجة ، ويوعد في الناس بالماكلة كمصدر سعادة أبدي ؟
علاش ياكل الإنسان في الجنة ؟
وشنوة الي يخليه ياكل في لحظة.. وفي لحظة أخرى ما ياكلش ؟
فمة حاجة تبدلت ؟؟؟ حس روحو جاع زعمة ؟
و إذا هي الحكاية بالسطحية هاذي.. فين تمشي الماكلة - حاشاكم- ؟؟؟؟

اللباس والذهب

( عاليهم ثياب سندسٍ خضر ٌ و إستبرق و حُلوا أساور من فضةٍ و سقاهم ربهم شراباً طهوراً ) سورة الإنسان

( و يلبسون ثياباً خضراً من سندس و إستبرق ) سورة الكهف

حديث 1

حديث 2

توة مش ريق هذا بربي ؟
لعباد كل لابسة بالأخضر كي الخدامة متاع البلدية ؟؟ (مع احترامي للمهنة)
مش شمولية لعينة هذي ؟ ناقص كان يجيبوبنا الاخ القائد فاتح الثورة يجي يخطب علينا...

ربي يشوف انو قمة السعادة إلي تنجم تحصل عليها هي كيف يلبسك كسوة خضرة..(:
الحكاية هاذي كيفها كيف مثيلاتها كي تجي تشوف، اللون الأخضر ما جاش بالصدفة..
البدو يشوفو كان في الأصفر قدامهم.. وجوهر أحلامهم وأكثرها طموحا هي الجنة الخضراء ، فمن الطبيعي أن يكون لبساهم اخضر.. لأنها ببساطة جنة البدو...!
الذهب والفضة ، فماش مادية أكثر من هكة ؟؟ تشرب في كيسان من فضة مزينة بالياقوت ، و لابس أساور من ذهب ، وبيت من الخيزران ، وتراب من المسك والزعفران...!
هكة ربي يشوف السعادة الإنسانية ؟؟ مش شي مقرف هذا ويخلي العبد يكفر على دين رب هالدين ؟؟

بعد ما تحدثنا عن كل العناصر المكونة لحياة البدوي والتي انتقلت إلى الجنة ، بقات حاجة وحدة والي هي الزوايد ، و يظهرلي تعرفو الحديث متاع الطائر الي يبدا متعدي مسكين ، وكيف تشتهيه يطيح بين يديك مشوي ، وإلا السبعين ناقة إلي باش تلقاهم في الجنة وتعمل بيهم مشروع و الا الخيول العربية الاصيلة..

باختصار ، الهوايش متاع البدو الكل طلعو الفوق !

من غير ما ننساو انو لغة أهل الجنة هي "العربية"..

مختصر الحديث

عيشتكم تتمثل في الاتكاء على الديفونات ، في الظل ، يدورو عليكم الغلمان باش يشربوكم الرحيق المختوم ، وتشربو من الأنهار كيف الزوايد (مع الاحترام ) ، خمر وعسل ولبن ، وتشمو في ريحة المسك والزعفران ، وكيف يطيح الليل تمشيو للخيمة تفتقوا مواهبكم...

حتى لوقتاش ؟؟؟؟

إلى الأبد !!!!!!!

يتعدى مليار سنة ، زوز ، بليار ، الوقت ماعندو حتى حد ، عيشة بدوية أصيلة الى ما لانهاية....!
تاكلو وتشربو وتمارسو في الجنس بدون حتى هدف ، بدون غاية ، بدون خط وصول ، لا عندكم ذوات مستقلة تفكر وتكتب وتسب هاك الوبش "عمار" (: ، لا فمة حياة اجتماعية ، لاسياسية لا فكرية لا ثقافية ، ما فماش انحراف ، ما فماش عرك..

كان الشرب والأكل والجنس...!

بعد مرور عشر سنوات في مكان كهذا ، أنا متيقن أيها القارئ الكريم ، انك ستسرق كأسا من تلك الكؤوس المعبئة بالرحيق ، وتحطمها فوق رأس أحدهم...!

لكن قبل ذلك (:

أبشرك أن لا وجود لهذا المكان...!
و شرط وجوده هو أن يكون الله بدويا من جزيرة العرب ، كتب خواطره حول هذا المكان قبل 1400 سنة..

دمتم

...

لو كانت يدي خوانجية لقطعتها..

...

مرت أربع أيام توة ملي روّح بابا من ايطاليا وأمي مالبلاد ، في الأربعة أيام هذم ، شديت الدار وقلت واحد ياخو كونجي بعد الأسبوع الجنوني الي عديناه في غياب الوالدين حفظهم الله ورعاهم..

كان انطلاق الوالد نحو ميلانو يوم الاثنين 23 من شهر جوان ، في رحلة عمل مع إحدى الشركات الايطالية مصحوبا بزملاء آخرين ، كان الهدف مزدوجا ، سياحة وتفرهيد و تبديل سروج و في نفس الوقت ، استعداد طبيعي لمجابهة مصاريف هذا الصيف...

بابا خبـير محاسب ، حالل بيرو في تونس ، و الايامات هذي ، الحرفاء متاعو وخاصة الأجانب بداو يشهدو تزايد كبير بحكم دخول تونس في مرحلة الاقتصاد الحر والشراكة مع أوروبا..

الوالد وهو "يكزيزتي"..

* * *

مع انطلاق الوالد نحو ايطاليا ، انطلقت في رفراف "أشغال" الاستعداد لزواج بنت خالي "سناء" .. وهو ما دعا أمي للذهاب لمساعدتهم في التحضير..

سناء طالبة مثقفة متخلقة ، طريفة الطبع ، لا تعيبها غير تلك الخيمة فوق رأسها ، تعرفت على قرينها عبر الانترنت ، ثم تطورت العلاقة بينهما لتتحول زواجا.. فهنيئا لهم.. (:

هو تونسي يعيش بأمريكا ، عاد إلى هنا في شكل آخر كما قال أهله ، لحية كثة و لباس أفغاني تقليدي..(:

انه احد ضحايا المدعوذين في الغرب الذين استغلوا الديمقراطية لكي يسلبو عقول الناس ويضحكوا على ذقونهم..

و رغم ذلك ، فهو يحافظ نوعا ما على قدر من حب الحياة يبدو جليا من حديثه ومن رحلة العسل المتوجهة نحو جزيرة جربة لا نحو "تورا بورا"..

آخر معاقل ذاته الإنسانية لا تزال في حالة صمود.. وقد لا تصمد طويلا

فقلة هم من ينتصرون في حروب كهذه..

* * *

* * *

في أول يوم فرغت فيه الدار ، عيّطت لأعز صحابي و ولاد حومتي ، عدينا أيامات ما نجمش نحكي عليها ، يضربني التقلص في المعدة كل ما نتفكرها ، وخاصة كيف نخمم كيفاش انو ظروف كيف هذي صعيب برشة كان باش تقع مرة اخرى...

كانت أيام رائعة بأتم معنى الكلمة ، تقاسمنا فيها الخبز والملح..

واحد يفصع يجيب فطور من دارهم.. ترصيلنا نعملو فيه كمية وهو في التوالات.. !

واحد يهبط يجيب باكو دخان.. يتكيف منو سويغر والباقي للمجموعة.. !.. والكثير من هذه المواقف.. ولا احد فينا احتج على ذلك..!

ماكانش فمة حسابات جملة... أبدا..أبدا كما تقول الست..

كنا كالإخوة.. في السراء والضراء.. حتى كيف بعض الطحانة لوطة هدّونا باش يخبـرو علينا الشرطة ، حتى حد ما هرب ، مشى في بالهم باش يلقاونا حالين وكرة دعارة ! قلنالهم اطلعو شوفو بعينيكم قبل ما تعيطو للمركز ، وتفاجؤو كيف لقاونا نلعبو في المونوبولي و ناكلو في البسكويت !!! الشقوفات مخبين وراء الديفونات بالطبيعية... هههههه

تي حتى كان شافوهم..!

الشرب في الدار مش عيب !!

واحنا ماقمناش بغير ذلك..(:

وبيناتنا ، نشعر بالفخر كيفاش انو في الأوج متاع الشيخة متاعي ما طلعتليش باش نوافق على توسيخ الدار باربعة ملاهط تعدى عليهم شعب كامل..

يلزمني نسكت توة ونخليكم مع التصاور خير

ولو أنهم حكاية فارغة مقارنة بالفيديوات إلي ماحبيتش نصبهم بحكم الخصوصية متاع العريبة..

يلعبو في المونوبولي بلاش فلوس..ههههه

نسينا باش نفرقوهم..

* * *

فيروز+ بربر.. فيزا للسفر نحو النجوم

* * *

هذي وحيدة "راد لابل" دبرهالنا الطفل الي شاددها تو..

حلف قال يلزم تصوروني بيها..(:

* * *

وهذي دبوزة الروج متاعي..

في ثالث يوم يظهرلي...

* * *

وهذي آخر قعدة..

شعلنا شمعتين وحطينا ام كلثوم.. مش نرمال هاك الليلة

* * *

في الليلة الرابعة على ما أظن ، تلعطتلي باش نحط " الد. فـ .د" ونتفرجو في "بهتـة" متاع نوري بوزيد..

أنا الشيخة متاعي صحيح كي تطلع نولي نموت على فيروز ، نولي نفدلك ، نولي مسحور بالمناظر الطبيعية..

أما حبـي للحياة زادة يعني كرهي لثقافة الموت ، ومن المنطلق هذا ، حبيت إلي ماتفرجش في الفيلم يتفرجش فيه ، والي تفرجش فيه يعاودو..

خلي يفهم شمعناها إستبلاه الناس.. وشمعناها دين.. وشمعناها إرهاب..

رغم انو الفيلم قديم شوية ، لقيت استحسان الأغلبية متاع الحاضرين للفكرة ، بما فيهم أخي الوحيد "فراس" (16 سنة) إلي معاود الفيلم للمرة مائة ، والي قاعد يصك في البيرة قدامي بكل أريحية ومن غير حشمة.. هههههه .. لماحالة هو ما حبش يعترف في الأول إلي انا شلقت بيه مرة "بالعو قنوط" ...

قتلو خويا ،،

راهو مش عيب.. ربي قال " واسكروا ولا تعربدوا والله لايحب المعربدين" ( هو مسكين يعرف كان سورة الفاتحة في بالو الآية موجودة بالرسمي هههههه )... وقتلو ، راهو كيف تشرب قدامي ، هذا ما يعنيش إنقاص من قدري ، رد بالك تخمم هكة سمعت ! التفكير المتخلف هذا هو نتيجة للغزرة الي تغزرها العريـبة للشراب ، بحيث لو كان الطاسة متاعهم جات أكثر تحررا وانفتاحا ، وترى الشرب حاجة عادية ، راهو يولي ماثمة حتى فرق في كونها قدامي وإلا مش قدامي ! كيفها كيف الماكلة...

هاو بوك وعمك تبارك الله عليهم بيناتهم خمسة سنين ، كونهم من مخلفات الحركة اليسارية الطلابية يحلقو ( 3 نقاط فوق القاف) كل سبت على طاولة وحدة.. ريتهم يتعاركو والا مطيحين القدر مع بعضهم ؟؟؟؟

صدقوني كيف حكيت معاه هكة حسيتو ولى إنسان آخر.. (:

بالعودة إلى "آخر فيلم" ، ومسألة استبلاه ولاد الناس ، نحب نأكد على النقاط إلي طرحهم المخرج في الفيلم متاعو..

انعدام الأفق و غياب المستقبل يلعب دور كبير في تمكن الخفافيش (عليهم لعنة الإنسانية) من استقطاب الشباب وتحويلهم إلى قنابل.. إنسان محروم في دنيتو من كل شيء..والمستقبل قدامو مسكر جملة وحدة ونهار كل ياكل في البخس والشلابق الحكومية ، بالطبيعة باش يلتجأ للانتحار بدون حتى دافع ديني..

أما الفازة الماسطة انو كيف يدخل الدين في الحكاية يحول الانتحار هذاكة لعملية قتل جماعية للناس و تزعزيع للاستقرار وضرب للسياحة الي تمثل عماد الاقتصاد في بلادنا..

كل هذا في سبيل الحوريات والخلاص من عذاب القبر.. أي في سبيل الجنة إلي يدخلها الشهيد يُعبر "بار مونسيون" كيف ما قال بهتة..

الحرمان إذن يجي في المرتبة الأولى ، هذا الحرمان إلي تجلى بصفة واضحة في الجزيرة العربية القاحلة..

والي خلى صلعم يختم كل الآيات المتحدثة عن الجنة بعبارة "تجري من تحتها الانهار"...

تحبو المي ؟؟ هاو المي !!

أما طيرولي زوز ريوس قبل تعملو مزية..

* * *

العامل الثاني هو البهامة وغياب ملكة النقاش والقدرة على التفكير وانعدام الثقافة (مع الاعتذار لأهالي الضحايا )

لو كان جاء المغرر بهم هاذم على قدر معين من الذكاء والاطلاع على التاريخ الإنساني وما يحدث في العالم.. راهم مايحصلوش.. وراهم يعرفو انو الأوباش الي قدامهم ناس مجرمين و متحيلين وكذابة..

بارعين في التنوفيق ، و التقية السياسية ، الغرب يفتحلهم ابوابو منا ويخليهم يعبرو رغم انهم مايستاهلوش ، يدورو يفرقعو الكيران في بريطانيا والقطارات في مدريد..

عندهم قدرة عجيبة على الوقاحة ومصارعة الحشمة ، بحيث مايقولوش آش باش يقولو عليهم الناس.. و قداش باش يسبولهم ربهم ورب دينهم..

يحبو يعترفو بيهم سياسيا ويخليوهم يدخلو للانتخابات وهوما يحَرمو في الديمقراطية...!

ما يقولوش زعمة هذم منعونا على خاطر يعرفو اننا باش نحتكرو السلطة ، لا.. يقولو هاذم منعونا على خاطر يحاربو في الدين بمساعدة الصليبيين..!

نهار كل يسبو في الكفار "بالبافلوات" وفي "الانترنت" و عبر "الاقمار الصناعية" وكلها اختراعات غربية كافرة..

باختصار..

ناس تحتقر الحياة.. تحتقر المرأة.. ألطف ماقدموه للانسانية هو تدمير تماثيل بوذا و حرق الكتب..

ماعندهم في روسهم المعفنة كان القتل والجلد والتشوشيط... ضد كل ماهو جميل.. كل ماهو فن..

كل ماهو حياة... فالحياة لا تساوي "جناح بعوضة " كما قال ربهم...

سعيد برشة بوجود أمثال نوري البوزيد.. فبفضل الفيلم هذا ، برشة شباب باش يتفكرو مصير " بهتة " وكيفاش عداوها عليه ، قبل ما يقومو بأي خطوة بهائمية ويترزاو في عمارهم وعمار والديهم..

الحرب ضد البهامة مزالت في بداياتها.. نتمنى على كل إنسان حر في هذا العالم باش ينضم للمعسكر هذا ، وياقف معانا ضد كل هالخرى الفكري سواء كان إسلامي ممثلا بالوهابية ، يهودي ممثلا بالصهيونية ، أو مسيحي ممثلا "بالبوشية"..

لان المسألة أصبحت وباختصار..

مسألة حياة أو موت...

...

الحي يروح...

...

اليوم بدا مسلسل محاكمة المشاغبين والعملاء متاع الحوض المنجمي...

مانيش باش نحكي برشة المرة هاذي...

فقط

كلمة وحدة..

الله معاك يا بيت صامد في الجنوب..
يلي تحت سقفك ع الوفا ربيتنا..

( باش تصبو الغناية ما عليكم كان تنسخو الرابط وتحطوه في المكان المخصص الفوق )

...